Capitula siue constitutiones ecclesiasticæ per Archiepiscopum, episcopos, & reliquum clerum Cantuariensis prouinciæ in synodo inchoata Londini vicesimo quinto die mensis Octobris, anno Domini millesimo quingentesimo nonagesimo septimo ... congregatos tractatæ, ac posteà per ipsam Regiam Maiestatem approbatæ & confirmatæ, & vtríque prouinciæ tam Cantuariensi quàm Eboracensi vt diligentiùs obseruentur, eadem regia authoritate sub magno Sigillo Angliæ promulgatæ.

CAPITVLA SIVE CONSTITVTIONES Ecclesiasticae per Archiepiscopum, Episcopos, & reliquum Clerum Cantuariensis Prouinciae in Synodo inchoata Londini vicesimo quinto diemensis Octobris, anno Domini millesimo quingentesimo nonagesimo septimo, regníque Serenissimae in Christo Principis, Dominae ELIZABETHAE, Dei gratia Angliae, Franciae, & Hiberniae Reginae, Fidei Defensoris, &c. tricesimo nono, congregatos tractatae, ac posteà per ipsam Regiam Maiestatem approbatae & confirmatae, & vtríque Prouinciae tam Cantuariensi quàm Eboracensi vt diligentiùs obseruentur, eadem Regia authoritate sub magno Sigillo Angliae promulgatae. *⁎*

LONDINI Excudebant Deputati Christopheri Barker, Regiae Maiestatis Typographi.

Anno Domini 1597.

Vt homines idonei ad sacros ordines, & Beneficia (vti vocant) ecclesiastica admittantur.

PRimò cautum est, ne quis posthac ad sacros ordines suscipiatur, qui non eodem quoque tempore praesentationem suiipsius ad beneficium aliquod intra Diocoesim siue Iurisdictionem eiusdem Episcopi a quo sacros ordines petit, tunc vacans exhibuerit: Vel qui non eidem Episcopo certum, verum & indubitatum Certificatorium attulerit de ecclesia aliqua intra Diocoesim siue Iurisdictionem dicti Episcopi, in qua curae animarum inseruire possit: Vel qui in aliqua Cathedrali aut Collegiata Ecclesia, vel Collegio Cantabrigiensi aut Oxoniensi non fuerit constitutus: Vel saltem qui ab eodem Episcopo in Beneficium aliquod, siue ad Curam (vti vocant) inseruiendum tunc etiam vacantem, non sit mox admittendus.

Deinde, ne quis Episcopus posthac aliquē in sacros ordines cooptet, qui non ex sua ipsius diocoesi fuerit: nisi vel ex altera nostratium Academiarum prodierit: vel nisi literas (vt loquuntur) dimissorias ab Episcopo cuius Diocoesanus existit, attulerit, & vicesimum quartum aetatis suae annū iam compleuerit, ac etiam in altera dictarum Academiarum gradum aliquem scholasticū susceperit: Vel saltem nisi rationem fidei suae iuxta Articulos illos Religionis in Synodo Episcoporum & Cleri approbatos Latino sermone reddere possit, adeò vt sacrarum literarum testimonia, quibus eorundem articulorum veritas innititur, recitare etiam valeat: Ac vlteriùs, de vita sua laudabili, & morum integritate literas testimoniales sub Sigillo vel alicuius Collegij Cantabrigiensis aut Oxoniensis, vbi antea moram fecerit, vel alicuius Iusticiarij ad pacem Dominae Reginae conseruandam assignati, vnà cum subscriptione & testimonio aliorum proborum & fide dignorum hominum eiusdem paroeciae, vbi per tres annos ante proximè elapsos commoratus est, exhibeat. Vt que hi sacri ordines diebus tantummodo Dominicis, ac festiuis, id que publicè ac tempestiuè in ecclesia vbi Episcopus moram traxerit, conferantur: Prouiso semper, vt vtriusque Academiae Collegiorum Socij, qui suorum Collegiorum statutis ad sacros ordines intra certum tempus suscipiendos tenentur, hoc decreto (quantum ad aetatem attinet) non obligentur. Quod si verò aliquis Episcopus aliquem ad sacros ordines admiserit, qui praedictis qualitatibus non sit praeditus, is per Archiepiscopum, assidente sibi hac in parte vno alio Episcopo, ab ordinatione Ministrorum & Diaconorum per integrum biennium suspendatur, ac eam praetereà poenam incurrat, quae de Iure in eiusmodi Episcopos qui ad ordines Ecclesiasticos sine titulo aliquem promouebunt, statuitur.

Adhaec, ne quis Episcopus aliquem in beneficium (vti vocant) instituat, nisi qui praedictis conditionibus ornatus fuerit.

Si verò Curia de Archubus aut Audientiae per viam duplicis querelae, seu alio quouis modo contra Episcopum hac in parte agat, quia homines minimè idoneos ac habiles admittere renuit: tunc licebit Archiepiscopo, vel authoritate propria vel gratia speciali a regia Maiestate impetrata, eiusmodi processus amputare, quò laudabilis Episcopi industria debitum ea ratione sortiatur effectum.

Denique, vt quolibet anno ad festum Sancti Michaelis Archangeli, vel intra sex hebdomadas idem festum subsequentes, vnusquisque Episcopus numerū, nomina, gradus & qualitates eorum omnium, quos in sacros ordines, vel in aliqua Beneficia eodem anno praecedente promouerit, ad Archiepiscopum transmittat.

De Beneficiorum pluralitate cohibenda.

QVòd nemini in posterum facultas siue indulgentia concedetur de pluribus beneficijs simul retinendis, nisi huiusmodi tantùm, qui pro eruditione sua & maximē digni, & ad officium suum pleniùs praestandum maximè habiles & idonei censebuntur: Nimirum, vt is qui huiusmodi facultate fruiturus est, sit ad minimùm artium magister, & publicus ac idoneus verbi diuini Concionator: Ita tamen vt idonea etiam cautione obstrictus teneatur, de personali sua residentia in singulis Beneficijs per bonam anni cuiusque partem facienda, & quòd eiusmodi Beneficia triginta milliarium spatio ad summum non distent abinuicem, Deni que quòd idoneum Curatum habeat, qui plebem eius Paroeciae in qua non residebit, instituat ac informet, modò facultates eiusdem Beneficij talem commodè sustinere posse Archiepiscopo, vel eius Diocoeseos Episcopo videbuntur.

Vt Beneficiati in suis Beneficijs Curatis hospitalitatem exerceant.

QVoniam ecclesiarum Cathedralium Canonici siue Praebendarij ecclesiastica beneficia curata alibi saepiùs possident, & tamen praetendentes se ratione Praebendatum suarum a residentia in Curatis Beneficijs liberos & immunes, ad Cathedrales conuolant, ibi que moram faciunt longiorem: Vnde nec curae parochianorum illis commissae satis prospicitur, nec pauperes domi suae (sicuti difficultas huius temporis exigit) aluntur atque sustentantur: Idcirco nos huic malo prouidere desiderantes, decernendū censemus, vt omnes & singuli Canonici siue Praebendarij qui beneficia curata vnū siue duo obtinēt (nec Residentiarij necessarij in suis ecclesijs Cathedralibus existūt) vltra tempus quo in Cathedralibus residere tenentur, a Beneficijs suis Curatis praetextu praebendarum se non absentent: Et si aliqui eorum, qui ad necessariam residentiam in Ecclesijs Cathedralibus non tenentur, vltra tempus vnius mensis aliquo anno, in Ecclesia illa Cathedrali moram traxerint, eos arctari volumus ad familiam in Beneficio suo Curato (non obstante mora in Cathedrali) alendam, & Hospitalitatem exercendam, toto reliquo tempore quo a Curato abfuerint. Quod autem ad eos attinet, qui ad residentiam in ecclesijs Cathedralibus faciendam, per ordinationes illius Ecclesiae obligantur, & communis diuidentiae participes sunt, eos ita inter se anni tēpora partiri volumus quoad residentiam in Cathedralibus habendam, vt eorum aliqui in Ecclesijs illis semper adsint, & personaliter resideant. Ac quò haec omnia melius peragantur, Episcopi, vel alij ad quos per ecclesiae statuta vel ordinationes pertinet, in suis respectiuè Ecclesijs diligenter prouidebunt.

Vt Deeani & Cononici in Ecclesijs Cathedralibus suis vicibus conciones habeant.

CVm Beneficium propter Officium conferri debeat, aequum existimamus, vt ecclesiarum Cathedralium Decani & Canonici omnes & singuli, qui in sacris ordinibus sunt constituti, & ad Conciones habendas in Ecclesijs suis Cathedralibus, de Iure, Statutis, Ordinationibus, aut laudabili consuetudine illius Ecclesiae tenentur, in personis suis proprijs eas praestent, nec vicaria in ea re opera vtantur, nisi ex causa aegritudinis, aut alia legitima impediti, Concanonicum suum, vel alium in Theologia eruditum ac ad concionandum authoritate sufficienti approbatum sua vice substituant. Quòd si qui huiusmodi Decani aut Canonici officium ea in re neglexerint, per Episcopum vel eos ad quos iurisdictio pertinet, quoad se debitè correxerint, suspendantur.

De moderandis indulgentijs pro celebratione matrimonij abs que trina bannorum denunciatione.

QVandoquidem honestae, clarae, ac illustris conditionis homines, siue vrgente aliqua necessitate, siue alijs non contemnendis rationibus, matrimonium aliquando celebrandi causas habere possunt, facultate sibi de Bannis matrimonialibus aut non omninò, aut semel iterúmue denunciandis indulta, sine aliquo graui scandalo seu detrimento: Idcircò ad euitanda generaliter quae hac in parte notantur incommoda, visum est caueri ne vllae facultates siue Indulgentiae de celebrando absque bannis matrimonio concedantur, nisi idonea cautio priùs sub hisce conditionibus ineatur: nimirùm, primò quòd nullum posteà constabit impedimentum praecontractus, consanguinitatis, affinitatis, vel vllius alterius legitimae causae cuiuscun que ratione.

Secundò, quòd eo tempore quo eiusmodi facultas siue indulgentia concedetur, nulla controuersia, lis seu querela mota est, vel dependet coram aliquo Iudice ecclesiastico aut ciuili, de eiuscemodi legitimo impedimento matrimonij inter huiusmodi personas contrahendi aut contracti: Ac tertiò, quòd ad nuptiarum solemnizationem, non accedent, nisi assensu & expresso consensu parentum siue tutorum priùs impetrato: Et vlteriùs quòd matrimonij celebratio publicè ac tempestiuè in facie ecclesiae fiet. Cuius quidem cautionis formula seu exemplar in scriptis concipietur, ac vnicuique Episcopo in sua cuiusque Diocoesi imitanda proponetur.

Praetereà adijciendum putamus, ne cuiquam liceat Episcopalem dignitatem non obtinenti (Commissario ad facultates, ac Vicarijs generalibus Archiepiscopi & Episcoporum, sede plena: & sede vacante Custodibus Spiritualitatis ac Ordinarijs, Episcopalem iurisdictionem de Iure exercentibus, in suis iurisdictionibus respectiuè exceptis) licentiam celebrandi matrimonia sine bannis concedere: Ea verò duntaxat per se, ac sub manuum suarum suscriptione, non per Deputatos aut Surrogatos suos, nec alijs quam suae iurisdictioni subditis concedatur. Nulli autem cuiuscunque sexus, dignitatis aut ordinis (in parentum seu gubernatorum cura & regimine existenti) concedatur, nisi priùs constiterit de expresso consensu parentum vel gubernatorum suorum (si fortè parentes excesserinte vita) idque parentum significatione, aut gubernatorum Iudici personaliter facta: vel Chirographis ipsorum, quibus fidem habendam esse non putamus, nisi per nuncios honestae conditionis & famae illesae mittantur, qui fidem faciant se de parentum aut gubernatorum manu Chirographa huiusmodi recepisse veris nominibus ac cognominibus per huiusmodi nuncios designandorum: Cuius Chirographi exhibitionis, ac Iuramenti per nuncium praestiti actum conscribi volumus. Nec verò alijs concedantur huiusmodi indulgentiae, quam illustris & clarae conditionis hominibus, nisi vrgens necessitas intercesserit, eaque Iudici cognita fuerit.

Praetereà in ipso dispensationis siue Licentiae tenore, Ecclesia habitationis siue commorationis alterius contrahentium, vel parentum & gubernatorum suorum exprimatur, & tempus diei etiam congruum, nempè inter horas octauam & duodecimam ante meridiem assignetur.

Nec sine indulgentia a competente Iudice concessa, Minister aliquis matrimonium celebret, nisi trina bannorum denunciatione (per legitima interualla) interueniente, sub poena constitutionibus Prouinciablibus praescripta.

Prouiso semper, quòd quicunque contra hanc ordinatiouem deliquerit, ab executione officij per superiorem per sex integros menses suspendetur: & licentia huiusmodi viribus carebit, & pro nulla quoad poenam personis clandestinas nuptias celebrantibus imponendam habebitur.

De Sententijs diuortij non temerè ferendis.

ET quia matrimoniales causae, inter maiores hucusque semper habitae fuerunt: Idcircò cum de matrimonijs in Indicijs disceptatur, cautiùs agi oportet, praesertìm verò cum matrimonium in Ecclesia solemnizatum, praetextu aliquo separari, vel nullum pronunciari postuletur, aequum igitur visum est.

Primùm vt in huiusmodi diuortiorum & nullitatis matrimonij processibus, deliberatè procedatur, ac quantum fieri poterit, rei veritas, testium depositionibus, aliis que probationibus legitimis eruatur, nec partium confessioni (quae in hijs causis saepè fallax est) temeré confidatur.

Tùm vt nullae posthac sententiae vel separationis a thoro & mensa, vel nullitatis matrimonij ferantur, nisi publicè, ac pro tribunali, & de scientia & consensu vel Archiepiscopi, infra Prouinciam suam, vel Episcopi infra propriam diocoesim, Decani de Arcubus, Iudicis Audientiae Cantuariensis, aut Vicariorum generalium, aliorumue Officialium principalium, vel sede vacante Custodum spiritualitatis, aut aliorum Ordinariorum, quibus de Iure competit in suis respectiuè Iurisdictionibus ac Curijs, at que inter suae iurisdictionis subditos tantùm, Deinde vt in Sententijs quando ad separationem Thori & mensae tantùm interponuntur, monitio & prohibitio fiat, vt a partibus ab inuicem segregatis castè viuatur, nec ad alias nuptias alterutra viuente conuoletur: Denique, quò postremum illud firmiùs obseruetur, sententia separationis no anteà pronunciabitur, quàm qui eam postulauerint, cautionem fideiussoriam sufficientem interposuerint, se contra monitionem & prohibitionem nihil commissuros.

Iudex autem qui sententiam separationis seu diuortij tulerit, & praemissa omnia non praestiterit, per tres integros menses ab executione Officij sui per Diocoesanum suum suspendetur: Et sententia separationis contra formam praedictam lata, pro nulla ad omnem Iuris effectum habebitur, ac si omnino lata non fuisset.

De excessibus circa excommunicationem reformandis.

QVia Excommunicationis vsus in ecclesia perpetuae legis vigorem iam obtinuit, at que in omni iurisdictione ecclesiastica exercenda hucus que retinetur, ideò abs que grandi mutatione totius eiusce iurisdictionis & plurimarum huius regni legum innouari vel alterari nequit: Nihilominus vt Excommunicatio (quae authoritatis ac disciplinae ecclesiasticae quasi neruus quidam, ac vinculum habenda est) ad pristinum suum vsum, decus & dignitatem reducatur: Cautum est vt quotiescun que censura ista in immediatam poenam cuiusuis notoriè haereseos, schismatis, symoniae, periurij, vsurae, incestus, adulterij, seu grauioris alicuius criminis venerit infligenda, sententia ipsa vel per Archiepiscopum, Episcopum, Decanum, Archidiaconum vel Praebendarium (modò sacris ordinibus & ecclesiastica iurisdictione praeditus fuerit) in propria persona pronunciabitur, vna cum eiusmodi frequentia & assistentia quae ad maiorem rei authoritatem conciliandam conducere videbitur.

Denique quod vnusquisque Vicarius generalis, Officialis, seu Cōmissarius, qui ordines ecclesiasticos non susceperit, eruditū aliquem praesbyterum sibi accerset & associabit, qui sufficienti authoritate vel ab ipso Episcopo in iurisdictione sua, vel ab Archidiacono (praesbytero existente) in iurisdictione sua munitus, id que ex praescripto ipsius Iudicis tunc praesentis excommunicationis sententiam pro contumacia denunciabit.

Volumus etiam, vt sicut constitutum est, eiusmodi excommunicationem per Ministrum ecclesiae denunciari, ita ipse Iudex de absolutione ipsius rei post satisfactionem suam peractam, eundem Ministrum certiorem faciet, qui eandem absolutionem populo publicè denunciabit: ac interìm quod benè licebit, dicto ministro reum a sacris arcere & repellere, tanquam in Ecclesiam minimè recipiendum, donec eiusmodi certificatorium ab ipso Iudice exhibuerit.

De Recusantibus, & alijs excommunicatis publicè denunciandis.

CVrent Ordinarij locorum, vt tam excommunicati ex eo quod diuinis praecibus infra hoc regnum Angliae publica authoritate stabilitis interesse pertinaciter recusauerint, quám ij etiam qui propter aliam quamcunque causam legitimam excommunicationis sententia innodati fuerint, nisi infra tres continuos menses post latam excommunicationis sententiam se emendauerint, & absolutionis beneficium obtinuerint, singulis sex mensibus sequentibus, in ecclesia cum parochiali, tum etiam Cathedrali Diocoesis in qua habitant, pro excommunicatis publicè denuncientur. Teneantur etiam Ordinarij praedicti de praemissis omnibus & singulis quolibet anno infra Festa Sancti Michaelis & Natalis Domini, Archiepiscopum huius Prouinciae in scriptis certiorem facere.

De moderanda solennis poenitentiae commutatione.

NE qua fiat posthac solennis poenitentiae cōmutatio, nisi rarioribus grauioribúsque de causis, atque adeo cum ipsi Episcopo constiterit, eam esse ad reum reconciliandum & reformandum saniorem & tutiorem rationem.

Deinde quod mulcta illa pecuniaria vel in releuamen pauperum eiusdē paroeciae, vel in alios pios vsus erogetur, idque ecclesiae solenniter & fideliter approbetur, & innotescat.

Quod si verò crimen fuerit notorium, ac publicum, Reus ipse vel in propria sua persona publicè in Ecclesia poenitentiam suam minimè fictam profitēdo, loesae ecclesiae satisfaciet, vel ecclesiae minister in praesentia ipsius rei, palam e suggestu eius submissionem, & poenitentiae suae coram Ordinario suo peractionem, atque etiam in verae suae resipiscentiae Testimonium, quantam pecuniarum summam in vsus supradictos erogandam reddiderit, denunciabit.

Quicun que verò abs que Episcopi Diocoesani notitia poenitentiam commutauerit, aut pecuniam ratione commutationis huiusmodi solutam in alios vsus quam supra est expressum conuerterit, vel aliter praesentem hanc constitutionem violauerit: Is ab executione Officij sui per eundem Diocoesanum per tres integros menses suspendetur.

De feodis quae Officiarijs ecclesiasticis & eorum ministris debentur.

CAutum insuper volumus, quòd ne que alia, ne que maiora feoda ab Episcopo, Ordinario, Archidiacono, vel eorum ministris deinceps vlla de causa percipiantur, quàm ea, quae ineunte hoc regnum regia nunc Maiestate percipi solebant: Quodque tabula quaedam singulorum huiusmodi feodorum summas continens, in quolibet Consistorio ante Festum Sancti Iohannis Baptistae proximè venturum figatur, cuius exemplar manu ipsius Ordinarij subsignatum intra tempus praedictum ad Archiepiscopum transmittetur.

Iam verò quia dubium esse potest, quaenam certa feoda pro singulis negotijs expediendis, in singulis respectiuè foris ecclesiasticis quadraginta abhinc annis percipiebantur, nisi quae vsus frequentior succedentibus ab eo tempore annis monstrauerit, at que approbauerit: Ideò decernendum putamus vt citra vltimum diem mensis Maij proximè sequentem, Episcopus quilibet, vel sede aliqua Episcopali vacante, Custos spiritualitatis ibidem curet, tabulam manu Ius dicentís eiusque registrarij subscriptam publicè figi, vel in loco quolibet vbi Ius ab illo dicetur, vel aliâs publicè in eiusdem iurisdictionis Archiuo, ita vt quiuis eiusdem tabulae inspiciendae facultatem habeat: Quae quidem tabula in se continebit separatas summas singulorum feodorum, quae tam a Iudice, quàm a singulis alijs Officiarijs ac ministris eiusdem Curiae frequentiùs ac vsitatiùs ab initio regni dictae Serenissimae Reginae vsque ad decimum octauum Maiestatis suae annum percipi consueuerunt: Curabit praetereà quilibet Episcopus, vel sede vacante Custos spiritualitatis, vt quilibet Index huiusmodi citra vlrimùm diem praefati mensis Maij Episcopo suo, vel Custodi spiritualitatis fidele & auctenticum exemplar tabulae feodorum praemissorum in Archiuis Episcopi custodiendum tradat: Qui verò contra fecerit, is ab executione officij sui per Ordinarium suum immediatè superiorem eò vsque suspendetur, donec praemissa modo & forma superiùs specificatis perfecerit.

Quorum omnium exemplarium, singuli Episcopi Prouinciae Cantuariensis vel Custodes spiritualitatis, fidele & auctenticum Instrumentum in pergameno conscriptum, ad Archiepiscopum citra vltimum diem mensis Octobris proximè futurum transmittent.

Poena verò cuiusque Officiarij, ac Ministri maiora feoda quàm quae in huiusmodi tabulis respectiuè exprimentur percipientis, suspensio erit per sex menses ab executione officij sui per Ordinarium suum infligenda, vel Ordinario negligente aut id facere omittente, per Archiepiscopum, qui alium delinquentis loco interìm deputabit.

Prouiso semper, quòd si alicubi dubium fuerit quae feoda vs que ad praedictum decimum octauum regiae Maiestatis annum vsitatissimè percepta fuerint: Tùm ea foeda pro legitimis habebuntur quae per Archiepiscopum Cantuariensem sub manus suae subscriptione approbabuntur: nisi statuta huius regni Angliae iam anteà aedita, alia in quocun que casu feoda expressè praestituerint.

Prouiso insuper, quòd ne que Archiepiscopo ne que Episcopo, vel directè, vel indirectè aliquā pecuniarum summam pro admittendis ad sacros ordines hominibus accipere licebit, idque sub poena Iuris.

De excessibus Apparitorum reformandis.

PRaetereà quoniam excessibus & grauaminibus quae per Apparitores inferri dicuntur, remedium cupimus adhibere opportunū, videtur vt Apparitorum multitudo, quantum fieri poterit, restringatur; Non igitur licebit Episcopis vel Archidiaconis, eorumue Vicarijs seu Officialibus, alijs que inferioribus Ordinarijs deputare & habere plures Apparitores, iurisdictionibus suis respectiuè inseruientes, quam ante viginti annos praeteritos, vel ipsi vel praedecessores sui habere consueuerunt, qui omnes per se suum fideliter exequantur officium, Nec per nuncios aut substitutos quocun que quaesito colore, sua vice mandatorum executiones demandent, aut permittant, nisi ex causa ab ordinario illius loci priùs cognita & approbata: Tum vt promotorum Officij, vel denunciatorum personas omninò non sustineant, feoda ampliora vel maiora, quàm quae hijs constitutionibus, superiùs statuuntur, non exigant.

Quòd si plures quam superiùs est expressum deputati, vel illorum aliqui praemissa violauerint, deputantes si Episcopi existant, moniti per superiorem supernumerarios dimittant. Inferiores verò Episcopis Ordinarij, ab executione Officij suspendantur, donec huiusmodi deputatos amouerint, deputati autem ipsi ab Apparitorum Officio moueanter perpetuò: Et si amoti non desistant, tanquā contumaces Canonicis censuris coerceantur.

Praetereà in causis Officij & correctionis ne quae fiant Citationes generales (quae vulgò Quorum nomina dicuntur) nisi partes citandae veris nominibus expressis per registrarium in ipsa schedula citationi annexa, & sigillo munita scribantur: eadem que schedula ius dicentis manu subscribatur, sub poena coertionis ecclesiasticae per Diocoesanum delinquenti infligenda.

De Registris in Ecclesijs saluae Custodiae committendis.

ET quia Registra in ecclesijs (quorum permagnus vsus est) fideliter volumus custodiri: Primùm statuendum putamus, vt in singulis visitationibus admoneantur ministri, & oeconomi ecclesiarum de Iniunctionibus regijs ea in re diligentiùs obseruandis.

Deinde vt libri ad hunc vsum destinati, quò tutiùs reseruari & ad posteritatis memoriam propagari possint, ex pergameno sumptibus parochianorum in posterum conficiantur: Iisque non modò ex veteribus libris cartaceis transumpta nomina eorum, qui regnante serenissima Domina nostra Elizabetha, aut baptismatis aqua abluti, aut matrimonio copulati, aut ecclesiasticae sepulturae Beneficio affecti sint, suo ordine sumptibus parochianorum inscribantur: Sed eorum etiam, qui in posterum baptizati, vel matrimonio coniuncti aut sepulti fuerint.

Ac ne quid vel dolo commissum, vel omissum negligenter redarguatur, Quae per singulas hebdomadas in hisce libris inscripta nomina fuerint, ea singulis diebus Dominicis post preces matutinas aut vespertinas finitas, apertè ac distinctè per ministrum legantur, die ac mense quibus singula gesta sunt sigillatim adiectis.

Postquam autem paginam aliquam integram multorum nominum inscriptio compleuerit, tum ministri, tum Gradianorum ipsius parochiae subscriptionibus volumus eam communiri.

Idemque in transumptis ex veteribus libris cartaceis, paginis singulis fieri, sed diligenti, ac fideli priùs habita collatione: neque verò in vnius cuiusquam custodia librum illum, sed in Cista publica, eaque trifariam obserata reseruandum putamus, ita vt neque sine ministro Gardiani, nec sine vtrisque gardianis minister quicquam possit innouare.

Postremùm est, vt exemplar quotannis cuius que anni auctae nominum inscriptionis ad Episcopi Diocoesani registrum per Gardianos infra mensem post Festum Paschatis transmittatur, & sine feodo vllo recipiatur, at que in Archiuis Episcopi fideliter custodiatur.

Quicunque verò in praemissis eorumue aliquo deliquerit, is vt delicti qualitas Iusque postulauerit puniatur.

QVae omnia Capitula siue Constitutiones, omniaque & singula in eisdem contenta, Regia Maiestas per suas Literas Patentes gerentes dat. apud Westmonasterium decimo octauo die Ianuarij, anno regni sui quadragesimo, ratificauit, confirmauit ac stabiliuit, ipsaque ab omnibus regni sui subditis vtrius que Prouinciae, Cantuariensis & Eboracensis, quatenus eorum aliquem concernunt, diligenter exequenda, ac obseruanda authoritate sua regia proposuit, promulgauit, & per easdem Literas Patentes sic per eos obseruari praecepit, iniunxit & mandauit, prout in eisdem literis Patentibus, Sigillo magno Angliae sigillatis pleniùs liquet & apparet.

❧EXEMPLARIA Licentiae seu facultatis matrimonij abs que trina Bannorum promulgatione celebrandi in singulis Episcopatibus obseruanda.

❧LICENTIA VBI vter que vel alter contrahentiùm sub parentum vel gubernatorum potestate existit.

R. Permissione diuina L. Episcopus: Dilectis nobis in Christo D. C. Parochiae de B, filio naturali & legitimo I. C. Parochiae de F. generoso, & N. O. puellae, fuiae naturali & legitimae B. O. Parochiae de M. nostrarum L. Diocoeceseos & Iurisdictionis, salutem: Cùm vos (vti asseritur) ad solemnizationem matrimonij veri & legitimi de expresso consensu & assensu parentum & gubernatorum vestrorum, ac vtriusque vestrûm procedere decreueritis: Illudque in facie Ecclesiae cum ea qua fieri poterit matura celeritate solemnizari facere & obtinere magnoperè desideretis: Nos volentes vt honesta haec vestra desideria debitum celeriùs consequantur effectum: Vt igitur matrimonium huiusmodi in Ecclesia de F. (exprimendo Ecclesiam alterius contrahentium, vel parētum aut gubernatorum suorum) per Rectorem, Vicarium seu Curatum eiusdem ecclesiae Bannis matrimonialibus vnica vice tempore solemnizationis eiusdem matrimonij (vti moris est) publicè editis, liberè & licitè solemnizari facere & obtinere possitis & valeatis, post cautionem fideiussoriam sufficientem ex parte vestra interpositam, iuxta constitutiones authoritate regia nuper editas: Dummodo vobis ratione consanguinitatis, affinitatis, praecontractus, vel alterius causae cuiuscunque de Iure prohibitae nullum legitimum in ea parte obstiterit impedimentum, nec vlla lis, controuersia, seu querela mota sit vel pendeat coram aliquo Iudice ecclesiastico vel ciuili de matrimonio aliquo contracto vel allegato cum alterutro vestrum, & Ministro ecclesiae praedictae priùs constiterit, vos ad huiusmodi matrimonij celebrationem accedere de & cum expresso consensu parentum vel gubernatorum vestrorum, ac modò matrimonij huiusmodi celebratio publicè in ecclesia de F. praedict. fiat inter horas octauam & duodecimam antemeridianas, absque tamen praeiudicio Ministri ecclesiae de M. vbi dicta N. O. Parochiana existit, Licentiam & Facultatem tam vobis contrahentibus, quàm Rectori, Vicario aut Curato ecclesiae praedictae de signatae matrimoniū huiusmodi inter vos solemnizandi sub modo & forma superiùs specificatis, iuxta ritus libri publicarum precum authoritate Parliamenti in ea parte editi & stabiliti, necnon omnibus alijs Christi fidelibus eidem solemnizationi interessendi, ex certis causis legitimis & rationabilibus per nos approbatis, quatenùs in nobis est, et Iura regni patiuntur in hac parte, benignè concedimus & impertimur per presentes. Prouiso semper, quòd si alteruter vestrum clarioris aut illustrioris conditionis sit quàm nobis suggestum est, & quàm ex cognomine & additamento in hijs literis insertis colligi facilè potest, aut si aliqua fraus in posterum appareat vel falsitatis nobis suggestae, vel suppressae veritatis tempore huius Licentiae obtentae: Tunc haec Licentia nostra irrita sit ad omnem Iuris effectum ac si omninò concessa non fuisset: Et eo casu inhibemus quibusuis ministris (modò praemissorum aliquod eis innotuerit) ne ad solemnizationem dicti matrimonij procedant, nisi nobis, aut Vicario nostro in spiritualibus generali priùs consultis: In cuius rei testimonium &c.

The minister shall not solemnize this marriage, without the consent of their parents or gouernours, who are hereby licensed to marrie.

Si vtraque pars contrahens in viduitate existens ad secundas nuptias conuolare facultatem petat, tum omnes clausulae parentum consensum requirentes omitti possunt, sed Parochiae vtriusque contrahentis in Licentia exprimendae sunt, ac Parochia vbi matrimonium celebrabitur, designanda.

❧THE COPY OF a Bond to be taken vpon euery license of marriage to be granted before the granting thereof.

❧THE OBLIGATION to be in the vsuall forme in such competent summe, as considering the estate of the parties to be married shalbe by him who hath warrant to grant license, thought conuenient.

THe condition of this obligation is such, That if heereafter there shall not appeare any lawfull let or impediment, by reason of any precontract, consanguinity, affinity, or by any other lawfull meanes whatsoeuer, but that the within bounden A. B. and F. G. Spinster (or Widow, when the license is for a widow) may lawfully solemnize marriage together, and in the same afterwardes lawfully remaine and continue like man and wife according to the lawes in that behalfe prouided: And moreouer, if there be not at this present time any action, sute, plaint, querell or demand, mooued or depending before any Iudge Ecclesiasticall or Temporall, for and concerning any such lawfull impediment between the sayd parties, nor that either of them be of any better estate or degree, then to the Iudge at the granting of the license is suggested: And also, if they shall not solemnize this marriage without the consent of their parents or gouernours: Lastly, if the sayd marriage shall be openly solemnized in the Parish church in the license specified, betwixt the houres in the Constitutions confirmed by her most excellent Maiesty, appointed, and according to the forme of the booke of Common praier now by law established: Then this present obligation to be voide and of none effect, or els the same to stand, remaine and abide in full power, strength, and vertue.

Where a Widower and a Widow do marry together, there the clause of the parents consent is to be left out of the bond, and all the other clauses to stand.