ENcore que nous ayons raiſon de croire, que les Entrepriſes ſanglantes, & barbares des Papiſtes & leur Faction, tant en Anglterre qu'en Irlande, & la multitude d'oppreſſions & miſeres que ceux qui ſont bien affectionnez a la Religiō Proteſtante, & Liberté de leur Pays ont ſouffert, ayent touché les coeurs des hommes de recercher la prompte aſſiſtance & ſecours de leurs Freres, l'ardent deſir, & les derniers effortz deſquels ſeront, de leur conſerver & reſtablir l'une & laùtre: Toutesfois ſcachans combien eſt induſtrieuſe la malice du Diable & de ſes inſtruments, a ſuſciter des prejugez & fomenter des Jalouſies entre ceux de qui les coeurs & les penſees doibuent eſtre unes, parce que leur proſperité eſt une, & particulierement entre nous & nos Freres d'Angleterre, a ce quén nous diuiſant l'vn de l'autre, ilz puiſſent nous deſtruire tous deux: Et afin que cette noſtre ſe •• de Expedition en Angleterre (que nous ne doubtons pas que Dieu benira, a l'advantage de cette Nation là, comme il fit noſtre premiere, au bon-heur de la noſtre propre) au lieu d'eſtonnement & oppoſition, puiſſe trouuer la prompte & agreable concurrence de tous ceux qui comme nous deſirent, La conſervation & Reformation de Religion, L'Honneur & Proſperité du Roy, La Paix & Liberté des Royaumes: Nous avous trouué bon d'envoyer deuant cette briefue, mais libre & ingenue Declaration, des Raiſons de cette noſtre Entrepriſe, & de nos intentions en icelle, aſin que nous nàyons afaire qu'a ceux que nous pourrons trouuer paiſibles, ou laiſſer inexcuſables.

Comme ainſi ſoit donc que les plus grandes queſtions qui ſemblent ſe pouuoir mouuoir en cette affaire, puiſſent eſtre reduites a ces trois chefs; aſſauoir, La juſtice de noſtre Cauſe; Le droit de noſtre vocation a icelle; Et La fidelité de nos comportemens en cette occaſion: Nous taſcherons icy de donner ſatisfaction en tous ces Poincts, & ne doubtons point de le faire, ſi ce n'eſt qu'il reſte quelques vns, deſquels malice inveteree ayt produit en eux vne reſolution de ne pouuoir eſtre ſatisfaicts.

Quant a la cauſe & fondement de cette Entrepriſe, nous ne ſō mes pas ignorans auec quelle paſſion ardente les fils de menſonge & perditiō (deſquels la couſtume eſt de calomnier les procedures qu'ilz ne ſcauroient deſtourner) taſchent d'imprimer aux coeurs de nos Freres, que nous venō; pour peſcher en eaue trouble en Angleterre, pour cercher & prendre nos propres advantages au milieu de vos neceſſitez. Mais nous vous prions de ne point ouurir vos oreilles, beaucoup moins vos coeurs, a telles impoſtures, dont nous nous aſſurons que vos yeux verrōt en bref la faulſeté. Car comme cy aprez nous ne doubtons pas de prendre a teſmoing nos cōportemens & vos conſciences, oultre l'experience que vous avez eue depuis peu de noſtre Religieuſe obſervation de nos precedentes Declarations de cette nature, Auſſy donnez nous permiſſion au meſme temps de prendre a teſmoing le grand cercheur des coeurs, qui cognoit, Que ſi nous nèuſſiōs eſté appelez a ce ſervice par lamour de Chriſt, qui requiert des Chriſtiens de ſe ſoulager les vns les autres; & par la Loy de nature, qui de •••• e noſtre principal ſoing & effort a nous conſerver de noſtre propre danger & ruyne, qu'vn eſprit ordinaire verra facilement eſtre envelopee en nos voiſins, Et par noſtre debuoir, & deſir de deſgager le Roy des dangers auquels il eſt enlacé, par la compagnie & pernicieux Conſeil de ceux qui ſont ennemis de la Religion, de la Proſperité de ſa Majeſté, & Paix de ſes Eſtatz, Nous euſſions peu, auec beaucoup plus de contentement & ſatisfaction a nous meſmes, auoir jouy auec repos de noſtre morceau ſec, qu'eſtre entrez en vos Maiſons pleines de ſacrifices de contention, mais puis que nous ſommes requis & meſmes neceſſitez par cette legitime Vocation, qui ſera mentionnee cy deſſoubs, Nous proteſtons deuant Dieu & le Monde, que nos coeurs & penſees ſont nettes & exemptes daucunes autres intentions que celles qui ſont exprimees en noſtre ſacree Alliance & Convenant, auquel nous ſommes confederez auec Angleterre, aſſauoir, La Conſervation & Reformation de la Religion, Dignité & Proſperité du Roy, & la Paix & Libertez des Royaumes. Toutes leſquelles nous jugeons eſtre en treſ-grand danger, par les Conſeils & Ligues des Papiſtes, Prelats, Malignants, & leurs adherents, ſi puiſſans aujourdhuy en Angleterre & Irlande, Et nous ne deſirerons autrement la Benediction de Dieu ſur nos trauaux, qu'èntant quils ſeront dirigez pour l'eſtabliſſement & conſeruation des choſes ſuſdites.

Et parce qu'il ne ſuffit pas déſtre engagé en vne bonne cauſe, ſi ce néſt par vne vocation legitime; nous declarons de plus par celle cy, Que quoy que les intereſts inſeparables des deux Nations en leur Religion & Libertez (qui ayans les meſmes Ennemys communs, doibuent auoir pour viſee de ſubſiſter ou perir enſemble) pourroient nous auoir ſuffiſamment adverti de travailler a preuenir noſtre propre ruyne, en conſeruant nos Amys & Freres, de deſtruction: Toutesfois afin que nous fuſſions plus pleinement & formellement obligez a ce ſeruice & deuoir de Chreſtien, & que par ce moyen la bouche de menſonge & malice put eſtre fermee, Dieu a ainſi ordonné les affaires en ſa ſage & juſte prouidence, que le Parlement d'Angleterre, lequel (oultre ſon intereſt en la conſeruation & Reformation de la Religion auec la defenſe des Loix & la Liberte du Pays, a quoy noſtre ayde eſt demandee) a vne obligation particuliere ſur cette Nation (ainſi que nous auons cydeu ••… recognu par nos Declarations publiees au commenceme •• de noſtre derniere Expedition) pour auoir refusé de fauoriſer & ſouſtenir vne guerre contre nous l'An. 1640. A jugé a propos par les Commiſſaires munis de pouuoirs pour cet effect, de requerir vne ferme vnion auec nous, & cette juſte & neceſſaire aſſiſtance de nous.

Et ou il nous pourra eſtre objecté que le conſentement & commandement du Roy n'interuenant point a cette noſtre vocation, elle ſemble eſtre defectueuſe; Nous reſpondons, Que quoy que par linjure des mauuais Conſeils, tant ſa perſonne que ſes commandemens perſonnels nous ſoyent ſouſtraits, toutesfois ſon honneur, ſa Proſperité, ſa Poſterité, ſon grand Conſeil, le bon-heur de ſes Royaumes, nous appellent inſtamment a cette prompte Entremiſe. Ainſi ſi nous ne voulions (cequ'a Dieu ne plaiſe) effacer de nos penſees le ſentiment de pieté & de Religion envers Dieu, de l'honneur & debuoir envers noſtre Souverain, & de gratitude envers le Parlement & Royaume d'Angleterre, nous ne pouuous en aucune facon reſiſter a la vocation preſente pour cette Entreprize.

Aprez, quant a ce qui concerne la maniere de la pourſuite de cette Cauſe juſte & vocation legitime, Quoy que les Requeſtes & Remonſtrances ſans effect, en grand nombre, preſentees a ſa Majeſté de la part des deux Royaumes, nous ayent laiſſé ce ſeul moyen, qui eſt ſans aucune intention contre ſa Majeſté, ni contre ſes bons Subjects, Mais contre les Ennemys du Roy & des Royaumes, auec leſquels nuls autres moyens ne peuuent prevaloir: Toutesfois nous taſcherons auec ſoing d'ordonner, en ſorte les affaires de noſtre Armee, que toutes inſolences, rapines, vols, & ces autres calamitez, qui ordinairement ſuiuent les gens de guerre, ſoyent prevenues.

Et en cecy, comme non ſans grand contentement de nous meſmes, ainſi auec non-moins de ſatisfaction de vous autres, nous pouuous vous renuoyer a l'experience de noſtre Expedition precedente (quand noſtre propre neceſſité nous fit entrer en Angleterre, ainſi que la voſtre maintenant nous y convie) pour conſiderer combien peu de dommage fut occaſionné par nous, combien peu de deſordre fut commis par nous en aucun lieu ou nous miſmes le pied: Et nous promettons par celle cy, de renouveler le meſme ſoing & diligence, & ſil eſt poſſible, les redoubler pour cet effect.

Et afin quòn ne nous regarde pas auec un prejugé comme Eſtrangers, a quoy nous eſperons que cette ferme Vnion du Convenant mutuel mettra fin, Il y a des Commiſſaires de voſtre propre Nation, la pluſpart deſquels ſont Membres de voſtre Parlement, & tels a qui vous auez commis le ſoing des affaires de l'Eglize, des Loix, & Libertez, qui ſont joincts auec nous, ſans l'aſſiſtance deſqu • ls nous ſommes obligez de ne faire aucune choſe qui vous concerne; Et pour vous liberer de tous ſoupcons iniques, leſquels ſi vos eſprits ne ſont pas prompts a concevoir, toutesfois les langues malicieuſes de nos adverſaires communs, ſont preſtes a ſuggerer, que nonobſtant cette Declaration nous auons quelques fins ſiniſtres & ſecrettes qui pourroient tourner au prejudice de vos droicts & proſperité; Nous voulous que vous ſcachiez par celle cy, que nous nous ſommes franchement engagez nous meſmes, par vn Article du dernier Traicté dèntre les deux Nations, de donner la foy publique du Royaume d'Eſcoſſe au Royaume d'Anglterre, que noſtre Entree ni noſtre ſejour dans ledit Pays, ne ſeront employez a aucunes autres fins quà celles qui ont eſté exprimees dans le Convenant, & au Traicté ſoubigné par les Commiſſaires des deux Royaumes, que nous ſommes reſolus, a l'honoeur de Dieu & de cette Nation, de garder inviolablement.

Et comme nos Amys & Freres peuuent attendre de nous des actions conformes aux expreſſions de cette Declaration, Ainſi les Malins & adverſaires implacables des fins declarees eu noſtre Convenant, ne peuuent rien attendre de nous quvne pourſuite vigoureuſe ſans partialité; En quoy, ſi quelque mal leur arriue, nous ſommes aſſurez que parle Jugement des hommes ſages & indifferens la faute ſera imputee a Eux meſines, comme aux Autheurs de leur propre mal.

Finalement, nous declarons (contre tous faux & artificieux rapports) que nous ſommes ſi eſloignez de ſouhaiter du mal ou perte a aucun de nos Freres d'Angleterre, que nos intentions ſinceres & Reeles ne ſont pas pour y allumer le feu ou y apporter de l'huile, Ains d'y apporter de l'caue pour eſteindre ces flammes & combuſtious lamentables, leſquelles nous auous auec tant de ſoing & affection trauaillé a eſtouffer: Que nous auons pris les Armes, non pas pour faire la guerre (ſi nous n'y ſommes contraints) Mais pour obtenir vne Paix mieux fondee & de plus de duree; afin de ouir de noſtre Religion & Litertez par tous les trois Royaumes: Et que les Meſchants (qui ſont les Autheurs miſerables de nos troubles) eſta •• oſtez d'aupres de noſtre Roy, vne bonne intelligence puiſſe eſtre eſtablie entre ſa Majeſté & ſon peuple. Et comme nous auous juré ſolemnellement, de proteger & defendre tous Ceux qui entrent en cette Alliance & adherent a icelle auec nous, de meſme attendons nous certainement que tous nos Freres en Angleterre, qui ſont Zelez a la vraye Religion Proteſtante, Loyauté au Roy, & fideles a leur Patrie, ſe joindront auec nous, & nous aſſiſteront en cete treſ-noble & juſte voye, a procurer ces deſirs equitables; Aprez leſquels obtenous, nous ſerons tres-prompts & preſts de retourner a noſtre Pays natal; Eſtimant eſtre noſtre plus grand bon-heur, de veoir la Verité auec la Paix, eſtablie en ces Royaumes de ſa Majeſté.