L'artenice

L'ARTENICE.

ARGVMENT.

CRISANTE femme de Silene, ne pouuant nourrir d'enfans, Voüa le premier qu'elle auroit à la bonne Deeſſe. Au bout de neuf mois elle accoucha d'vne fille qu'elle nomma Artenice, de qui la parfaicte ſanté fiſt aſſez cognoiſtre que les voeux de ſa mere eſtoient exaucez, & que les Dieux prenoient ſoin de ſa conſeruation. A peine ſçauoit elle parler, que ſon pere luy fiſt promettre mariage à Lucidas, recogneu pour le plus riche Berger du païs; encore qu'il fuſt ſorty d'vn Eſtranger, qui s'y eſtoit venu habituer il y auoit quelques années. A meſure qu'elle croiſſoit ſes parents taſchoient de la nourrir en ceſte affection; mais la bonne Deeſſe, qui ne iugeoit pas que ſe fuſt ſon bien, s'apparoiſſoit fort ſouuent à elle, & luy defendoit de n'en eſpouſer point qui ne fuſt de ſon païs, & de ſa race. Elle en aduertit pluſieurs fois ſa mere Criſante, qui n'en faiſoit point de cas, eſtimant que ſe fuſt vn artifice pour colorer la repugnance qu'elle auoit pour Lucidas: mais Artenice ne recognoiſſant que le ſeul Tiſimandre, qui euſt les qualitez requiſes par la bonne Deeſſe, s'imagina que c'eſtoit celuy qu'elle luy deſignoit pour mary; elle fiſt ſe qu'elle peut pour le rendre amoureux d'elle, mais ce fut inutillement, il ne pouuoit aimer qu'Ydalie, ny Ydalie qu'Alcidor. Ceſte Bergere eſtoit fille d'vn nommé d'Amoclée, chez qui Alcidor (ieune Berger incogneu) auoit eſté nourry depuis l'aage de neuf à dix ans qu'il s'y eſtoit venu retirer; pour ceſte raiſon il l'aimoit comme ſa ſoeur: mais il n auoit de l'amour que pour Artenice: il l'a ſeruoit auec tant de ſoings, & auoit de ſi excellentes qualitez, qu'il ſembloit à ceſte jeune Bergere, que la conqueſte d'vn tel Amant valloit bien la peine de contreuenir à la deffence de la bonne Deeſſe; eſtimant qu'il ne luy pouuoit arriuer de plus grand mal'heur que celuy de ne le poſſeder point. Du commencement elle ſouffroit ſeulement ſa recherche pour le ſeul plaiſir qu'elle prenoit en ſa conuerſation; mais en fin elle ſi engagea de telle ſorte que ſon amour parut aſſez pour donner de la jalouſie à Lucidas, qui pour cét effect, eut recours à vn Magicien ſon ancient amy nommé Poliſtene, il le prie d'employer tous ſes ſecrets pour diuertir Artenice de ceſte nouuelle affection, le conſeil du Magicien fut de luy donner du ſoupçon des familiaritez qui eſtoient entre Alcidor & Ydalie; ce qui luy fut facile en adjouſtant aux apparences exterieures les artifices que ſa magie luy fourniſſoit, ils aduiſent donc enſemble que Lucidas feignant de vouloir rompre l'accord qui eſtoit entre luy & Artenice; taſcheroit à meſme temps de luy faire cognoiſtre la faute qu'elle faiſoit de ſoufftir la recherche d'Alcidor; qu'il eſtoit accordé auec Ydalie, qu'ils faiſoient deſia les actions de femme & de mary, quand ils en auoient la liberié, & qu'il offriroit de luy faire voir dans vn miroir enchanté, ſur la promeſſe que ſon amy Poliſtene luy faiſoit de faire paroiſtre ce qu'il voudroit par le moyen de ſes Demons. Ceſte entrepriſe eſt ſi dextrement conduite, qu'Artenice s'engagea de faire eſpreuue de ce charme, feignant neantmoins que ce n'eſtoit que par curioſité. Elle ſe trouua donc à l'aſignation que luy donna Lucidas, où pendant qu'elle l'attendoit, elle trouua Tiſimandre (deſeſperé de ce que ny ſa fidelité, n'y l'obligation, qu'Ydalie luy venoit d'auoir tout fraiſchement, de l'auoir retirée des mains d'vn Satyre, ne luy auoient de rien profité à radoucir le coeur de ceſte ingrate) elle croit qu'elle ne le pouuoit trouuer plus à propos, pour luy faire changer d'affection, mais elle y reüſſit auſſi mal qu'elle auoit fait par le paſſé: Tiſimandre ne l'a veut point eſcouter, elle deſeſperée de paruenir à ce deſſein, rencontra Lucidas, qui l'a mena en la grotte de Poliſtene, où elle vit dans vn miroir enchanté Alcidor & Ydalie ſe baiſer auec tant de priuautez, quelle creut que ce qu'il luy en auoit dit n'eſtoit que trop veritable. Les deſplaiſirs qu'elle receut à meſme temps du meſpris de Tiſimandre, & de l'infidelité d'Alcidor, l'a firent reſoudre à ſe retirer auec des filles voüées à Diane; & comme elle y alloit elle rencontra (pour augmenter ſon erreur) Alcidor & Ydalie qui gardoient leur troupeaux enſemble, au meſme lieu où le miroir de Poliſtene les luy auoit repreſentez. Alcidor l'a voulut aborder de la meſme ſorte qu'il auoit accouſtumé: mais il y trouua vn grand changement; elle luy reprocha ſa déloyauté, & ſans vouloir entendre ſes juſtifications; luy deffend de l'a voir jamais, cela le met tellement au deſeſpoir, qu'il ſe reſolut de ſe precipiter dans la Seine. Cependant Artenice pour continuer ſon deſſein, ſe retire auec les filles deuotes, où Silene ſon pere, & d'Amoclée ſon oncle, & pere d'Ydalie, l'a vont trouuer pour eſſayer al'en diuertir. Eſtant forcée de leur dire le ſujet de ſon déplaiſir, l'accuſation qu'elle fait cō tre Ydalie, fait reſoudre d'Amoclée de faire paſſer ſa fille par la rigueur de la couſtume du païs. va luy-meſme trouuer le grand Druide Chindonnax, pour ſe rendre teſmoin contr'-elle. Cela n'interrompit que fort peu le deſſein qu'auoit Silene de perſuader à la ſienne de reuenir au monde; elle s'en deffendoit opiniatrement: mais comme ils eſtoient en ceſte diſpute, Cleante arriua tout effrayé du mal'heur d'vn Berger qui par deſeſpoir s'eſtoit precipité dans la riuiere, dont il l'auoit retiré auſſi mort que viuant. Il les prie tous deux de luy venir rendre les derniers deuoirs, ils y vont, & trouuent que c'eſt Alcidor, qui pour le danger qu'il auoit couru, eſtoit en ſi mauuais eſtat, qu'Artenice ne le ſceut voir ſans teſmoigner vne ſenſible douleur. Elle tomba auanoüie entre les bras de ſon pere; qui ne la pouuant ſouſtenir à cauſe de ſon extreme vieilleſſe, ſe laiſſa tomber auec elle. Peu de temps apres Alcidor reprit ſes eſprits, & l'horreur de ce ſpectacle fiſt tant de pitié au bon homme Silene, qu'il ſe reſolut de ne ſe plus oppoſer au mariage de luy & d'Artenice: de ſorte qu'il n'y auoit plus rien à ſurmonter, que les deffences que la bonne Deeſſe luy auoit fait en ſonge. Pendant que cela ſe paſſoit, d'Amoclée continuant ſon deſſein euſt fait ſacrifier ſa fille Ydalie, ſans le retardement que cauſa Tiſimandre en s'offrant de mourir pour elle; cela donna le tēps à Clante d'apporter la nouuelle du mariage d'Alcidor & d'Artenice, qui troubla tellement Lucidas, que ſans y penſer il auoüa la fauſſeté qu'il auoit faite par le moyen du miroir enchanté de Poliſtene, & juſtifia Y dalite par ſa propre bouche. Ceſte derniere obligation qu'elle eut à Tiſimandre l'a toucha plus que pas vne, & l'a fiſt reſoudre à receuoir ſon affectiō. Il ſembloit qu'il n'y auoit plus rien qui s'opoſaſt au contentement des vns & des autres; mais comme Silene alloit au temple accomplir les ceremonies du mariage de ſafille & d'Alcidor, aſſiſté de ſa femme Criſante & de ſon frere d'Amoclée; Criſante creut eſtre obligée de declarer à la compagnie, comme la bonne Deeſſe s'eſtoit apparuë à elle la nuict precedente (& luy auoit dit les meſmes choſes qu'elle auoit dites pluſieurs fois à Artenice) qui eſtoit qu'elle ne vouloit pas qu'elle fuſt mariée qu'à vn qui fuſt de ſon païs & de ſa race: cela fiſt changer le deſſein de la marier à Alcidor; &. d'Amoclée voyant qu'il n'y auoit plus de garcons que le ſeul Tiſimandre du ſang de ſa niepce, eſtima que ce ſeroit vne cruauté de luy oſter pour le donner à ſa fille Ydalie, puis qu'il eſtoit libre de la marier à qui bon luy ſembleroit. Les peres trouuerent donc à propos de changer les mariages & de luy donner Alcidor, & Tiſimandre à Artenice, mais il ſi trouua tant de repugnance qu'il fut impoſſible d'cffectuer cette propoſition. Alcidor & Tiſimandre aimoient mieux quitter le païs que d'en eſpouſer d'autres que celles qu'ils auoient choiſies. Artenice eſtoit tellement deſeſperée des meſpris que Tiſimandre auoit fait de ſon amitié, qu'elle ne pouuoit pas s'imaginer qu'il peuſt jamais changer d'humeur. Et Ydalie eſtoit ſi viuement touchée des obligations qu'elle auoit à Tiſimandre, & des teſmoignages d'affection qu'il luy auoit rendus, qu'elle ne penſoit jamais viure heureuſe auec d'autre qu'auec luy. Comme toutes ces choſes ſe paſſoient, ſuruint le vieil Alcidor, qui recogneut Alcidor pour l'auoir eſleué juſques à laage de neuf ou dixans, depuis qu'il le ſauua de la riuiere, qu'il l'auoit apporté dans ſon berceau en vn débordement arriué il y auoit dix-neufans; ce bon Vieillard fiſt voir vn bracelet qu'il luy auoit pris au bras lors qu'il le retira de l'eau, & ceſte derniere remarque le fiſt recognoiſtre à d'Amoclée pour ſon fils d'Aphnis qu'il auoit perdu en meſme temps, auec ſa maiſon que la Seine auoit ſubmergée: de ſorte que s'eſtant trouué de la race & du païs d'Artenice, les deffences de la bonne Deeſſe furent leuées, rien n'empeſcha plus leur mariage, & d'Amoclée n'eut plus de raiſon de s'opoſer à celuy de Tiſimandre & de ſa fille Ydalie.

LES ACTEVRS.

ARTENICE Bergere. YDALIE Bergere, ALCIDOR Berger. TISIMANDRE Berger. LVCIDAS Berger. CLEANTE Berger. SILENE pere d'Artenice. CRISANTE mere d'Artenice. D'AMOCLEE pere d'Ydalie. POLISTENE Magicien. PHILOTEE Veſtale. CLORISE confidente d'Artenice CHINDONNAX Druide. D'ARAMET l'vn des Sacrificateurs Le Vieil ALCIDOR Le SATYRE.

ACTE PREMIER.

SCENE PREMIERE. ALCIDOR. QVe ceste nuict eſt longue, & faſcheuſe à paſſer! Que de ſortes d'ennuis me viennent traueſſer! Depuis qu'vn bel obiect a ma raiſon bleſſée Inceſſamment ie voy des yeux de ma penſée, Cét aimable Soleil autheur de mon amour, Qui fait qu'inceſſamment ie penſe qu'il ſoit iour. Ie ſaute à bas du lict, ie cours à la feneſtre, I'ouure & hauſſe la veuë, & ne voy rien pareſtre, Que l'ombre de la nuict, dont la noire paſleur Peint les champs & les prez d'vne meſme couleur: Et cette obſcurité, qui tout le monde enſerre, Ouure autant d'yeux au Ciel qu'elle enferme en la terre: Chacun iouït en paix du bien, qu'elle produit, Les coqs ne chantent point, ie n'entens aucun bruit; Sinon quelques Zephirs, qui le long de la plaine Vont cajolant tout bas les Nymphes de la Seine. Maint phantoſme hideux, couuert de corps ſans corps, Viſite en liberté la demeure des morts. Les troupeaux, que la faim a chaſſez des bocages, Apas lents & craintifs entrent dans les gagnages. Les funeſtes oiſeaux, qui ne vont que la nuict, Annoncent aux mortels le malheur qui les ſuit. Les flambeaux eternels, qui font le tour du monde, Percent à longs rayons le noir criſtal de l'onde, Et ſont veuz au trauers ſi luiſans & ſi beaux, Qu'il ſemble que le Ciel ſoit dans le fons des eaux. O nuict, dont la longeur ſemble porter enuie Auſeul contentement, que poſſede ma vie: Retire vn peu tes feux, & permets que le iour Vienne ſur l'horiſon éclairer à ſon tour: A fin que ces beaux yeux pour qui mon coeur ſoupire, Sçachent auant ma mort l'excez de mon martyre. Certes c' eſtoit en vain que j'auois eſperé De poſſeder par toy mon repos deſiré: Mes larmes de mon lict ont fait vne riuiere, I'ay taſché maintefois de fermer la paupiere. Mais, helas! ie voy bien qu'en ce mal nompareil, Lamort la fermer a pluſtoſt que le ſommeil. Tenebreuſe Deeſſe, ingrate à ma priere, Qui te fait ſi long temps retar der ta carriere? Veux-tu par ta longueur aduancer mon trépas? Mais ie la prie en vain, elle ne m'entend pas, Celuy de qui le monde admire les merueilles, La faiſant toute d'yeux, ne luy fiſt point d'oreilles. Et toy, race des Dieux, belle Nymphe du iour, Qui n' es pas inſenſible aux attraits de l'amour, Agreable lumiere, eſpoir de tout le monde, Qui te retient ſi tard dans le ſejour de l'onde? Où ton jeune deſir demeure languiſſant Deſſous les froids baizers de ton vieil impuiſſant, Si de ton beau Chaſſeur le merite & la flame Ont encore pouuoir de captiuer ton ame, Va jouïr en ſes bras de ton ſouuer ain bien, Et ſoul age ton mal en ſoulageant le mien. Depuis le premier iour que ie vis Artenice, Et qu'elle prit engré les voeux de mon ſeruice, Ie n' ay fait en tous lieux que plainde mon tourment, Sans eſpoir de trouuer aucun ſoulagement: Ce recomfort me reſte en ma douleur extréme, Que ie ſçay qu' elle m' aime autant comme ie l'aime Mais que me ſert de voir ſes beaux yeux languiſſans, Témoigner auoir part aux ennuis que ie ſens, Si ie ne puis jouïr du bon-heur que i'eſpere Sans le conſentement des parens & du pere, De qui l'auare faim, qui ne peut s' aſſouuir L'empeſche de m' aimer, & moy de la ſeruir: Ie fay ce que ie puis pour leur eſtre agreable, Mais rien ner' adoucit leur ame impitoyahle. Tout le ſoin que j'y prends ne profite de rien, Leur eſprit aueuglé n'eſtime que le bien: Et veulent ſans raiſon contraindre cette Belle D'en aimer vn plus riche, & de m'eſtre infidelle: Déja leur tyrannie afait tout ſon pouuoir, Afin de m'empeſcher les moyens de l'a voir: Ils éclairent ſes pas en quelque part qu'elle aille, Ils liſent les premiers les lettres qu'on luy baille, Et penſent follement captiuer ſes beaux yeux, Qui pourroient captiuer les hommes & les Dieux. Mais l'amour, qui ſe loge en vn jeune courage, N'eſt pas de ces oyſeaux, que l'on enferme en cage, Elle leur montre bien: car ſi par la rigeur Ils poſſedent ſon corps, ie poſſede ſon coeur. Mais le iour n'eſt pas loing, les ombres s'eſclairciſſent, Déja d'eſtonnement les Eſtoilles palliſſent, Et déja les oyſeaux joyeux de ſon retour, Commencent dans les bois à ſe parler d'amour. Afin de ne point perdre vn temps ſi fauorable, Ie vay faire ſortir mes brebis de l'eſtable.

ACTE PREMIER. SCENE SECONDE.

LVCIDAS. POLISTENE.

LVCIDAS. Sous quel aſtre funeſte, ô Deſtins rigoureux! Ourdiſſez-vous le fil de mes ans malheureux? Ie voy tous mes deſſeins d'eux-meſmes ſe détruire, Et ſemble que le Ciel ne ſe plaiſt qu' à me nuire. I' atmois dés mon enfance vne ieune beauté, A qui rien ne manquoit que la fidelité; De toutes les vertus, de qui les deſtinées Ornent auecques ſoing les ames les mieux nées. Chacun prenoit plaiſir à voir de iour en iour Augmenter à la fois noſtre aage & noſtre amour: Et la jalouze enuie eſtoit meſme contrainte De benir le progrez d'vne amitié ſi ſaincte, Qui bornoit ſes deſirs aux amoureux apas, Où ſes ans & les miens nous menoient pas à pas: Mais lors que i'eſperois voir l'heureuſe iournée, Qui deuoit de nos veux accomplir l'Hymenée, L'iniuſtice du ſort, qui preſide à mes iours, Luy fit tourner ailleurs l'eſpoir de ſes amours, Et donner cette foy, qu'elle m'auoit promiſe, Au Berger Alcidor, dont ſon ame eſt épriſe: Ce ieune homme tout ſeulla poſſede auiourd'huy, Elle n'a plus d'attrais pour d'autre que pour luy; Qui l'en veut diuertir perd ſon temps & ſa peine, Cela paſſe l'effect de la puiſſance humaine, Il me faut au beſoin les Demons pratiquer, Que l'art de Poliſtene àpouuoir d'éuoquer. Ce pendant que le iour qu'on voit naiſtre dans l'onde, Ne chaſſe point encor les tenebres du monde, Ie vay ſous leur faueur implorer ce vieillard, De me vouloir aider des ſecrets de ſon art. De tout temps ſa franchiſe a chery mon enfance, Auſsi toſt que du iour i'en eus la cognoiſſance: Il me témoignera l'effect de ſa bonté, S'il en à le pouuoir comme la volonté. Ie croy que le voyla, qui tout ſeul ſe promeine, Vn liure dans ſa main, au long de cette plaine. Il le faut aborder, pour voir ſi mon tourment Peut eſperer de luy quelque ſoulagement. Pere dont la ſcience, en prodiges feconde, D'horreur & de merueille étonne tout le monde: Si noſtre affection qui naſquit auec moy, Vous peut rendre ſenſible au mal que ie reçoy; Ou ſivous voulez faire vn oeuure memorable, Et vous monſtrer ſçauant autant que charitable, Gueriſſezles ennuis d'vn pauure Amant jaloux, Qui n'attend ſon repos que du Ciel ou de vous? I'ayme dés le berceau la Bergere Artenice, De qui l'eſprit leger, mépriſant mon ſeruice, Au lieu de prendre exemple à ma fidelité, M'a ſi legerement pour vn autre quitté, Qu'il ſemble que ſa flame, en cette amour nouuelle, Ne cherche autre raiſon que de m'eſtre infidelle. POLISTENE. Monſils, i'aurois de l'heur, ſi mon affection Vous pouuoit ſecourir en voſtre affliction. Ie ſçay combien l'Amour trouble vn ieune courage, Les tourmeuts, que i'ay plains au plus beau de mon âge En ſuiuant ces plaiſirs, de pleurs accompagnez, Me font auoir pitié de ceux que vous plaignez. Si la part, que ie prends, au mal qui vous poſſede Y pouuoit tenir lieu d'vn vtile remede, Cette ame, qui ſans fard vous a touſiours chery, Seroit le ſeul Demon, dont vous ſeriezguery. Mais, certes c'eſt en vain, qu' on a recours aux charmes Pour éteindre les feux, & ſe parer des armes De ce Dieu ſi petit, & ſigrand en tous lieux, "Le pouuoir des Demons ne peut rien ſur les Dieux. Il faudroit eſſayer, par quelque jalouſie, De guerir ſa raiſon de cette fanta ſie: Peut eſtre cet eſprit qui ſe tourne àtout vent, Vous aymeroit alors autant qu' auparauant. Mon fils, voſtre riual n'en n'ayme-t' il point d'autre, Que celle, où ſon amour a trauerſé la voſtre? LVCIDAS. Nenny, mais ie ſcay bien qu'il doit voir auiourd'huy Vne ieune beauté qui meurt d'amour pour luy. POLISTENE. L'occaſion pour vous ne peut eſtre meilleure, Pourueu que vous pui ſsiez vous aſſéurer de l'heure. LVCIDAS. C'est vers le haut du iour qui ſe doiuent trouuer. POLISTENE. Il me faut leur deux noms dans vn cerne grauer, Pour rendre detous points ma figure accomplie. LVCIDAS. L'homme c'eſt Alcidor, & la fille Ydalie. POLISTENE. Mon fils tout ira bien, pourueu que promptement Vous voyez Artenice, & qu'auec iugement Vous taſchiez de l'a mettre en telle defiance, Que ſon eſprit troublé recoure à ma ſcience, Ie puis dans les objects d'vn criſtal enchanté D'vn menſonge aparent maſquer la verité, Gouuernez-vous y donc auecque modeſtie Vous verrez ſon amour en rage conuertie. LVCIDAS. I'y vay tout de ce pas: attendez vn moment, Monretour de bien peu ſuiura mon partement. Soit que ie puiſſe ou non amener ma cruelle, Dedans vne heure ou plus vous en aurez nounelle.

ACTE PREMIER. SCENE TROISIESME.

ARTENICE. SILENE, ſon pere.

ARTENICE. HOnneur, cruel tyran des belles paſsions, Qui tr auerſe l'eſpoir de nos affections; De combien de malheurs eſt la terre feconde Depuis que ton erreur empoiſonne le monde? Ce Dieu dont les amants reuerent le pouuoir, Ne recognoiſſoit point l'empire du deuoir; Ce fut toy qui premier fiſt gliſſer en noſtre ame, Ces folles viſions de la honte & du blaſme: Qui premier nous aprint à taire nos de ſirs, Qui premier nous aprint à cacher nos plaiſirs; Et dont latyr annie, aux amants trop cruelle, S'oppoſa la premiere à la loy naturelle. Petits oyſeaux des bois, que vous eſtes heureux, De plaindre librement vos tourments amoureux: Les valons, les rochers, les foreſts, & les plaines, Sçauent également vos plaintes & vos peines; Voſtre innocente amour ne fuit point la clarté, Tout le monde eſt pour vous vn lieu de liberté. Mais ce cruel honneur, ce fleau de noſtre vie, Sous de ſi dures loix l'a retient aſſeruie, Qu'au plus fort des ennuis, que ie ſouffre en aimant, I'ay honte de le dire aux rochers ſeulement. Il eſt vray, ie reſſens vne ſecrette flame, Qui malgré ma raiſon s'allume dans moname Depuis le iour fatal, que ie vis ſous l'ormeau▪ Alcidor, qui dançoit au ſon du chalumeau: Lagrace qu'il auoit, me pleut de telle ſorte, Qu' à tous autres obiects mon coeur ferma la porte: Dés l'heure ſourdement ie taſchay de ſçauoir Les lieux les plus frequents, où l'on le vouloit voir: On me diſt que c'eſtoit où les flots de la Seine Vont arrouzant le pied des cousteaux de Surene. Et dés le l'endemain, en mes plus beaux habits, Au ſsi toſt qu'il fut iour i'y mené mes brebis: A peine la premiere entroit en ces herbages, Où ces fertiles monts étendent leurs ombrages; Que i'entendis de loing ſa muſette & ſa voix, Qui troubloit doucement le ſilence des bois: Lors tous mes ſens rauis de ces douces merueilles, Mes yeux portent enuie à l'heur de mes or eilles: Ie paſſay tout le front par deſſus vn buiſſon, Du coſté d'où venoit cet agreable ſon, De quel aimable trait fut mon ame bleſſée; Quelle timide ioye entre dans ma penſée, Lors que i'en vis l'autheur, ſous vne cheſne écarté, Qui rempliſſoit le lieu de ſa propre clarté? Tel eſtoit Apollon au ſeruice d'Acmette, Alors que de ſa lyre il fiſt vne muzette; Quand ie vis de plus prez les aimables apas, Feignant de me cacher, ie redouble le pas: Mais touſiours deſſus luy i'eu la veuë attachée, Pour voir s'il me verroit auant qu' eſtre cachée. Il vint droit cù i'eſtois, ils' approche de moy, Ei me vouloir dés lors aſſeurer de ſa foy: Ces yeux, qui de my morts, dans les miens ſe mirerent, Bien mieux que ſes diſcours, de ſa foy m' aſſeurerent: Alors le coeur ioyeux d'vn ſi riche butin, Ie rend grace tout bas à mon heureux deſtin: Et quand ce ieune Amant, apres quelque ſilence, Eut laſché maints ſouſpirs auecques violence, Qui comme priſonniers ſortans tous à la fois, Ouurir ent le chemin à ſa timide voix. Ne pouuant plus celer ce qu'il auoit dans l'ame, Me declara l'ardeur de ſa nouuelle flame: Maint Zephirs amoureux, dans les fueilles cachez, Furent à ce diſcours par l'oreille attachez, Et la Nymphe de Seine, en ſa couche profonde, Fiſt ceſſer pour l'ouïr le murmure de l'onde. Ie ne ſçaurois choi ſir vn plus parfait Berger, Tout le mal que i'y trouue, eſt qu'il eſt eſtranger: Et la bonne Deeſſe, à qui dés ma naiſſance Mes parents ont remis le ſoing de mon enfance, M'apparoiſt en dormant preſques toutes les nuicts, Et menace mes iours d'incurables ennuis, Si i'en reçois iamais au lict de mariage, Qui ne ſoit de marace, & de mon voiſinage, Ie ne ſç ay tantoſt plus à qui ie dois penſer, Cela me trouble toute, il le faut confeſſer. En vain pour ce ſuiet ie m'efforce de prendre Aux apas de l'amour le Berger Tiſimandre: Berger au ſsi parfait, comme il eſt malheureux, D'eſtre depuis cinq ans d'vne ingrate amoureux, Qui n'eſt pas moins conſtante à mépriſer ſa peine, Qu'eſt ſon ame aueuglée en ſa pour ſuite vaine. Mais quoy? le iour s' augmente, & dérobe à nos yeux, Les roſes, dont l'Aurore auoit ſemé les Cieux. Il eſt temps de partir, tout ce que i'apprehende, Eſt qu'au cry des aigneux mon pere ne m'entende, S'ilvient à s'éueiller: ie crains que d'auiourd'huy Ie ne puiſſe aizément me défaire de luy. Sa mefiante humeur de iour en iour s' augmente, Mon Dieu qu'il eſt faſcheux, que cela me tourmente! Ie penſe que ie l'oy. SILENE. Ma fille, à qu'elle fin, Voulez-vous auiourd'huy vous leuer ſi matin? Le Soleil n'a pas beu l'égail de ſa prairie, Cela mettra le mal en voſtre bergerie. ARTENICE. Noſtre chien qui reſuant de moment en moment, Au loup, que ſon penſer luy forgeoit en dormant, D'vnveritable loup m'a fait naiſtre la crainte. SILENE. L'inutile ſoucy, dont voſtre ame eſt attainte, Ne m'eſt que trop cogneu, ie ne puis l'ignorer, Et c'eſt ce qui me fait iour & nuict ſouſpirer. Ieſçay ce qui vous met la puce dans l'oreille, Ie vis hier icy le loup, qui vous réueille: Mais ſi toſt qu'il me vit il rebrouſſa ſes pas, Faſché d'auoir trouué ce qu'il ne cherchoit pas. Il ne faut point pour luy ny rougir ny ſouſrire. ARTENICE. Ie ne puis deuiner ce que vous-voulez dire? SILENE. A quoy vous ſert cela de le diſsimuler? Vous ſçauez bien celuy de qui ie veux parler, Ne me le celez plus, i'ay découuert la mine, Ce n'eſt pas auec moy qu'il faut faire la fine. Ie ſçay que vous aimez celuy qui l'autre iour Menoit le premier branſle en noſtre carrefour, Et ſouffrez ſans mon ſceu l'affection ſecrette, D'vn Berger incogneu, qui n'a que la houlette. Il eſt vray que ſa grace eſt ſi plaine d'attrais, Qu'il n'eſt point de beautez, qui n'en ſentent les traits: Soit qu'il dāſe, ou qu'il chāte, enſes moindres merueilles Il arreſte ſur luy nos yeux & nos oreilles. Mais ces icunes Bergers, ſi beaux & ſi cheris Sont meilleurs pour amants, qu'ils ne ſont pour maris, Ils n'ont aucun arreſt, ce ſont eſprits volages, Qui ſouuent ſont tous gris auant que d'eſtre ſages; Et doit-on ſouhaiter pour leur vtilité, De voir finir leur vie auecques leur beauté: Semblables à ces fleurs, dont Venus ſe couronne, De qui iamais les fruicts n'en richiſſent l'Automne: Oubliez, oublez l'amour de ce Berger, Et prenez en ſon lieu quelque bon ménager, De qui la façon maſle à vos yeux moins gentille Témoigne vneſprit meur à regir ſa famille: Et dont la main robuſte au meſtier de Cerés Faſſe ployer le ſoc en fendant les guerets. Vous eſtes grande aſſez, vous deuriez eſtre ſage, Et pluſtoſt proietter quelque bon mariage, Que de vous amuſer à ces folles amours. ARTENICE. Mon pere, à quelle fin tendent tous ces diſcours? Si ie hante Alcidor, en dois-ie eſtre blaſmée, Ce n'eſt ny pour l'aimer ny pour en eſtre aimée? Ie n'ay point fait deſſein d'en faire mon eſpoux, Ie ne veux po nt au • ir d'au • re mary que vous, Tandis que vous aurez mon ſeruice agreable, Ce me ſera, monpere, vn bien ineſtimable, De meurir auec vous la fleur de monprintemps Auant que d'en partir. SILENE. C'eſt comme ie l'entends, Et certes le ſeul bien à quoy ie veux pretendre, Eſt qu'auant mon treſpas vous me donniez vn gendre, Do • t le b • n natur el me venant à propos, Me donne le moyen de mourir en repos. Ie n'aur ay plus regret de luy quitter la place, Quand ie verr ay mon ſang reu • ure en voſtre race: Ie croy que Lucidas ſeroit bien voſtre fait, La fortune luy rit, tout luy vient à ſouhait: De vingt paire de boeufs il ſeillonne la plaine, Tous les iours ſes a • queſts augmentent ſon domaine; Dans les champs d'alentour on ne void auiourd'huy Que cheures & brebis, qui ſortent de chez luy: Sa maiſon ſe fait voir par deſſus le village, Comme fait vn grand cheſne au deſſus d'vn boccage; Et ſçay que de tous temps ſon inclination Nous a donné ſes voeux, & ſon affection. Mais le voicy qui vient au long de ceſte roche, Ie m'en vay vous quitter auant qu'il ſoit plus proche: Bien qu' Amour ſoit enfant, c'eſt vn enfant diſcret, Qui n'oſeroit parler s'il ne parle en ſecret.

ACTE PREMIER. SCENE QVATRIESME

LVCIDAS. ARTENICE.

LVCIDAS. AGreable ſuiet de mes inquietudes, Apres tant de meſpris, & tant d'ingratitudes, Puis qu' à la fin mon coeur vomiſſant ſon poinſon, Au lieu de ſon treſpas trouue ſa gueriſon; Bien que vous me quittiez pour en aimer vn autre, Sçachez que ie plains moins mon malheur que le voſtre, Et que le ſeul dépit, dont ie ſuis enflamé, Eſt de voir mépriſer ce que i' ay tant aimé: Quand voſtre Amant nouueau pour comble de folie, Prefere à vos beautez les beautez d'Ydalie. ARTENICE. Autant que voſtre eſpoir eut de preſumption, Quand il creut auoir part à mon affection, Autant voſtre creance est iniuſte & cruelle, Lors que vous m'accuſez de vous eſtre infidelle: Ce que i'engage ailleurs ne fut iamais à vous, Vous n'en deuez point eſtre amoureux & jalous, Maperte vous aporte auſsi peu de dommage Qu' à moy le changement de ce Berger volage, Et certes ſans raiſon vous m'en parlezainſi, Cela ne mettra point mon eſprit en ſoucy. LVCIDAS. Ien'ay point ce deſſein, la choſe eſt aſſeurêe Par la foy qu'ils ſe ſont l'vn à l'autre iurée. ARTENICE. Qu'ils facent à leur gré ie ny demanderien, Ie ne regrette point ce qui n'eſtoit point mien: Le Ciel rende a leurs voeux la fortune proſpere, Ie quitte de bon coeur la part que i'en eſpere. Mais comment, Lucidas, ſe ſeroient-ils promis Sans le conſentement de parens ny d'amis? LVCIDAS. Ils ont fait & bien pis, c'eſt choſe trop certaine, Que ſouuent dans vn bois ſur la riue de Seine Ils ioüiſſent de'ja des plus ſecrets plaiſirs, Dont Hymen aſſouuit les amoureux deſirs: Ie ſçaybien le moyen d'en ſçauoir des nouuelles. Ie cognois vn deuin de mes amis fidelles, Qui me doit faire voir, par ſes enchantemens Toutes les priuautez de ces ieunes Amans: I'eſpere auant midy envoir faire l'eſpreuue. ASTENICE. A quelle heure, Berger, eſt-ce que l'on le treuue? LVCIDAS. Si vous le voulez voir, il faut prendre le temps Que ces ieunes Bergers rendent leur voeux contens: C'eſt vers le haut du iour, lors que de ces campagnes L'ombrage eſt retiré iuſqu'au pied des montagnes, Quand le Soleil eſt preſqu'au milieu de ſon cours. ARTENICE. Ien'ay point d'intereſt à leurs folles amours: Mais ie prendray plaiſir à voir l'experience Des effects merueilleux que produit ſa ſcience, LVCIDAS. Trouuez-vous donc tantoſt ſur le bord de cette eau, Et conduiſez vos pas deuers vn vieux chaſteau, Maintenant des Lutins l'effroyable demeure, C'eſt où ie me promets de vous voir en vne heure. Là ſous vn cheſne creux, de fourmis habité, Dont la ſeule groſſeur monſtre l'antiquité, Se void dans vn rocher ſur lariue où nous ſommes, Vn antre plus hanté des Demons que des hommes, Qu'vne viorne épaiſſe encloſt tout à l'entour, C'eſt de ce vieux Deuin l'ordinaire ſeiour. Cette belle trompeuſe en fin ſera trompéc, Ie la verray bien toſt dans le piege attrapée, Et verray cet eſprit, qui fait tant le ruzé, Vomir bien toſt le feu dont il eſt embrazé. Ie m'en vay cependant tout le long de la Seine Par vn autre chemin retrouuer Poliſtene, Afin de l'aduertir d'appreſter promptement La glace deſtinée à ſon enchantement: Il eſt vray ie commets vne grande malice, Mais ce n'eſt pas moy ſeul, le Ciel dont l'artifice Couure de tants d'apas tant d'infidelité, Eſt le premier autheur de ma méchanceté.

ACTE SECOND.

SCENE PREMIERE. LE SATYRE. D'Où me vient hors de temps cette boüill ante rage, Quelle nouuelle ardeur s' allume en mon courage? Ie ne fais iour & nuict, ny veill ant ny dormant Que ſouſpirer le mal que ie ſouffre en aymant, Depuis que les attraits de la belle Ydalie Ont fait naiſtre en mon coeur cette douce folie. Pour quoy mon vain eſpoir viens tu m'entretenir D'vn bien où mes trauaux ne ſçauroient paruenir? O Dieu, qui ſous tes loix tiens mon ame aſſeruie Donne m'en le merite, ou m'en oſte l'enuie! Elle n'a point d'égard à l'excez de ma foy, Si toſt qu'elle me voit elle s' enfuit de moy, Pour aimer vn mignon de qui le beau viſage Empruntant de l'Amour le pouuoir & l'image A de plus doux apas, & plus ſelon ſes voeux Que ces membres pelus, robuſtes & nerueux. Plus ie luy fay de bien, plus elle m'eſt cruelle Ie ne cucille des fleurs ny des fruicts que pour elle. Lors que de ſon logis elle ſort au matin Ie paue ſon chemin de lauande & de tin: Sous l'habit d'vn Berger ſouuent ie me déguiſe I'arrache mes ſourcils, ie me farde & me friſe Mais tout ce que ie fais ne me profite rien: Peut estre ſon deſir s' accorderoit au mien Si deſſous les efforts de ma flame incenſée Sa pudeur pouuoit dire auoir eſté forcée. Ie ſçay que le matin elle ne manque pas De prendre dans les eaux conſeil de ſes appas, A fin qu'vn élement au ſsi per fide qu'elle Luy monstre à me dreſſer quelque embuche nouuelle: Dans ce buiſſon eſpais loing du monde & du iour Ie m'en vay me cacher pour l'a prendre auretour.

ACTE SECOND. SCENE SECONDE.

YDALIE. TISIMANDRE. LE SATYRE.

YDALIE. AGreables deſerts, bois, fleuues & fontaines, Qui ſçauez de l'amour les plaiſirs & les peines, Eſt-il quelque mortel eſc laue de ſa Loy Qui ſe pleigne de luy plus iuſtement que moy? Ie n'auois pas douze ans quand la premiere flame Des beaux yeux d'Alcidor s' alluma dans mon ame. Il me paſſoit d'vn an, & de ſes petits bras Cuilloit de ſia des fruicts dans les branches d'embas. L'amour qu' à ce Berger ie portois dés l'enfance, Creut inſenſiblement ſa douce violence; Et iuſques à tel point s' augmenta dans mon coeur Qu' à la fin de la place il ſe rendit vainqueur. Deſlors ie prins vn ſoin plus grand qu' à l'ordinaire De le voir plus ſouuent, & taſcher à luy plaire; Mais ignorant le feu, qui depuis me bruſla, Ie ne pouuois iuger d'où me venoit cela Soit que dans la prairie il viſt ſes brebis paiſtre Soit que ſa bonne grace au bal le fiſt paroiſtre, Ou ſoit que dans le Temple il fiſt priere aux Dieux Ie le ſuiuois par tout de l'eſprit & des yeux A cauſe de mon âge & de mon innocence Ie le voyois alors auec plus de licence, Et ſouuent tous deux ſeuls libres de tout ſoupçon Nous paſsions tout le iour à l'ombre d'vn buiſſon: Il m' appelloit ſa ſoeur ie l'appellois monfrere, Nous mangions meſme pain au logis de mon pere; Cependant qu'ily fut nous veſcumes ainſi, Tout ce que ie voulois il le vouloit auſsi. Il m'ouuroit ſes penſers iuſqu'au fonds de ſon ame, De baiſers innocents il nourriſſoit ma flame: Mais dans ces priuautez, dont l'Amour ſe maſquoit, Ie me doutois touſiours de celle qui manquoit, Et combien que deſia l'amoureuſe manie M' augmentaſt le plaiſir d'eſtre en ſa companie; Ie gouſtois neantmoins auec moins de douceur Ces noms reſpectueux de parente & de ſoeur. Combien de fois alors ay-ie dit en moy-meſme, Ayant les yeux baiſſez & le viſage bleſme; Beau chef-d'oeuure des Cieux, agreable Paſteur, Qui du mal que ie ſens eſtes le ſeul autheur, Auec moins de reſpect ſoyez moy fauorable, Ne ſoyez point mon frere, ou ſoyez moins aimable. Mais quoy? cet aueuglé ne me regarde pas, Et quelque fois ſongeant aux aymables apas, Dont vne autre Bergere a ſon ame bleſſée Me contraint de conter ſon amour inſenſée. A l'heure mes douleurs perdent tout recomfort Comme ſi i' entendois ma ſentence de mort. Si la ciuilité m' oblige à luy reſpondre Ie ſens au premier mot mon diſcours ſe confondre, Ie ne ſçay que luy dire, & mon eſprit troublé, Teſmoigne aſſez l'ennuy dont il eſt accablé. Apres cet entretien, ſi la nuict nous ſepare I' apprehende le mal que le lict me prepare, Alors que mes penſers de mon aiſe enuieux Deffendent au ſommeil d'approcher de mes yeux: Il eſt vray qu' au matin aucune fois les ſonges Me deçoiuent les ſens par de ſi doux menſonges, Qu' encore que ie deuſſe éuiter ſes attraits, Ie ne puis m' empeſcher d'y repenſer apres; Ce qui fait que ma peine encore plus griefue Eſt que te perds l'eſpoir d'y voir iamais de treue. Cét aimable Berger eſt pris en des liens, Qu'il ne quitter a pas pour s' enchaiſner aux miens: Le Ciel meſme benit leur amoureuſe flame, La Bergere Artenice a captiué ſon ame, Et comme à la plus belle a choiſi iuſtement Le plus beau des Bergers pour eſtre ſon Amant. Moy ie ſuis cependant reduitte à me deffendre Des importunitez du facheux Tiſimandre, Qui tout le long du iour malgré tous mes efforts Ne me quitte non plus que l'ombre fait le corps, Ie penſe que voila ce pauure temeraire, Qui rumine tout ſeul ſa folie ordinaire: Il ne faut dire mot, s'il entendoit ma voix Il me viendroit chercher iuſqu'au fond de ces bois.

CHANSON DE TISIMANDRE. DONC apres de tant maux ſoufferts Il faudra mourir dans les fers, Où les yeux d'vne ingrate ont mon ame aſſeruie, Ie n'en puis eſchapper On ne les peut coupper Qu'on ne couppe auec eux le fillet de ma vie. Heureux ſi ma longue amitié L'eſmouuoit alors à pitié Et que lle euſt quelque part en ma douleur profonde: Pour le moins en ma mort I'aurois ce recomfort Que ie ſerois pleuré des plus beaux yeux du monde. YDALIE. O Dieux! il vient icy, que luy pourray-ie dire? TISIMANDRE. Adorable beaute que tout le monde admire, Voulez vous de ces bois les tenebres chaſſer, Que le iour ſeulement n'a iamais ſceu perſer? Quel miracle de voir en ce lieu triſte & ſombre Vne Deeſſe en terre, & le Soleil à l'ombre, Qui vous mene en ces lieux ſolitaires & doux? YDALIE. Rien que le ſeul deſir de meſloigner de vous. TISIMANDRE. C'eſt bien fait de fuir l'abord d'vn miſerable. YDALIE. Celuy d'vn importun eſt bien moins agreable. TISIMANDRE. Nommez vous mon ſeruice vne importunité? YDALIE. Me voulez-vous aimer contre ma volonté? TISIMANDRE. N'auez-vous point pitié d'vn coeur qui s'humilie? YDALIE. Si i'ay pitié de vous, c'eſt de voſtre folie: TISIMANDRE. Eſt-ce là le loyer de mon affection? YDALIE. C'eſt trop long temps ſouffrir la perſecution: St vous ne me laiſſez il faut que ie vous laiſſe. TISIMANDRE. O cruauté du ſort, qui n'as iamais de ceſſe! A quelle nuict d'ennuis me dois-ie preparer, Puis que ce beau ſoleil ne veut plus m'éclairer? YDALIE. Que i'ay le coeur ioyeux de ce qu'il m'a quittée, Dieux! qu'il eſt mal plaiſant, que i'en ſuis tourmentée, Ie ne ſçay tantoſt plus où ie me dois cacher, Tant il eſt importun à me venir cehrcher; Ce qui me déplaiſoit en ſa per ſeuerance, Et ce qui me donnoit autant d'impatience, Est le deſir que i'ay d'aller voir auiourd'huy Le Berger Alcidor, que i'ayme mieux que luy: Il le faut aduoüer, bien que ceſte belle ame Soit eſclaue d'vne autre, & mépriſe ma flame, Sagrace naturelle eſt ſi plaine d'apas, Qu'il faut que ma raiſon mette les armes bas. I'ay long temps diſputé ſi ie luy deuois dire L'amoureuſe douleur dont mon ame ſouſpire: Mais puis que de la ſienne il m'importune tant, Ie croy que ſans rougir i'en puis bien faire autant. LE SATYRE. En fin ie ioüiray de celle que i'adore La voicy que'elle vient plus belle que l'Aurore: I'ay vaincu ces vainqueurs, qui ſouloient me brauer, Ie vous tiens, ie vous tiens, rien ne vous peut ſauuer. YDALIE. Quoy? méchant prenez vous les filles de la ſorte? A l'aide mes amis, à l'aide ie ſuis morte? LE SATYRE. Vous ne ſçauriez mourir d'vne plus douce mort. TISIMANDRE. Vilain arreſtez-vous, quel furieux tranſport, Vous a fait profaner le corail de ces leures. Allez bouquin puant faire l'amour aux cheures. Cher obiect de mes voeux, beaux aſtres inhumains, Comme eſtes vous tombée en ces barbares mains? Ces roſes & ces lis où la beauté ſe mire Ne ſont point deſtinez à l'amour d'vn Satyre. Le Ciel qui de ſon oeuure eſt luy-meſme amoureux Reſerue à leur merite vn deſtin plus heureux: C'eſt le iuſte loyer d'vn ſeruiteur fidelle, Qui depuis cinq moiſſons, plein d'amour & de zèle Surmontant la tempeſte & les vens ennemis Eſt demeuré conſtant en ce qu'il a promis. YDALIE. Ie vous entends venir, il ne faut plus vous feindre, Vous parlez de vous-meſme, & me voulez contraindre. D'acc order à vos voeux par obligation Ce que l'on n'a de moy que par affection: Ie ne vous puis aimer quoy que vous puiſsiez dire, Remettez moy pluſtoſt és mains de ce Satyre; Quand ie ſerois contrainte de l'auoir pour eſpoux I'en aurois moins d'horreur que ie n'aur ois de vous. TISIMANDRE. Eſt-ce là le loyer de vous auoir ſauuée De ce monſtre hydeux qui vous euſt enleuée? O Dieux! elle s'en va ſans vouloir m'eſcouter Mes raiſons ny mes pleurs ne ſçauroient l'arreſter: De qu'elle folle amour eſt mon ame enflammée? De quel enchantement eſt ma raiſon charmée? Que de tant de beautez que la Seine produit Mon coeur ne faſſe choix que d'vne qui me fuit? Si ie voulois aimer la Bergere Artenice, Elle ſatisferoit aux voeux de mon ſeruice: Ses attraits ſont puiſſans, il n'eſt coeur de rocher, Qui de ſa douce humeur ne ſe laiſſe toucher. Ie ne voy que Bergers, qui ſouſpirent pour elle Et tous, excepté moy, latreuuent la plus belle, Mais ie croy que mes yeux ſont complices du ſort, Qui malgré ma raiſon a conſpiré ma mort. Cette ieune beauté que i'ay tant meſpriſée, Ne ſe refroidit point pour ſe voir refuſée, Et me té moigne aſſez l'amour qu'elle a pour moy, Par le ſoin qu'elle prend de m'attirer àſoy: Certes i'en ſuis honteux, & ne ſçay que luy dire Quand ſon taint quirougit, & ſon coeur qui ſouſpire, En s'approchant de moy me diſent ſans parler Le mal que le reſpect luy contraint de celer: Ie croy que l'a voila toute triſte & penſiue, Qui va cueillant des fleurs le long de cetteriue.

ACTE SECOND. SCENE TROISIEME.

ARTENICE. TISIMANDRE.

ARTENICE. QVe Lucidas eſt long! qu'en ce retardement, La crainte & le de ſir me donnent de tourment! Voicy l'heure & la place où ie le dois attendre, Cette vieille mazure est où ie me dois rendre: Dans cet antre remply de triſteſſe & d'horreur Eſt où ma paſsion doit finir ſon erreur. Ie ſens l'impatience en mon ame s'accroiſtre De cognoiſtre le mal que i'ay peur de cognoiſtre, Qui me fait ſans beſoin découurir vn peché, Qui ne m'offençoit point lors qu'il m'eſtoit caché. Sous les plaiſirs d'Amour ſouuent la jalouſie Apres s'eſtre couuée en noſtre fantaſie, Par noſtre propre faute écloſt de grands malheurs, De meſme qu'vn ſerpent endormy ſous des fleurs. O Dieux! qui ſçauez tout, en quelle inquietude Demeure mon eſprit en cette incertitude: Qu'vn quart d'heure à paſſer me donne de ſoucy? TISIMANDRE. Elle ne me voit pas elle viendroit icy. ARTENICE. • n'en faut plus parler la pierre en eſt iettée. TISIMANDRE. Quelque choſe l'a faſche: elle eſt inquietée. ARTENICE. Mais ne cognois ie point ce Berger arreſté, Que • ' entre voy de loing dedans l'obſcurité? 〈…〉 as! c'eſt Tiſimandre! il monſtre à ſon viſage 〈…〉 vn ſanglant deſeſpoir luy ronge le courage. 〈…〉 aut aborder; peut-eſtre qu'à preſent Q •• l reſſent dans ſon ame vn déplaiſir cuiſant D'auoir de ſes trauaux ſipeu de recompence •• ſ • ra plus aiſé d'ébranſler ſa conſtance. Puis que deſſus la Seine il ne reſte auiourd'huy Du ſang de mes ayeuls aucun homme que luy, En luy ſaiſant changer cette amour obſtinée, I' accordereis la mienne auec ma deſtinée. Berger que dites vous? quel tourment exceſsif Vous rend le • eint ſi paſle & l'eſprit ſi penſif? N'oublirez vous iamais cette Nymphe cruelle, Qui ſe rit des ennuis que vous ſouffrez pour elle? On ne peut à b • n droit eſtimer bon nocher Celuy qui tous les iours heurte vn meſme rocher. Gueriſſez voſtre eſprit, remettez-le en vous-meſme Fuyez ce qui vous fuit, aimez ce qui vous aime: Celuy certes Berger eſt digne de mourir Qui void ſa gueriſon & ne veut point guerir. TISIMANDRE. Il eſt vray que mon mal tout autre mal excede De n'eſtre pas gnery par vn ſi beau remede, Ie ſuis bien en cela dépourueu de conſeil De vouloir preferer vne Eſtoille au Soleil: Ie ſçay voſtre merite, & ſçay que ma cruelle Ne doit qu'à mon malheur le choix que i'ay fait d'elle. ARTENICE. Comme auez vous fait choix de cét eſprit ruſé, Qui d'vn autre Berger à le coeur emhraſe? TISIMANDRE. Quoy le feu de quelqu'autre à t'il peu trouuer place Dans ce coeur qui pour moy n'eſt que roche & que glace? ARTENICE. Eſtes vous ſi nouueau que de ne ſçauoir pas Que c'eſt pour Alcidor qu'elle tend ſes apas? TISIMANDRE. Combien que ce Berger ſoit touſiours auec elle, Ie ſçay que leur amour n'eſt qu'amour fraternelle, Et n'y ſçaurois encor aucun mal conceuoir. ARTENICE. Bien toſt la verité vous fera tout ſçauoir: Deuant que le Soleil ſe recache dans l'onde Leur feu ſer a viſible aux yeux de tout le monde: Oubliez, oubliez, cette ingrate beauté, Vous trouuerez ailleurs plus de facilité. Deffendez à vos voeux c ette perſeuer ance Perdez en le de ſir auec ques l'eſper ance. TISIMANDRE. Ce conſeil ſeroit bon à quelqu' autre qu' à moy, Qui • ust encore libre & maiſtre de ſa foy: ARTENICE. Bien que pour ſon amour vous l'ayez deſtinée N'en estant point receuë elle n' est point donnée, Elle eſt encor à vous pour en diſpoſer mieux. TISIMANDRE. Helas! il faudroit donc que i'euſſe d'autres yeux; Car ces beautez aux miens y ſont comme les voſtres. Sont aux riues de Seine aux yeux de tous les autres: Il faut bien qu' à preſent mon coeur ſoit hors de ſoy, De n'eſtre point touché des charmes que ie voy. Voſtre beauté n'eſt point pour eſtre meſpriſée. ARTENICE. Ny voſtre affection pour eſtre refuſée. TISIMANDRE. Ie ne ſcay de quels yeux ie puis voir vos attraits, Et ne point r • ſſentir leurs flames & leurs traits? ARTENICE. Ie ne ſçay de quels yeux on peut voir vos ſeruices, Et n'eſtre point ſenſible à tant de bons of fices. TISIMANDRE. Vous attirez les coeurs auec vn tel aimant, Que qui n'a point a'amour n'a point de ſentiment. ARTENICE. Vous aimez & ſeruez auec telle conſtance, Que qui n'a point d'amour n'a point de cognoiſſance. TISIMANDRE. Ie ſçay que vos appas ſont adorez de tous, Et ſi i' auois deux coeurs i' en aur ois vn pour vous: Mais le mien deſormais n'eſt plus en ma puiſſance. ARTENICE. L'on ne peut trop loüer voſtre perſeuer ance: Ie voudrois que l'amour qui vous peut émouuoir Auec ques le de ſir m'euſt donné le pouuoir De vous faire oublier ce coeur inexorable. TISIMANDRE. Ceſſez belle ceſſéz de m'eſtre fauorable. Lors que i' ay meſpriſé l'heur de voſtre amitié I' ay rendu mon tourment indigne de pitié: Quic onque vous a veuë, & ne taſche à vous plaire N' eſt pas digne de voir le iour qui nous éclaire: Souffrez donc que du ſort le iuſte chaſtiment Puniſſe mon amour de cet aueuglement A fin que vos beaut ez à qui i' ay fait l'offence Puiſſent par mon trépas en auoir la vengeance. ARTENICE. Ie ne gagneray rien contre cét obſtiné, Le mal qui le poſſede eſt trop enraciné: Il n'entend point raiſon, mon entrepriſe eſt vaine, Il ne veut pas guerir, il ſe plaiſt en ſa peine, Il s'en va tout courant la mettre en liberté Dans les antres affreux d'vn deſert écarté, Qui ne ſont point ſi noirs que ſa melancholie, Ny leur rochers ſi durs que le coeur d'Ydalie. Pour moy ie veux ſçauoir ſi i' aur ay tout perdu, Lucidas ne vient point c'eſt aſſez attendu Ie m'envay le chercher pour paſſer mon enuie De ſçauoir du Deuin ou ma mort ou ma vie.

ACTE SECOND. SCENE QVATRIESME.

POLISTENE. ARTENICE. LVCIDAS.

POLISTENE. AVcreux de ces rochers d'où l'eternelle nuict A chaſſé pour iamais la lumiere & le bruit: I'ay choiſi mon ſeiour loing de la multitude Pour ioüir en repos du plaiſir de l'eſtude. Par elle tous les iours comme maiſtre abſolu, Ie fais faire aux Demons ce que i'ay reſolu, Et mon pouuoir cogneu dans tous les coings du monde, Met cen deſſus deſſous le Ciel, la terre, & l'onde: Des iours ie fais des nuicts, des nuicts ie fay des ieurs I' arreſte le Soleil au milleu de ſon cours, Ou la honte qu'il a d'obeïr à mes charmes Souuent luy fait noyer ſon viſage de lar mes: Les broüillards par le frein de mes enchantements Dans le vague de l'air changent leurs mouuements. Et portent où ie veux de l'onde ou de la terre La tempeſte, le vent, la greſle & le tonnerre. Quand le fier Aquilon l'horreur des Matelots Met la guerre ciuille en l'Empire des flots. Bien qu'il ait de Neptune irrité la puiſſance Mon ſeul commandement excuſe ſon offence: Bref, ie ſuis tout puiſſant, ſi toſt que des Enfers Mon art a deliuré les eſprits de leurs fers: N'eſt-il pas vray Demons, Spectres, images ſombres, Noirs ennemis du iour phantoſmes, Lares, ombres, Horreur du genre humain, trouble des élemens? Qu'eſt-ce qui vous rend ſourds à mes commandemens? Que retardez vous tant? & quoy trouppe infidelle Ne cognoiſſez vous pas la voix qui vous appelle? Découurez des enfers le funeſte appareil, Que l'horreur de la nuict faſſe peur au Soleil, Faites couler le Stix deſſus noſtre hemiſphere, Et faites ſoir Pluton au troſne de ſon Frere, Tonnez, greſlez, ventez, eſtonnez l'vniuers, Monſtrez voſtre pouuoir & celuy de mes vers. Et vous qui dans vn verre en formes apparentes, Imitez des abſents les actions preſentes, Faites voir Ydalie auec ſon fauory, Ioüir des priuautez de femme & de mary, A fin que ſa riuale en voyant cette feinte Quitte ſa paſsion dont ſon ame eſt attainte: Et que de ce tyran qu'on craint meſme aux enfers Nous briſions auiourd'huy les priſons & les fers. LVCIDAS. Voila ma belle ingrate, où le Deuin demeure, Si vous le voulez voir, all ons tout a cette heure Car ie l▪entends de ſia ſur le haut de ces monts D'vne voix éclatante inuoquer les Demons. ARTENICE. Allons donc Lucidas. LVCIDAS. Allons belle Artenice Sçauoir de mon Riual l'infidelle artifice. POLISTENE. Mais ie croy que voyla de ſia ce pauure Amant Qui cherche dans mon art la fin de ſon tourment? LVCIDAS. Vener able vieillard, dont l'obſcure ſcience Ne tire ſa raiſon que de l'experience, Et dont nos ſens rauis, & non pas ſatisfaicts D'vne cauſe incogneuë admirent les effects, Quand voſtre art leur découure en ces noires merueilles Les ſecrets ignorez des yeux & des oreilles. Ie vous viens retrouuer de ſireux de ſçauoir Ce que dans voſtre glace il me doit faire voir; Permettez qu'auec moy cette ieune Bergere Contente ſon eſprit à voir ce qu'elle eſpere. POLISTENE. Mon fils ie le veux bien, vous pouuez librement De tout ce que ie puis vſer abſolument. Mais ie crains que cette ame encore ieune & tendre Ne tranſiſſe de peur, mais qu'il luy faille entendre Les foudres éclattans & les horribles cris Que font au tour de moy ces bijarres eſpris, ARTENICE. Non, non, ne craignez point ie ſuis bien aſſeurée, Auant que d'y venir ie m'y ſuis preparée. POLISTENE. Ie vay donc de ce pas mes charmes commencer, Ne bougez de ce lieu, gardez d'outrepaſſer Les bornes de ce cerne imprimé ſur la terre: Ne vous ennuyez point ie vay querir le verre, Où mes enchantements feront voir à vos yeux Ce que le monde croit n'eſtre veu que des Dieux. ARTENICE. Nous attendrons long temps. LVCIDAS. C'eſt ce que i'apprehende Mais il faut trouuer bon tout ce qu'il nous commande. ARTENICE. Dieux qu'eſt-ce que ie voy? LVCIDAS. Dieux qu'eſt-ce que i'entends? ARTENICE. Que de monſtres hideux. LVCIDAS. Que de feux éclattants, D'horribles tourbillons, d'éclairs & de tempeſtes Dans ce nuage épais s'aſſemblent ſur nos teſtes. ARTENICE. Tout le Ciel eſt couuert d'vne noire vapeur. POLISTENE. Ne vous eſtonnez point vous n'aurez que la peur. ARTENICE. Foites donc appaiſer cét horrible tonnerre, Qui ſemble menacer le Ciel, l'onde, & la terre. POLISTENE. Courage mes enfans, bien toſt ie me promets De vous rendre le iour auſsi clair que iamais. ARTENICE. Ie croy qu'il dira vray, la nuë eſt diſsipée, La terre de broüillards n'eſt plus enueloppée, Son ſçauoir admiré des ames & des yeux, Rend le beau temps au monde, & le Soleil aux Cieux, Dieux! que ſur ces Demons il s'eſt acquis d'Empire, Voyez quel changement, ils font ce qu'il deſire, Et ſemble qu'il les tient ſous ſon pouuoir enclos, Comme Aeole les vents, ou Neptune les flots. POLISTENE. Tenez ieunes Bergers conſiderez ce verre, C'eſt le portrait naïf des ſecrets de la terre. Maintenant que mon art à ſa puiſſance ioint Luy fait rendre à nos yeux les obiects qu'il n'a point: Commencez vous à voir? LVCIDAS. Nous commençons à peine A découurir vn peu des deux bords de la Seine, Qui ſerrant en ſes bras ces beaux champs plantureux Fait cognoiſtre à chacun l'amour qu'elle à pour eux: Quel éclat de grandeur reluit en ces riuages, Quel amas de Palais riches de leur ouurages, Où la nature & l'art ſemblent de tous coſtez Diſputer à l'enuy le prix de leurs beautez? Que ces ruiſſeaux d'argent fugitifs des fontaines Coullent de bonne grace au trauers de ſes plaines. Voyez vous au deſſous de ce petit couppeau Le Berger Alcidor qui meine ſon trouppeau? ARTENICE. Ouy certes ie le voy bien pres de ſa maiſtreſſe, On recognoiſt aſſez le deſir qui le preſſe. LVCIDAS. Le vermeillon leur vient ils entrent dans le bois Tous deux ſous vn ormeau s'aſsiſent à la fois. Que ie voy de baiſers prins à la dérobée. ARTENICE. O Dieux en quel malheur ſe void elle tombée! Que leurs ſales plaiſirs, deteſtez en tous lieux, Font de peine à mon coeur, & de honte à mes yeux: Que long temps cét affront viura dans ma memoire. LVCIDAS. Au moins vous l'auez veu: vous n'ē vouliez rien croire. ARTENICE. Ie n'en ay que trop veu pour mon contentement, Peut-on plus ſe fier en la foy d'vn Amant? Va, triomphe à ton aiſe eſprit plein d'artifice De l'honneur d Ydalie & du coeur d'Artenice, En me voyant punie auec indignité, De m' eſtre trop fiée en ta legereté. Quant à moy deſormais le ſeul bien que i' eſpere, Eſt de paſſer ma vie au fond d'vn Monaſtere, Où ſage à mes deſpends ie veux à l'adueuir Au ſeul amour des Dieux mes volontez vnir. LVCIDAS. Vous pleurez vne perte indigne de vos larmes, La faute eſt à ſes yeux & non pas à vos charmes, Qui pourroient arreſter les yeux les plus legers, Et contraindre les Dieux d'eſtre encore Bergers. ARTENICE. Que ſeruent Lucidas toutes ces flatteries, Ie ne me repaiſt plus de vos cajoleries, Ie prends congé du monde & de ſes vanitez, Qui ſucrent le venin de tant d'impietez; Adieu donc pour iamais plaiſirs pleins d'amertume, Adieu vaine eſperance, où l'âge ſe conſume, Adieu feux inſenſez autheurs de mes ennuis, Adieu doux entretien où ie paſſois les nuicts, Adieu rochers & bois, adieu fleuues & plaines, Qui ſçauez de mon coeur les plaiſirs & les peines: Adieu ſages parens de qui les bons aduis, En mon aueuglement furent ſi mal ſuiuis. Adieu pauure Berger dont la per ſeuerance Recoit de mon amour ſi peu de recompence: Adieu ſage vieillard dont l'art prodigieux Fait que la verité ſe découure à nos yeux: Adieu pauures brebis que ïay tant de laiſſées Pendant qu' vn autre ſoin occupoit mes penſées: Adieu donc Lucidas, encore vn coup adieu, Ie vay finir mes iours dedans quelque ſainct lieu, Où tamais le malheur ne me pourr a déplaire. LVCIDAS. Commen c' eſt tout de bon? POLISTENE. Il l'a faut laiſſer faire; Vn mal ſi violent est ſourd à la raiſen, Son ſec ours à preſent ſeroit hors de ſaiſon, Le temps ſenl peut guerir vne ſi grande playe. LVCIDAS. Pere vous dites vray, c'est en vain qu' on eſſaye A conſoler vne ame au fort de ſon malheur, Les remedes trop prompts irritent la douleur: C' eſt pour quoy le meilleur eſt d'aller à cette heure Paſſer dans le village où ſon pere demeure, A fin de l'aduertir qu'il l'a ſuiue de prés Cependant que le mal eſt encore tout frais.

ACTE SECOND. SCENE CINQVIESME.

ALCIDOR. YDALIE. ARTENICE.

ALCIDOR. QVE le Soleil eſt haut! de ſia de ces colines, L'ombre ne s'eſtend plus dans les pleines voiſines, Deſia les Laboureurs laſſez de leurs trauaux Tous ſuants & poudreux emmeinent leurs cheuaux. Deſia tous les Bergers ſe repoſent à l'ombre Et pour ſe feſtoyer des mets en petit nombre Que la peine & la faim leur font trouuer ſi doux, Font ſeruir au beſoin de table à leurs genoux: Les oyſeaux aſſoupis la teſte dans la plume Ceſſent de nous conter l'amour qui les conſume. L'air eſt par tout ſiclair, qu'il deffend à nos yeux D'admirer les Saphirs, dont il pare les Cieux: Le Soleil trop à plomb nous void ſur ce riuage, Il nous faut retirer & nous mettre à l▪ombrage De ce boccage épais, où l'on diroit qu'amour A voulu marier la nuict auec le iour. YDALIE. Helas! mon frere helas! en quelque part que i'aille Ie ne puis moderer le feu qui me trauaille. I'ay par tout le Soleil autheur de mon ennuy, Les antres & les bois n'ont point d'ombre pour luy. ALCIDOR. Quelle ſecrette ar deur vous ronge le courage? YDALIE. Ce que i'ay dans le coeur ſe lit dans mon viſage. Ie voudrois bienle dire & ne le dire point, Ie ſcay bien en cela ce • que l'honneur m'enjoint, Et ne puis ſans rougir, quoy que ie me propoſe En vous le découurant en découurir la cauſe. ALCIDOR: Pourquoy ma chere ſoeur? quelle timidité Retient voſtre diſcours en cette obſcurité? YDALIE. Pleuſt à ce petit Dieu qui me reduit en cendre, Que ſans vous en parler vous le peuſsiez entendre. ALCIDOR. Auez vous des ſecrets, dont vous n'oſiez parler A celuy dont le coeur ne vous peut rien celer? YDALIE. Las! c'eſt auſsi le ſeul que ie ne vous puis dire. ALCIDOR. Quand vous me le diriez en deuiendr oit-il pire? Ay-ie quelque intereſt en voſtre paſsion. YDALIE. Au trouble ou ie me voy ie ne ſçay comment faire, Ie ne vous l'oſe dire, & ne vous le puis taire. ALCIDOR. Ma ſoeur ne craignez point, dictes-le librement, Il ne faut point rougir pour auoir vn Amant: La ſeule opinion rend ce plai ſir blaſmable, Et ſi c'eſt vn peché le Ciel meſme eſt coupable Combien qu'il le deffende il en eſt de ſireux, Il eſt au renouueau de la terre amoureux, Il void de tous ſes yeux ſes beautez raieunies Elle ſent dans ſon coeur leurs flames in finies Et s'estoillant de fleurs taſche à ſe conformer Auec celuy qui l'aime, & qu'elle veut aimer. Leur mutuelle ar deur rend la terre feconde, Et le feu s'en répand dans tous les coeurs du monde, Ces rochers & ces bois n'entendent nuict & iour Que de pauures Bergers qui ſe plaignent d'amour, S'ils ne ſont point ſuſpects aux ſecrets de tant d'autres Quelle crainte auez vous d'y declarer les voſtres? YDALIE. Que ſeruir a cela? ALCIDOR. C'eſt vnſoulagement. D'oſer en liberté declarer ſon tourment: Il n'ect rien de ſi doux aux ames bien atta • ntes Que de pouuoir trouuer à qui faire ſes platntes, Vn mal ſe diminuë & n'eſt plus que demy Quandnous le partageons auecque noſtre amy. YDALIE. Mais c'eſt à ces amis compagnons de fortune, Qu'on aime ſeulement d'vne amitié commune. ALCIDOR. Ma ſoeur c'eſt au contr aire à ceux qu'on aime bien Il faut ouurir ſon coeur & ne leur celer rien. YDALIE. Le mien vous eſt ouuert, ces ſouſpirs tous de flame Vous découurent aſſez ce que ie ſens dans l'ame. ALCIDOR. Ces ſouſpirs enflamez, dont ie ſuis ſpectateur, En diſant voſtre mal n'en diſent point l'autheur. YDADIE. Las il ne m'entend point ie me rends trop obſcure, Il a comme le coeur l'intelligence dure. ALCIDOR. Ie ne ſçay pas de vray pour quoy vous differez A me nommer celuy, pour qui vous ſouſpirez? YDALIE. Vous le verrez bien toſt, & ſans beaucoup de peine, Si vous baiſſez •• s yeux dans les flots de la Seine. ALCIDOR. Helas! ie vous entends & tiendrois à bon heur D'auoir en moy dequoy meriter cét honneur. I'aypitié de vous voir le viſage ſi bleſme, Aſſez depuis trois ans i'ay cogneu par moy-meſme, Quel tourment c'eſt d'aimer & de n'eſperer rien Ie déplore en cela voſtre ſort & le mien. YDALIE. Vous ſeul à tous les deux pouuez donner remede. ALCIDOR. Ouy ſi i'eſtois guery du mal qui me poſſede. YDALIE. Las! gueriſſez-vous donc a fin de me guerir. ALCIDOR. De manquer à ma foy i'aymerois mieux mourir. YDALIE. Voſtre mort en cela ſeroit mal employée. ALCIDOR. Heureux ſi le deſtin me l'auoit enuoyée, Iene ſçaurois mourir pour vn plus beau ſubiect. YDALIE. Vos deſirs feront mieux d'auoir vn autre obiect. ALCIDOR. La Saine dans ſon lict verra plûtoſt ſon onde Rebrouſſer contre-mont ſa ſource vagabonde. Et plûtoſt nos brebis paiſtront deſſus les flots, Que ie briſe les fers, qui me tiennent enclos, Et qu'on v • ye Alcidor engager ſon ſeruice Sous vn autre pouuoir que celuy d'Artenice. YDALIE. Puis qu'elle n'eſt pas libre en ſon affection, Vous n'en aurez iamais que de l'affliction, Et vieillirez tous deux en ces pourſuites vaines Auant que de cueillir le loyer de vos peines: Sonpere & ſes parents ne le deſirent pas. ALCIDOR. Ie ſuis aſſez content d'adorer ſes appas Combien que ſon deſtin ſoit à mes voeux contraire L'honneur que i'enreçoy me tient lieu de ſalaire. YDALIE. Languirez-vous touſiours en ſi dure priſon? ALCIDOR. Ouy ſiie ne perdois le ſens & la raiſon. YDALIE. Appellez-vous raiſon d'aimer ſans eſperance? ALCIDOR. La raiſon nous oblige à laperſeuerance, Apres que nous auons engagé noſtre foy. YDALIE. Vous ne voulez donc peint auoir pitié de moy? ALCIDOR. Que peut vn affligé, dont le mal incurable A luy-meſme le rend luy-meſme inexorable? Mais ſi vous receuez quelque contentement De me voir comme frere & non pas comme amant, Nous nous verrōs touſiours ſans cōtrainte & ſans peine En gardant nos troupeaux ſur le bord de la Seine. YDALIE. Puis que pour poſſeder le bonheur de vous voir Il faut regler mes voeux aux loix de mon debuoir, Bien qu'il ſoit mal aiſé belle ame de mon ame De paroiſtre de glace eſtant toute de flame: Toutes fois pour ioüir d'vn bien qui m'eſt ſi doux, Ie t'airay pour vn temps l'amour que i'ay pour vous. ALCIDOR. Vous me permettrez donc d'aller voir cette belle, Qui ſeule & ſans troupeau da • s ce bois ſe recele: Beauté le cher ſoucy de tant de beaux eſprits, Qui d'vne belle flame auez m • n coeur épris, Merueille d'icy bas chef d'oeuure de noſtre âge, Où la nature meſme admire ſ • n ouurage. Quel ſoin guide vos pas en ces lieux écartez. ARTENICE. Quoy tu ne rougis point de tes deſloyautez? Tume parles encor' meſ • hant, ingrat, pariure, Apres que tu m'as fait vne ſi grande iniure? ALCIDOR. Qu'elle rage vous meut à me traicter ainſi? ARTENICE. Ce que tout maintenant tu viens de faire icy. ALCIDOR. O quelle calomnie! ô Dieux quelle malice! ARTENICE. Voyez qu'il eſt méchant & remply d'artifice! Laiſſe moy déloyalne m'importune plus. ALCIDOR. Beauté dont mon malheur à ſon flus & reflus, S'il vous reſte dans l'ame vn rayon de iuſtice Pour le der nier loyer de trois ans de ſeruice, Differez vn moment l'arreſt de mon trépas, Auant que de m'ouïr ne me condemnez pas? O Dieux elle s'en va ſans me vouloir entendre! O deſtins trop cruels que voulez vous attendre A couper de mes ans le filet malh • ur eux? N'eſtes vous ſans pitié que pour les amour eux? Et toy pere du iour, dont la flame feconde, Comble de tant de biens tout ce qui vit au monde, Seul aſtre ſans pareil, arbitre des ſaiſons Qui pares de ſplendeur les celeſtes maiſons: Iadis i'ay comparé des yeux de ma cruelle La flame periſſable à ta flame immortelle, Pour qu • y ne punis tu pour t'auoir offenſé D'vne eternelle nuict ce blaſpheme inſenſé? A quoy me ſert de voir ta lumiere importune? A quoy me ſert ma vie en butte à la fortune? Il vaut mieux, il vaut mieux en arreſter le cours, Et mourir vne fois que mourir tous les iours.

ACTE TROISIESME.

SCENE PREMIERE.

ARTENICE. PHILOTEE▪

ARTENICE. QVE cette vie eſt douce, he que ie ſuis contente D'auoir trouué ce lieu conforme à mon att • nte, Que i'y trouue d'apas qui charment ma douleur, Que le ſort m'a renduë heureuſe à mon malheur! Doux poiſon des eſprits amoureuſe penſée, Qui mer amenteuez ma fortune paſſée. Eſloignez vous de moy, ſortez de ces ſaincts lieux, Les coeurs ny ſont épris que de l'amour des Cieux! La gloire des mortels n'eſt qu'ombre & que fumée C' eſt vne flame étainte auſsi toſt qu' all umée. Deſsillez-vous les yeux, vous dont la vanité Prefere cette vie à l'immortalité. Maintenant que ie gouſte vne paix ſi pr of onde, Que i'ay pitié ma ſoeur de ceux qui ſont au monde, Et qui ſur cette arene émeue à tous propos Fondent ſans iugement l'eſpoir de leur repos. PHILOTEE. Ma ſoeur ne plaignez point ceux que le ſort conuie A paſſer loing de nous la courſe de leur vie, Parmy les vanitez qui ne ſont point icy, Où le combat eſt grand la gloire l'eſt auſsi: Nous viuons ſur la terre en eternelle peine, Et de pluſieurs chemins par où le Ciel nous meine Au repos glorieux qui nous eſt preparé, Celuy que nous tenons eſt le plus aſſeuré; Beniſſez donc, ma ſoeur, ſa bonté paternelle Qui nous met au chemin de la vie eternelle: Et beniſſéz auſsi la tempeſte du ſort Qui du milieu des flots vous a ietté au port. Les Dieux diuerſement nous retirent du monde, L'eſprit ne peut ſonder leur prudence profonde; C'eſt d'eux d'où le Soleil emprunte la ſplendeur, Il faut en ſe taiſant admirer leur grandeur, Alors que vous perdiez au milieu des delices▪ Qui cachent comme fleurs les abyſmes des vices Ces eſprits tou ſiours preſts au ſecours des humains Vous ſauuent du naufr age & vous tende les mains. Oubliez donc le feu de ce Berger paiure, Qui fait à voſtre amour vne ſigrande iniure, Donnez leur vos penſers voſtre ame & vos apas, Ces Amants tous parfaits ne vous tromperont pas. ARTENICE. Ie vous croir ay ma ſoeur leur bonté m'y conuie Autant que le deſtin me laiſſera la vie, Iamais autre de ſir n'entrer a dedans moy Que de leur conſeruer mon amour & ma foy C' est en cette aſſeurance auſsi douce que ſaincte, Que ie veux terminer mon eſpoir & ma crainte. PHILOTEE. Quand on vient en ce lieu deuant que s'engager Au voeu que nous faiſons ily faut bien ſonger; Noſtreregle eſt étroitte & mal-aiſée à ſuiure, Dans vn deſert auſtere il faut mourir & viure, Prendre congé du monde & de tous ſes plaiſirs, N' auoir plus rien à ſoy, pas meſme ſes deſirs, Méditer & ieuſner anec ques patience, Et ſouffrir doucement la loy d'obedience: Nous en voyons aſſez de pareilles à vous Pour vn prompt deſeſpoir ſe retirer chez nous, Mais quand il faut ieuſner, & faire penitance Souuent leur deſeſpoir ſe tourne en repentance: Conſeillez-vous aux Dieux penſez y meuremént, Ne vous engagez point inconſiderement. ARTENICE. Ma ſoeur cette harangue eſt pour moy ſuperflué, Auant que d'y venir ie m'y ſuis reſolué, Et croy qn'auec le temps i'euſſe fait par raiſon Ce que par deſeſpoir i'ay fait hors de ſaiſon. PHILOTEE. Qui ſont ces deux vieill ards que ie voy dans la pleine? ARTENICE. C'eſt mon pere & mon oncle, ô Dieux qu'ils ont de peine! Que ie crains leur abord! que ie plains leur ſoucy! Dieux qu'ils ſont importuns! qui les ameine icy Tourmenter mon eſprit de leurs raiſons friuoles, Et perdre ſans effect leurs pas & leurs paroles? PHILOTEE. Ie vous laiſſeray ſeule a fin que librement Ils vous puiſſent tous deux dire leur ſentiment.

ACTE TROISIESME. SCENE SECONDE.

SILENE. DAMOCLEE. ARTENICE.

SILENE. DANS ce bocage épais loin du peuple pofane, C'eſt où ma fille ſert les Autels de Diane, Le bon-heur nous conduit, nous ne pouuions choiſir, Vn temps plus à propos ſelon noſtre de ſir, Lavoila toute ſeule au frais de ce boccage: Ma fille, he! qui vous meut à quitter le village Pour venir demeurer ende de ſi triſtes lieux? ARTENICE. Pour la haine du monde, & pour l'amour des Cieux. SILENE. D'où vous vient cette humeur en l'Auril de voſtre âge? Si ſe ſont des effects d'vne amoureuſe rage, Nommez-nous en l'autheur? ARTENICE. C'eſt tout ce que ie crains Que de vous declarer celuy dont ie me plains, Parce qu'en l'accuſant moy-meſme ie m'accuſe. SILENE. Cét extreme remords dont voſtre ame eſt confuſe, Repare aſſez le mal que vous tenez caché. ARTENICE. Voſtre ſeule deffenſe en a fait le peché: Si vos iuſtes rigeurs, dont ie fus menacée Euſſent peut trouuer place en ma raiſon bleſſée Mon coeur ne plaindroit pas l'ennuy que ie reçoy, Devoir vn eſtranger m'auoir manqué de foy. SIELENE. Elle en a dit aſſez nous le pouuons cognoiſtre, L'excuſe qu'elle fait nous fait aſſezparoiſtre Que c'eſt ce beau garçon qui s'êleua chez vous, Lors que ſon bon deſtin l'arreſta parmy nous. ARTENICE. Mon pere c'eſt luy-meſme: excuſez mon enfance: Il eſt vray ie l'aimois contre voſtre deffence, Ceméchant, cét ingrat, cét eſprit inconſtant. DAMOCLEE. Quel ſuiect auez-vous de vous enplaindre tant? ARTENICE. Ne vous enquerez point de cette per fidie, Vous la ſçaurez trop toſt ſans que ie vous la die? DAMOCLEE. Quel timide reſpect vous deffend d'en parler, Eſt-ce quelque ſecret, qu'on me doiue celer? SILENE. Ma fille dites luy puis qu'il vous le commande. ARTENICE. Par où commenceray-je? ô Dieux! que i'apprehende De vous entretenir de ce triſte diſcours, Qui combler a d'ennuy le reſte de vos iours. DAMOCLEE. Depeſchez vous, ma niepce, en vain on me le cache, Quand ce ſeroit ma mort il faut que ie le ſçache. ARTENICE. D'vn autre que de moy le pui ſiez-vous ſçauoir. DAMOCLEE. Que de peurs à la fois vous me faites auoir, Que vous m'apprenez bien qu'en vn ſuiect de plainte Le plus ſouuent le mal eſt moindre que la crainte! ARTENICE. Le crime qu'Alcidor à fait contre ſa foy Vous offenſe, mon oncle, auſsi bien comme moy. DAMOCLEE. Eſt-ce point que ce traiſtre abuſant de ma fille Auec elle euſt taché l'honneur de ma famille? ARTENICE. Helas i'en ay trop dit. DAMOCLEE. Acheuez promptemert, Dites nous en quel lieu, quand ce fut, & comment. ARTENICE. Que ie ſens de regrets & de douleurs mor telles En faiſant le recit de ces triſtes nouuelles: Sur la riue de Seine en ces lieux écartez, Que ſon cours ſinueux, borné de trois coſtez. Eſt dans vn petit bois vn cabinet champeſtre, D'où ſans ſe faire voir l'on voidſes brebis paiſtre. Làces ieunes amants vont preſque tous les iours Eſteindre en liberté le feu de leurs amours, Et deſia leurs plai ſirs penſent couurir leur crime Sous vn voeu fait entre eux d'vn hym nlegitime; Et penſent que des maux, dont ils ſont entachez Ils ſont aſſez abſous en les tenant ca 〈…〉 ez: Mais Lucidas & moy conſultant les m • ſteres, Que Poliſtene obſerue en ſes grottes auſteres; Recogneuſmes au iour d'vn criſtal enchanté, Ce que le bois cachoit dans ſon obcurité. DAMOCLEE. O Dieux que dictes vous? ARTENICE. Ie rougis quand i'y penſe: Et ma condition ne peut auoir diſpenſe De conter deuant vous leurs profanes plaiſirs. DAMOCLEE. O deſloyal! ô traiſtre! ôper fide eſtranger! De qui l'ingratitude & l'amour impudique Font d'vn mal domeſtique vne honte publique, Eſt-ce là le loyer du ſoin que i'eus de toy Lors que tu vins enfant te retirer chez moy? ARTENICE. Il monſtre bien qu'il eſt d'vne ingrate nature, De s'attaquer à vous, dont il eſt creature, D'où peut-il deſormais eſperer de l'apuy? SILENE. Vous auez en ſa faute autant de tort que luy: Tous les ieunes Bergers viuent ſur la commune, Sans reſpect & ſans crainte ils cherchent leur fortun • Laiſſer ſa fille ſeule auec ſes ieunes fous C'eſt mettre vne bredis en la garde des loups. Si vous euſsiez euſoin de la tenir ſubiecte, Elle n'euſt iamais fatt la faute qu'elle a faicte. DAMOCLEE. Vous dites vray mon frere. SILENE. Il n'en faut plus parler. DAMOCLEE. Que ie ſuis miſerable. SILENE. Il ſe faut conſoler. DAMOCLEE. La mort ſeule à pouuoir de conſoler mon ame, Mais il faut que deuant ie me laue du blaſme, Donc cette fille infame a mon honneur taché Et que deſſus l'Autel expiant ſon peché Son iuſte chaſtiment à ſa faute réponde, Pour la gloire du Ciel & l'exemple du monde. ARTENICE. O Dieux qu'il eſt cruel! SILENE. Ma fille il a raiſon Ce crime tacheroit à iamais ſa maiſon. ARTENICE. Apres tant d'accidens qu'à toute heure on void naiſtre, C'eſt n'auoir point de ſens que de ne point cognoiſtre Que qui vit dans le monde il vit dans le malheur. SILENE. Il falloit que mon frere euſt part à ma douleur, Il n'auoit comme moy que cette ſeule fille, Il perd en la per dant l'eſpoir de ſa famille: Et moy ſi ie vous perds ie perds en meſme temps Le ſeul bien qui rendoit tous mes deſirs contens: voſtre bon naturel maintenant vous conuie D'auoir pitié de ceux dont vous tenez la vie. Ce froid & paſle corps victime du tombeau, Verra bien toſt ſes iours eſteindre leur flambeau, Attendez le ſuccez des triſtes deſtinées, Qui détordent de ſia le fil de mes années: Helas! ma fille helas! qui me clorra les yeux Mais que mon paſle eſprit ſoit monté dans les Cieux? ARTENICE. Ie ſçay ce que ie dois à l'amour paternelle: Mais il faut obe ïr à celuy qui m'appelle, Et qui mon premier pere a voulu prendre ſoing De me tendre les bras & m'aider au beſoin. SILENE. Les Dieux que vous ſeruez ence deſer auſtere, N'oſtent point les enfans d'entre les bras dupere: Ce n'eſt point leur conſeil, qui vous meut à cecy, Rien que le deſeſpoir ne vous ameine icy. ARTENICE. Le ſoing continuel de noſtre bon Genie Par des moyens diuers nos volontez manie, Et de quelque façon qu'il nous vienne inſpirer Il luy faut obeïr & ne point murmurer, Bien que le deſeſpoir d'vne flame amoureuſe Ait conduit ma fortune en cette vic heureuſe: Puis qu'ainſi l'Eternel pour mon bien le voulut D'vn deſeſpoir naiſtra l'eſpoir de mon ſalut. SILENE. Penſez vous le trouuer en cette triſte vie, Pluſtoſt que dans le monde où l'âge vous conuie? Eſtimez vous que ceux qui n'ont fait que pour nous Les plaiſirs d'icy bas auſsi iuſte que doux, Vueillent pour leur ſeruice en deffendre l'vſage? ARTENICE. Croyez-vous que ce lieu ſolitaire & ſauuage En éloignant de nous la crainte & le deſir, Eloigne de nos coeurs tout ſuiect de plaiſir. Voyez ces bois épais, voyez cette verdure, Ces promenoirs dreſſez par le ſoing de nature, Et ce Temple où les coeurs vrayement deuotieux Deſtinent leur repos à la gloire des Cieux, Voyez en cét enclos les lieux cù Philotée Fait depuis ſi long temps ſa demeure arreſtée, Et vous-meſme aduoüerez exempt de paſsion Qu'ils n'ont pas moins d'attraits que de deuotion.

ACTE TROISIESME. SCENE TROISIEME. CLENATE. HElas! que de l'amour les paſsions diuerſes Dans l'eſprit des mortels apportent de trauerſes: De combien de tourment, de peine & de deſir Il nous fait achepter vn moment de plaiſir. Ce miſerable Amant plus fidelle que ſage, Aux dépens de ſavie en fait l'apprentiſſage: Il s' est precipité pour finir ſon ennuy Dans les flots plus humains à luy-meſme que luy: Lavague couroucée & d'écume couuerte, Meſme au fort de ſon ire eut pitié de ſa perte, Par trois ou quatre fois elle l'a ſouſleué Pour le rendre à la terre où ie me ſuis treuué: Mais ſa vie & ſa mort ſont encore incertaines, Vne tiede chaleur eſtreſtée en ſes veines, Et ſemble que ſon coeur fait ſes derniers efforts Pour retenir ſon ame aux priſons de ſon corps, Ie voudrois bien me rendre à ſon mal ſecourable Mais en le ſecourant ie me rendrois coupable: Ceux qui de ſon malheur ne s'informeroient pas Me iugeroient moy meſme autheur de ſon trépas. Vn Temple de Diane eſt au bord de cette onde, Où les coeurs nettoyez des ſoüilleures du monde Sçauent des faits douteux choiſir la verité, Auec moins d'arti fice & plus d'integrité, Ie m'en vais en ces lieux amis de l'innocence, Implorer de quelqu'vn la fidelle aſsictance.

ACTE TROISIESME. SCENE QVATRIESME

ALCIDOR. CLEANTE. ARTENICE. SILENE.

ALCIDOR. EN quel lieu m'a conduict la cruauté du ſort, Suis-ie en terre ou en l'eau, ſuis-ie viuant ou mort? Qu'eſt-ce quitient encor' mon ame priſonniere? D'où proutent à mes yeux cette triſte lumiere? Quoy? le Ciel ou l'Enfer ont ils quelque flambeau, Qui trouble le repos en la nuict du tombeau? Que ne ſuis ie en ces lieux eternellement ſombres? Me refuſe-t' on place en la troupe des ombres? Veut-on qu'errant touſiours ſous la voûte des Cieux I'é prouue en tous endroits la iuſtice des Dieux? Où que mon paſle eſprit vaine terreur du monde Se plaigne inceſſamment auxriues de cette onde, Où mon coeur au mépris de la diuinité N'aguere idolatroit vne ingrate beauté? N'eſt-ce pas là le bois, n'eſt-ce pas là la plaine, Où viuant i' auois ſoin de mes bestes à laine? Ces valons reculez de la flamme du iour, N'eſt-ce pas où i' allois ſouſpirer mon amour. Aces vieux baſtiments de qui l'on void à peine Les ornements du faiſte eſtendus ſur l'arene: A ces murs éboulez par la ſuitte des ans, Ie recognois ces lieux autrefois ſiplaiſans: Quand la belle Artenice honneur de ſon village, Amenoit ſon troupeau dans noſtre paſturage. Ces aliziers témoings de nos plaiſirs paſſez Ont encore en leurs troncs nos chiffres enlacez: Cette vieille foreſt d'eternelle durée L'accuſera ſans fin de ſa foy pariurée. Ces vieux cheſnes ridez ſçauent combien de fois Ses plaintes ont troublé le ſilence des bois, Lors qu'en la liberté de leur ombre immortelle Elle eſoit prendre part au mal que i'ay pour elle. Viuez doncques foreſts, viuez don • ques touſicurs Pour eſtre les té moings de nos chaſtes amours. Mais que de viſions, qui paſſent & repaſſent, Que de phantoſmes vains en ces riues s' amaſſent, Sont ce morts ou Demons, qui s' approchent de moy? Tout fait peur à mes yeux! Dieux qu'eſt-ce que ie voy? Belle ame le miroir des ames les plus belles Anez vous donc quitté vos dépoüilles mortelles? Quels tourmen's douloureux? quels funeſtes remords? Vous ont fait ennuyer dedans vn ſi beau corps? Quoy voulez vous encor? ô ma chere infidelle! Trauer ſer mon repos en la nuict eternelle? Quel deſtin malheureux vous a conduit icy? CLEANTE. Ne vous eſtonnez point de ce qu'il parle ainſi, La fureur le domine auec tant de puiſſance Que ſa raiſon malade en perd la cognoiſſance. ARTENICE. Quelque mal que ie vueille à ſa déloyauté I' ay pitié de le voir en cette extremité, Le tort qu'il m' auoit fait n'eſtoit pas vne offence, Qui le d'euſt obliger à telle penitance: Il le faut aduoüer ie plains bien ſon malheur, Mon pere pardonnez à ma iuſte douleur! Ie ne la puis nier tant elle eſt vehemente. O Dieux ie n'en puis plus le mal qui le tourmente M'a troublé tous les ſens auſsi bien comme à luy. SIELENE. Ma fille appaiſez▪vous moderez voſtre ennuy! Domptez voſtre douleur auant qu'elle s' augmente. O Dieux elle ſe meurt ſecouroz moy Cleante! CLEANTE. Helas! auquel iray-ie ils ſe meurent tous trois? Tous trois ſont étendus ſans parole & ſans voix. ALCIDOR. D'où vient-ie? qu'ay-ie fait? quelle rage aueuglée A depuis ſi long temps ma raiſon déreglée? Qui m'a mis en ce lieu? qui ſont ceux que ie voy Au long de ce riuage eſtendus comme moy? D'où vient que ce vieillard ſans voix & ſans halaine Souſtient ain ſi la teſte à ma belle inhumaine? O Dieux elle ſe meurt: tout le monde eſt en pleurs: Helas! pourquoy deſtin pour voir tant de malheurs Rendez vous à mes ſens l'vſage de la vie? CLEANTE. Berger conſol • z vous l'amour vous y conuie Afin de conſoler cette ieune beauté, Qui prend part à l'ennuy qui vous a tourmenté! ALCIDOR. O l'heur eux changement! que dites vous Cleante. CLEANTE. Voſtre mal a cauſé la douleur violente Qui l'a miſe en l'eſtat où vous l'a pouuez voir. ALCIDOR. Qu' amour & la fortune ont ſur nous de pouuoir! O coeur de Diamant helas! eſt-il poſsible Qu' à la fin la pitié vous ait rendu ſenſible? Inhumaine beauté que ie benis vos fers, Puis que vous prenez part aux maux que i'ay ſoufferts. Las! ſi la voix vous manque ain ſi que le courage, D'vn ſeul clin de vos yeux donnez m' en teſmoignage, Afin qu' au • nt ma mort ie puiſſe encore voir Ces aſtres dont ma vie adoroit le pouuoir, Pour la derniere fois ſoyez moy fauor able. ARTENICE. Eſt-ce vous mon Berger? eſt-ce vous miſerable? Quel deſeſpoir vous rend ſi ſourd au reconfort? Helas! gardez-vous bien d'aduancer voſtre mort. Ie mourr ois auec vous nos amoureuſes flames, Font dans vn meſme coeur reſpirer nos deux ames. ALCIDOR. N' ayez point cette beaux aſtres inhumains, Vous tenez pour iamais mon deſtin en vos mains, Quand meſme la douleur m' auroit l'ame rauie Vous auriez le pouuoir de me rendre la vie. ARTENICE. Ne parlons plus de mort mettons fin à nos pleurs: Quelque iour le deſtin finira nos malheurs. ALCIDOR. Tout ce que i'en veux dire eſt que mon innocence Vienne auant mon treſpas à voſtre cognoiſſance. ARTENICE. Quand d'infidelité vous ſeriez entaché Voſtre extr • me remords abſout voſtre peché. ALCIDOR. Si ie m'estois diſtrait de voſtre obeïſſance La mort ſeule pourroit expier mon offence. CLEANTE. Gueriſſez-vous tous deux pour ioüir des plaiſirs Qu'vn he ureux Hymenée appreſte à vos deſirs. ALCIDOR. Si iamais le bon heur accorde à mon enuie De voir d'vn ſi beau noeud ma franchiſe aſſeruie, Ie veux quand ie perdray la lumiere du iour Que mon dernier ſouſpir ſoit vn ſouſpir d'amour: Et que l'effort du temps à qui tout eſt poſsible Perde contre ma foy le tiltre d'inuiſible. SILENE. Ie ne me vis iamais ſi touché de pitié, Il me faut malgré moy ſouffrir leur amitié: Sus donc mes chers enfans qu'aux nopces l'on s'appreſte Ie veux dés à ce ſoir en commencer la feſte: Pardonnez-moy tous deux ſi trop iniustement I'ay touſiours trauerſé voſtre contentement. Allons donc au logis: venez auſsi Cleante Voir accomplir l'hymen d'vne amour violente: Venez diſner chez moy, vous ne treuuerezpas Ces mets ſeruis par order au ſuperbes repas, Qui de tant d'artifices ont leur graces pourueuë Qu'il ſemble n'eſtre faits que pour paiſtre la veuë, Mais ce qui ſe pourr a ſelon ma pauureté, D'vn coeur libre & ſans fard vous ſera preſenté.

ACTE QVATRIESME.

SCENE PREMIERE.

ARTENICE. CLEANTE.

ARTENICE. TV ne peux ignorer ô ma chere Cloriſe! De quelle affection ie cheris ta franchiſe? Tu lis dans mes penſers qui ne ſouurent qu' à toy, Combien ton iugement à de pouuoir ſur moy. C'eſt la raiſon mon coeur pourquoy ie t'importune De prendre maintenant le ſoing de ma fortune, Tu ſçais comme Alcidor apres ſes longs trauaux Aſelon ſon deſir ſurmonté ſes riuaux: Et comme ſon amour qui touſiours perſeuere A touché de pitié la rigueur de monpere: Ie penſe qu' à ce ſoir nous nous donnons la foy, Ie ne te puis celer l'aiſe que i'en reçoy. Mais comme à tous les biens que le Cielnous enuoye Touſiours quelque douleur ſe meſle à noſtre ioye; Vn doute aſſez faſcheux qui n'eſt point éclaircy Tenant mon coeur glacé d'vn timide ſoucy Me fait apprehender ſi ie t'oſe le dire, Le ſuccez de l'accord que mon amour deſire. CLORICE. Vous me le deuez dire & ne me rien celer Ie ſouffrirois la mort plûtoſt que d'en parler: Il ne faut rien cacher aux perſonnes qu'on aime, Ie ſuis aupres de vous comme vn autre vous-meſme, Ce ſeroit faire tord à mon affection Que de vous deffier de ma diſcretion. ARTENICE. Il faut donc aduoüer le regret qui me preſſe D'aller contre l'aduis de la bonne Déeſſe, Qui s' apparoiſt la nuict aux yeux de mon penſer, Et d'vn front couroucé me ſemble menacer, De rendre en mes amours ma vie infortunée Si ie ne me marie au ſang d'où ie ſuis née, Ie l'ay touſiours ſeruie auec deuotion Depuis que l'on me miſt en ſa protection: Auſsi ie recognois ſes graces touſiours preſtes A me fauoriſer en toutes mes requeſtes: Quand mon pere voulut inconſiderement, Preferant la richeſſe à mon contentement, Auecques Lucidas me rendre miſerable, Ce qu' elle m' ordonoit m' eſtoit fort agreable, Parce que ie ſçauois que ce riche Berger Eſtoit comme Alcidor du ſang d'vn eſtranger: Mais ma mere Chriſante à qui ie dis mon ſonge, Non ſans quelque raiſon le prinſt pour vn menſonge, Eſtimant qu' à deſſein ie l'auois inuenté Pour empécher l'accord qu' elle auoit proietté. Et moy qui ne voyois que le ſeul Tiſimandre, Où ſelon cét aduis mes voeux puiſſent pretendre, Mon coeur n'eſtant pas libre en cette election, Ce Berger fut l'obiect de mon affection. Ie fais ce que ie puis pour diuertir la flame, Qúe l'ingrate Ydalie a fait naiſtre en ſon ame: Mais ie trauaille en vain ſon tourment & le mien Font que depuis cinq, ans ie ny profiterien, C'eſt pour quoy mon amour apres tant de martyre, Ie ne puis deuiner ce que cela veut dire. Et voguant en ces flots ſans eſpoir d'aucun port I' abandonne ma bar que à la mercy du ſort, Si ton bon iugement à mon mal Salutaire Ne me donne conſeil à ce que ie dois faire. CLORISE. Toutes les Deïtez dont l'on ſert les Autels, Et de qui la bonté veille pour les mortels, Aux belles comme vous ſe monſtrent fauorables Et d'elles prennent ſoing comme de leurs ſemblables. Vous y deuez penſer auecques iugement, Et ne point reietter cét aduertiſſement. ARTENICE. Ce Berger me poſſede auec vn tel Empire Qu' il ſera mal aiſé de m'en pouuoir dédire, Et puis ſi ie ne l'ay que ſçaurois-ie eſperer. CLORISE. Les Dieux y pouruoiront il s'en faut aſſeurer, Vous en verrez l'effect & dedans peu d'eſpace. ARTENICE. Cependant ie vieillis l'occaſion ſe paſſe. CLORICE. Si la bonne Déeſſe a pour nous tant de ſoing, Croyez qu' elle viendra vous aider au beſoing: Aux choſes d'importance il faut eſtre timide, Comme elle eſt voſtre eſpoir qu'elle ſoit voſtre guide, Elle eſt auſsi puiſſante en la terre qu' aux Cieux. ARTENICE. Mais dis moy donc mon coeur que puis-ie faire mieux Que de prendre vn mary ieune, gallant, & ſage, Et qui de ſon amour m' a rendu témoignage. CLORISE. Craindre les immortels ſuiure leur volonté. ARTENICE. Il n'en faut plus parler le ſort en eſt iettée, Vos raiſons deſormais ſont pour moy ſuperflues, En vain l'on prend conſeil des choſes reſoluës: Quand les Dieux me deuroient enuoyer le trépas, Ie ne puis auoir pis que de ne l'auoir pas.

ACTE QVATRIESME. SCENE SECONDE. TISIMANDRE. VErray-ie donc touſiours mon eſper ance vaine? Per dray-ie ſans loyer ma ieuneſſe & ma peine? Brûleray-ie touſiours ſans eſtre conſumé? En vain ie pouſſe aux Cieux mes plaintes effroyables, Les Dieux ſont impuiſſans ou ſont impitoyables: Ie cherche le remede & ne veux pas guerir, Ie me déplais de viure & ne ſçaurois mourir Malheureux que ie ſuis, quelle chaude furie Me fait paſſer les iours en cette réuerie, Que me ſert de chercher les bois les plus ſecrets Pour les entretenir de mes iuſtes regrets, Imprimer ſur leur front les chifres d'Ydalie, Ne nourrir mon eſprit que de melancholie, Méditer tous les iours des ſupplices nouueaux Nous n'en ſommes pas mieux ny moy ny mes troupeaux, Mes brebis ont en nombre égalé les eſtoilles Do •• les plus claires nuicts enrichiſſent leurs voiles, Et mes jerbes laſſant le ſoigneux Moiſſonneur Rendoient les plus contents jaloux de mon bon-heur, Mais à preſent tout ſuit mes triſtes deſtinées, Mes champs n'ont que du chaume aux meilleures années Et mes pauures moutons ſe mourants tous les iours Seruent dans ſes rochers de paſture aux Vautours. Ie ſuis en me perdant l'autheur de tant de pertes, Ie n'ay plus ſoing de rien mes terres ſont deſertes, Tandis qu'en ces foreſts tout ſeul ie m'entretiens, Ie laiſſe mon troupeau ſur la foy de mes chiens. Il faut, il faut quitter cette humeur ſolitaire, Et reprendre le train de ma vie ordinaire: Chaſſer de mon eſprit ces inutiles ſoings, Qui ne veulent auoir quc les bois pour témoings. Mépriſer à mon tour celle qui me mépriſe, Et rompre ſa priſon pourr' auoir ma franchiſe. Mais, ô Dieux! qu'ay▪ ie dit, amour pardonne moy, Ie ne puis ny ne veux iamais viure ſans toy, Quand ie parle autrement ie ſuis hors de moy meſme, Contre vne deïté ie commets vn blaſpheme: Ie te voy dans ſes yeux plus puiſſant que iamais, Fais ce que tu voudras à tout ie me ſouſmets, Auſsi bien ma raiſon ne m'en ſçauroit deffendre, Le ſalut des vaincus eſt de n'en plus attendre.

ACTE QVATRIESME. SCENE TROISIESME.

TISIMANDRE. YDALIE.

TISIMANDRE. BEauté dont la nature admire les apas, Quelle heureuſe fortune a peu guider vos pas Dans ce valon affreux où mon inquietude Ne cherche que l'horreur, l'ombre & la ſolitude. ALCIDOR. Berger qui de nature eſtes ſi mal plaiſant, Quel malheureux deſtin vous conduit à preſent Dedans cette valée effroyable & profonde; Où pour fuir de vous ie fuis de tout le monde. TISIMANDRE. Vous fachez-vous de voir vn miſerable amant, Qui banny de vos yeux ne peut viure vn moment. Eſloignez-vous pluſtoſt de cét eſprit barbare, Qui ne ſçait point gouter vn merite ſirare. Tandis que vous ſuiurez ce Berger qui vous fuit, Vos plus belles ſaiſons ſe peſſeront ſans fruict. YDALIE. Tandis que vous ſuiurez vos entrepriſes vaines, Vous y perdrez ſans fruict voſtre temps & vos peines. TISIMANDRE. Puis qu' Alcidor pour vous n'a point de ſentiment, Pourquoy differez-vous de faire vn autre amant. YDALIE. Si ie ſuis inſenſible autourment qui vous preſſé, Pourquoy differez-vous de changer de maiſtreſſe. TISIMANDRE. Croyez, que ſi i'en parle auecque paſsion, C'eſt moins par intereſt que par affection: Mais ie crains que ce feu dont vous eſtes épriſe, Voſtre honneur ne ſe perde apres voſtre franchiſe: Vous ſçauez que deſia l'on murmure tout bas, De vous voir ſi ſouuent le ſuiure pas à pas. YDALIE. Quoy qu'on ait dit de moy par haine ou par enuie, Touſiours mes actions répondront de ma vie. TISIMANDRE. Bien qu'aucun à bon droit ne vous puiſſe blaſmer, D'eſtimer ſa vertu, de le voir, de l'aimer, Pourquoy recherchez-vous de penibles conqueſtes, Vous à qui le bon-heur en offre de ſi preſtes. YDALIE. Vous perdez voſtre temps, ne m'importunez plus, Ie ſuis laſſe d'ouïr vos diſcours ſuperflus. TISIMANDRE. Aquelle dures loix me voulez vous contraindre, Ne m'eſt-il pas permis en mourant de me plaindre. YDALIE. Ne vous affligez point vous n'en ſçauriez mourir, Le mal que vous auez eſt facile à guerir. TISIMANDRE. Rien ne me peut guerir du mal qui me poſſede, Si voſtre belle main n'en donne le remede. YDALIE. Le remede d'amour dépend de la raiſon. TISIMANDRE. Suiuez donc ſon conſeil pour voſtre gueriſon. YDALIE. Mon tourment eſt ſi doux qu'il m'en oſte l'enuie. TISIMANDRE. Le mien eſt ſi cruel qu'il m'oſtera la vie, Si vous ne moderez voſtre inhumanité. YDALIE. Penſez-vous m'y forcer par importunité? TISIMANDRE. Non certes, mais pluſtoſt par mon amour extreme. YDALIE. Amour m'oblige-t'il d'aimer tout ce qui m'aime? TISIMANDRE. Ouy pluſtoſt qu'vn ingrat qui ne vous aime pas. YDALIE. Ie choiſiray pluſtoſt dépouſer le trépas, Que iamais vous voyez voſtre vaine entrepriſe, Rendre deſſous vos loix ma liberté ſouſmiſe. TISIMANDRE. O cruelle beauté, quel aſtre malheur eux Se plaiſt à trauer ſer nos deſirs amoureux, Quel charme, ou quelle erreur ont troublé nos penſées? Quels traits enuenimez ont nos ames bleſſées? Quel funeſte aſcendant noſtre deſtin conduit, Qui nous fait à tous deux aimer ce qui nous fuit. Nous verrons écouler l'Auril de noſtre vie, Sans gouſter les plaiſirs où l'âge nous conuie. Et lors qu'en cheueux blancs nous les verrons finir, Nous pleurerons le temps qui ne peut reuenir. Les ans coulent ſans ceſſe, & iamais leur carriere Non plus que les torrents ne retourne en arriere. Ils faniront bien toſt la fleur de vos beautez, Et vengeront ma foy de tant de cruautez. D'ARAMET. Prenons cette victime & couronnons ſa teſte, De guir landes, & de fleurs pour honorer la feſte, Chindonnax a de ſia le bucher preparé Vous viendrez voſtre crime eſt aſſez aueré. YDALIE. Dequoy m'accuſe-t'on? quelle noire impudence Peut d'vn front aſſeuré taxer mon innocence. D'ARAMET. Vous le pourrez ſçauoir du Sacrificateur. YDALIE. O Ciel iuge de tout, ſoyez mon protecteur, Souſtenez mon bon droict contre la calomnie. TISIMANDRE. Arreſtez, arreſtez, perdez cette manie, De vouloir de mes bras ma maiſtreſſe rauir, Ie leur reſiſte en vain, ie ne luy puis ſeruir: Tout ce que ie puis faire en ce dernier of fice C'eſt de m'offrir pour elle au feu du ſacrifice.

ACTE QVATRIESME. SCENE QVATRIESME

DAMOCLEE. LVCIDAS.

DAMOCLEE. QVe ſert de me celer ce que ie veux ſçauoir, Penſez vous m'empeſcher de faire mon deuoir: Cette paſle couleur qui vous monte au viſage Du malhenr de ma fille eſt vn mauais preſage. Il eſt hors de propos de le taire à preſent, Voſtre diſcretion l'accuſe en l'excuſant. Parlez donc librement, n'vſez plus d'artifice, Celuy qui taist le mal ſemble en eſtre complice. LVCIDAS. Qui vous fait de ſiprés vn crime rechercher, Que vous-meſme deuriez à vous-meſme cacher. DAMOCLEE. Cela ne ce peut plus, cette deſeſperée Qui c' eſt pour ce malheur dis monde retirée, Par ce grand changement en elle ſuruenu, Rend de ſon déplaiſir le ſuiuect trop cogneu: Chacun ſçait le peché dont ma fille eſt blaſmée, Mon deuoir ſeulement preuient la renommée. LVCIDAS. Le deuoir vous oblige à aimer vostre enfant. DAMOCLEE. Quand il eſt vicieux l'honneur me le deffend. LVCIDAS. Quoy la loy de l'honneur est-elle ſi cruelle? Qu'elle faſſe oublter l'amitié paternelle. DAMOCLEE. Noſtre honneur ſuit touſiours la loy de l'equité, Qui veut que chacun ait ce qu'il a merité, Si ma fille eſt coupable, il faut que dans la flame Elle purge ſon corps, en expir ant ſon ame: La loy de Lute ſsie en faueur de nos Dieux Condamne l'impudique à la flame des Cieux: Donc pour eſtre pieux ſoyez moins pitoyable Et me dites le mal dont ma fille eſt coupable. LVCIDAS. Ie ne vous diray point ce que vous ſçauez bien. DAMOCLEE. Las vous me dites tout en ne me diſant rien. Ie voy bien ce que c'eſt il faudra qu'elle meure, Ie luy vois preparer ſa derniere demeure. LVCIDAS. O iuſtice eternelle à quelle impieté A la fureur d'amour mon eſprit tranſporté, Ie me verray forcé de faire vne iniuſtice, Mais ie ne ſuis pas ſeul, l'amour eſt mon complice. Cette ingrate beauté qui m'a manqué de foy A contr ainct vn dieu meſme à faillir comme moy. Innocente victime auſsi chaſte que belle Que ma jalouſe rage a rendu criminelle, Pourray-ie auoir le coeur de te voir auiourd'huy Souffrir le chaſtiment de la faute d'autruy? En ces iuſtes remors, mon Dien que puis-ie faire, Dois-ie dire ma faute, ou ſi ie la dois tatre? Pour la iuſtifier il me faut accuſer Du mal que méchamment i'ay voulu ſuppoſer. Lors que l'on a failly contre ſa conſcience, La honte de le dire eſt pire que l'offence. Il faut donc per ſiſtant à ma méchanceté, Pour pareſtre équitable accuſer l'équtté. Mais de ſia Chindonnax attend la criminelle, Il eſt temps de penſer à témoigner contr'elle.

ACTE QVATRIESME. SCENE CINQVIESME.

CHINDONNAX. DAMOCLEE. LVCIDAS. YDALIE. TISIMANDRE. DARAMET. CLEANTE.

CHINDONNAX. VOus ſerez eſtimé des hommes & des Dieux: Quand nous auons produit vn enfant vitieux Il faut de noſtre ſang retrancher ce prodige, Ainſi qu'vn mauuais bois indigne de ſa tige, Et d'vn coeur genereux témoigner conſtamment D'oublier pour l'honneur tout autre ſentiment, Mais dites-nous Vieillard comment peuſtes-vous faire Pour cognoiſtre leur faute en ce bois ſolitaire. DAMOCLEE. Lucidas decouurit leur impudicité A trauers le criſtal d'vn miroir enchanté. CHINDONNAX. Gardez-vous bien mon fils d'accuſer l'innocence Les Dieux iuſtes & bons veillent pour ſa deffence, Qui des faits incogneus arbitres & témoings Découurent toſt ou tard ce que l'on ſçait le moins. Ils parlent par ma voix des actions paſſées, Et par mes propres yeux liſans dans les penſées, My font voir clairement les faits les plus douteux: Bref, eſtant deuant moy vous eſtes deuant eux, Tirez donc de voſtre ame vn diſcours veritable, Qui rende l'accuſée innocente ou coupable. LVCIDAS. Pour quoy pere ſacré me faites vous ce tort, De vouloir que ie ſois la cauſe de ſa mort. CHINDONNAX. Vous n'eſtes de ſa mort ny cauſe ny complice Ce n'est que ſon peché qui la meine au ſupplice. LVCIDAS. Mais ſon crime ſans moy n'euſt point eſté prouué. CHINDONNAX. Mais ſon crime ſans vous fuſt touſiours arriué. LVCIDAS. Mais touſiours c'eſt par moy qu'on l'arend criminelle. CHINDONNAX. Non, mais pluſtoſt par vous la iuſtice eternelle, Dont l'abſolu pouuoir qu'elle m' • mis és mains Deffend de me celer le crime des humains. LVCIDAS. Que vous puis-ie celer, ny que vous puis-ie dire, Chacun ſçait le malheur dont ce vieillard ſouſpire, Luy-meſme vous la dit, CHINDONNAX. Auſsi ce que i'attens Eſt de ſçauoir le lieu, la façon & le temps. LVCIDAS. Deſia le chaud du iour chaſſoit la matinée Lors que c'eſt conſommé ce funeſte Hymenée. Vn bois au bord de Seine en ſon ombre a caché De ces ieunes amans la honte & le peché. CHINDONNAX. Reſte à ſçauoir l'endroit où c'eſt commis l'offence. LVCIDAS. Où le mont de Valere en la plaine s'auance. CHINDONNAX. Nous en ſçauons aſſez, retirez-vous Berger, On ameine Ydalie, il faut l'interroger. YDALIE. Quelle timide horreur ſe glace dans mon ame, Ie voy l'autel, le fer, le bucher & la flame, Qu'apreſte contre moy l'iniustice du ſort, O Dieux! combien de morts pour vne ſenle mort. CHINDONNAX. Aſſeurez voſtre eſprit, que la honte & la crainte Qui tiennent maintenant voſtre voix en contrainte, Ne vous empéche point de vous iuſtifier. YDALIE. Où montimide eſprit ſe peut-il plus fier? Le Ciel iuge de tout eſt icy ma partie, Puis que de ſon Autel, ie dois eſtre l'hoſtie. CHINDONNAX. Le Iuge de là haut exempt de paſsion Ne peut eſtre ſenſible à la corruption, Luy qui tient en ſes mains le ciel, la terre & l'onde, Accepte ſans beſoing les offrandes du monde, Et ce qu'à ces autels nous faiſons auiourd'huy C'eſt pour nous ſeulement, on ne fait rien pour luy: Mais d'vn ſi haut ſubiect nos eſprits incapables, De blaſpheme ou d'erreur ſe roient iugez coupables, C'eſt pour quoy d'vn diſcours medité promptement De qui la verité ſoit le ſeul ornement, Dites nous franchement ſans faire l'estonnée, Où vous auez paſſé toute la matinée. YDALIE. Sous le mont de Valere aupres d'vn buiſſon clos Où quelque fois la Seine a répandu ſes flots, CHINDONNAX. Quel Berger eſtoit lors en voſtre compagnie? YDALIE. Alcidor.— CHINDONNAX. —C'eſt tout dire.— YDALIE. —O quelle calomnie Me veut-on accuſer d'auoir fait dans ce bois Quelque choſe auec lny contre ce que ie dois? Que pluſtoſt ie periſſe en l'infernelle flame Que iamais ce deſir tombe dedans mon ame. DAMOCLEE. Ah pauure malheureuſe, helas! où penſois-tu? Alors que tu faiſois ce tort à ta vertu, Faut-il qu'aux yeux d'vn Iuge & d'vne populace Ie t'offre pour victime à l'honneur de ma race. YDALIE. Mon pere appaiſez-vous vn iour la verité Découurira la fraude & mon integrité, Et croyez qu'auiourd'huy, quelque mal qui m'aduienne, Ie plaindray voſtre peine autant comme la mienne. DAMOCLEE. En cét excez d'ennuis qui me vient tourmenter Ie ne ſçay quelle perte eſt plus à regretter, Celle de ſon honneur, ou celle de ſa vie. Ie ſçauois qu'à la parque elle eſtoit aſſeruie, Puis que ie ſuis mortel il ne m'eſt point nouueau, Que ce qui ſort de moy ſoit ſuiect au tombeau. Mais elle eſt ſans raiſon aux vices adonnée, D'vn pere vicieux elle n'eſtoit point née, Ah ie paſme, ie meurs. DARAMET. —Ces cris ſont ſuperflus. Il les faut appaiſer— DAMOCLEE. Ah Dieux ie n'en puis plus L'excez de la douleur m'empeſche la parole. CHINDONNAX. Allez ſage vieillard, l'Eternel vous conſole, Allez verſer chez vous ces inutiles pleurs, Sa preſence ne fait qu'augmenter vos douleurs. Or ſus il s'en va temps de conduire l'hoſtie, Qu'on appreſte l'encens, la farine roſtie, Et les couſteaux ſacrez, c'eſt trop perdre le temps. YDALIE. Me faut-il donc mourir, Dieux qu'eſt-ce que i'entens, Penſe-t'on que le Dieu que ce bois repreſente Se plaiſe à voir le ſang d'vne fille innocente. TISIMANDRE. Que ce ſoit pluſtost moy que l'on meine à la mort, Auſsi bien chacun ſçait que l'amour & le ſort M'ont condamné pour elle à mourir dans la flame. CHINDONNAX. Cela ne ce peut pas i'enporterois le blaſme, Dieu n'aime rien d'iniuſte, & iamais ne conſent De voir pour le pecheur endurer l'innocent. TISIMANDRE. Ie luy monſtrer ay donc en mourant premier qu'elle, Que ie ne ſuis pas moins courageux que fidele, DARAMET. Arreſtez-vous Berger. TISIMANDRE. Ne m'en empechez point Auſsi bien que l'amour la raiſon me l'enioint, C'eſt le meilleur aduis qu'à preſent ie puis ſuiure, Il faut ſçauoir mourir quand on ne doit plus viure. CHINDONNAX. Pour vn ſi beau ſuiect, vos pleurs ſont approuuez, Mais apres l'auoir plainte autant que vous deuez Ne nous obligez point à vous plaindre vous meſme. TISIMANDRE. Ne me deffendez point de ſuiure ce que i'aime. CHINDONNAX. Quel eſpoir vous conuie à la ſuiure au trépas, Vos yeux ny verront plus ces aimables apas, La grace, la beauté, la ieuneſſe & la gloire Ne paſſent point le fleuue, ou l'on perd la memoire. TISIMANDRE. Rien ne peut effacer les agreables traits, Dont elle a dans mon ame imprimé les attraits, L'enfer n'a point d'horreurs ny de nuicts aſſez ſombres Dont le iour de ſes yeux ne diſsipe les ombres. CHINDONNAX. Ces yeux & ce beau tainct de roſes & de lis Sous celuy de la mort ſeront enſeuelis, L'horreur qui l'accompagne eſt à toutes commune, On ny recognoiſt point la blance de la brune. TISIMANDRE. Bien heureux ſi ie perds auec le ſentiment Le feu dont ſon amour me bruſle inceſſament, Mais plus heureux encor ſi mon ame eternelle Conſerue apres ma mort l'amour que i'ay pour elle. CHINDONNAX. Toutes les paſsions qui regnent icy bas Ne ſuiuent point noſtre ombre en la nuict du trépas, Ce qu'on dit de Pluton & de ſes Eumenides, N'eſt qu'vne impreſsion qu'ont les ames timides, Ces lieux où prennent fin nos peurs & nos deſirs N'ont point de ſi grands maux ny de ſi doux plaiſirs, Que cét âge où l'amour armé de tant de flames, Commence à s'alumer dedans les belles ames, Chacun s'y rend luy-meſme heureux ou malheureux Selon qui ſe gouuerne aux plaiſirs ameureux. L'vn attache ſes voeux aux conqueſtes faciles, L'autre volant trop haut, rendles ſiens inutiles: Bref des fleurs que produit cette belle ſaiſon, L'vn en tire le miel, & l'autre le poiſon: Viuez donc & perdez cette ardeur incenſée, Qui depuis ſi long temps trouble voſtre penſée; Et ſage à vos dépens joüiſſez des plaiſirs Qu'amour & la ieuneſſe offrent à vos deſirs. TISIMANDRE. Non, non, il faut mourir, la raiſon my conuie, La mort m'eſt à preſent plus douce que la vie, I'aime mieux n'eſtre point que de d'eſtre malheureux. CHINDONNAX. Croyez-moy Tiſimandre, vn eſprit genereux, Oppoſe la conſtance au malheur qui l'irrite, Et ſe reſout pluſtoſt au combat qu' à la fuite. TISIMANDRE. Lamort ſeule a pouuoir de vaincre mon ennuy. CHINDONNAX. Quelle erreur de mourir pour la faute d'autruy. TISIMANDRE. Mais quelle erreur pluſtoſt de iuger l'innocence Sans vouloir ſeulement écouter ſa deffence. CHINDONNAX. Il faut que laſchement ie me laiſſe outr ager: Car quel mal puis-ie faire à ce ieune Berger, Que celuy que luy-meſme à luy-me deſire? TISIMANDRE. La peur ne me fer a ny taire ny dédire, Ie veux ouïr l'auteur de cette fauſſeté, Qui veut taxer l'honneur de ſa pudicité. CHINDONNAX. Bien vous ſer ez content dites que l'on r'appelle Ce Berger, qui n'aguere a témoigné contr'elle. YDALIE. A quel point m'a reduit la cruauté des Cieux, Qu'il faille qu'en mour ant les hommes & les Dieux Cognoi ſsent ſa conſtance & mon ingratitude? CHINDONNAX. Voicy ce qu'on attend auec inquietude. Venez-ça mon amy, dites la verité, Comment l'a viſtes-vous en ce verre enchanté? LVCIDAS. Apeine le Deuin auoit dit les paroles, Que la magie enſeigne en ſes noires écoles, Qu'il reſſort de ſon antre, & m'apporte vn criſtal, Qui fait voir à mes yeux le bocc age fatal, Où ces ieunes amans francs de honte & de blaſme Eſteignent tous les iours leur amoureuſe flame. TISIMANDRE. Oſez-vous miſerable accuſer les abſents? Sur l'obiect qu'vne glace a produit à vos ſens. LVCIDAS. I'ay regret de luy rendre vn ſi mauuais of fice, Mais il me faut vouloir ce que veut la Iuſtice. CLEANTE. Graces aux Immortels, nos amans ſont vnis, Les pleurs ſont appaiſez, les tourments ſont finis, D'vne extreme douleur vient vne extreme ioye, L'on plaint à tort le mal que l'amour nous enuoye, Qui vit deſſous ſes loix doit tou ſiours eſperer, Il fait rire à la fin ceux qu'il a fait pleurer. LVCIDAS. Quelle bonne nouuelle en ce lieu vous ameine? CLEANTE. La nopce qui ſe fait au logis de Silene. LVCIDAS. Peut-on parler de nopce, & voir tant de malheurs. CLEANTE. Laize de toutes parts a terminé les leurs. Ala fin d'Alcidor le fidele ſeruice A touché de pitié la Bergere Artenice, De ſon bon heur extreme vnchacun ſe reſſent, Il s'eſpouſe demain, le bon homme y conſent, Son logis eſt deſia tapiſſé de ramées, De fenoüil & de fleurs les ſales ſont ſemées, Et de ſia maints aigneaux victimes du feſtin, Le couſteau dans la gorge acheuent leur deſtin. LVCIDAS. O Dieux! quel changament, quelle eſtrange nouuelle, O Bergere inconſtante, ô teſte ſans ceruelle! Où ſont allez ces voeux pleins de zele & de foy? Ser as-tu donc pariure à ton Dieu comme à moy? Ie croy que ta promeſſe eſtoit plus incertaine, Que les enchantements du deuin Poliſtene. TISIMANDRE. Remarquez ce qu'il dit, écoutez-le parler. LVCIDAS. O Dieux le deſeſpoir me fait tout deceler. DARAMET. Ie voy la verité, luy-meſme la confeſſe, Lucidas enragé de voir que ſa maiſtreſſe Des flames d'Alcidor auoit le coeur touché, A par l'art du Deuin produit ce faux peché, Qui deceuant les yeux & l'ame d'Artenice, La rend de cette erreur innocemment complice. CHINDONNAX. Cela n'eſt pas ſans doute, il faut tout à loiſir Y penſer meurement, & pendant ſe ſai ſir, Du Deuin & de luy, peut-eſtre en la torture Ils pourront l'vn ou l'autre auoüer l'impoſture. LVCIDAS. Par donnez au Deuin, i'ay tout tout ſeul merité Le iuſte chaſtiment de cette iniquité, I'en ſuis le ſeul autheur, il n'en eſt que complice. CHINDONNAX. Puis qu'il a confeſſé ſon in ſigne malice, Qu'on mette hors des fers cette ieune beauté, Qui recouure l'honneur auec la liberté. Et que cét impoſteur y ſoit mis en ſa place, C'eſt à vous d'or donner ce qu'il faut qu'on en face, Prononcez donc ma fille ou ſa vie ou ſa mort. LVCIDAS. Belle ame qui pouuez diſpoſer de mon ſort, Si iamais les ſouſpirs d'vn amant miſerable Ont peu tirer de vous vn regard fauorable, Si vous auez le coeur auſsi doux que les yeux, Mettez fin à mes iours, ce ſera pour le mieux, Ie voy de tant d'ennuis ma fortune ſuiuie, Que me donner la mort c'eſt me donner la vie. YDALIE. Non, tu ne mourr as point, ie veux pour te punir Qu'à iamais ton peché viue en ton ſouuenir. CHINDONNAX. Laiſſez-le donc aller— LVCIDAS. —O Dieux quelle ſentence! Faut-il douc qu'à iamais ie pleure mon offence? YDALIE. Et vous fidele amant, mon ſupport mon bon-heur, Dont ie tiens à preſent ma vie & mon honneur. De quel digne loyer qui ſoit en ma puiſſance Puis-ie recompenſer voſtre extreme conſtance? En vous donnant mon coeur ie ne vous donne rien, Vous l'auez racheté, c'eſt voſtre propre bien: Diſpoſez donc de moy fidele Tiſimandre, L'amour & le deuoir m'obligent à me rendre. TISIMANDRE. O l'heureux accident! en fin mon cher ſoucy, L'amour at'il touché voſtre coeur endurcy, Belle & chere maiſtreſſe, en fin eſt-il croyable Que ma fidelité vous rende pitoyable, Et que ces deux ſoleils dont le Ciel eſt jaloux, Se rendent à mes voeux ſi iuſtes & ſi doux? YDALIE. Vos extremes faueurs certes ie le confeſſe M'ont fait voſtre captiue & non voſtre maiſtreſſe: Oubliez donc ce nom, viuez plus franchement. TISIMANDRE. Vous auez tout pouuoir vſez-en librement, Mon coeur eſt voſtre eſclaue, il ne vous peut dédire, L'heur de vous obeïr eſt tout ce qu'il de ſire, Il ſe tient trop heureux d'eſtre en voſtre priſon. YDALIE. Quittons là ces diſcours qui ſont hors de ſaiſon, Et ſupplions chacun de rendre témoignage De l'accord mutuel de noſtre mariage. TISIMANDRE. Allons donc mon ſoleil rendre nos voeux contens. YDALIE. Allons le plus parfait des Bergers de ce temps. CHINDONNAX. En fin des Immortels la iuſtice prof onde A découuert la fraude aux yeux de tout le monde, A la fin chacun voit que leur bras tout puiſſant Sçait punir le coupable & ſauuer l'innocent, Et quelque empeſchement que l'artifice apporte, Touſiours la verité ſe trouue la plus forte.

ACTE CINQVIESME.

SCENE PREMIERE.

Le vieil ALCIDOR. CLEANTE.

Le vieil ALCIDOR. NE ſçaurois ie trouuer vn fauorable port Où me mettre à l'abry des tempeſtes du ſort? Faut il que ma vieilleſſe en triſteſſe feconde, Sans eſpoir de repos erre par toutle monde? Heureux qui vit en paix du laict de ſes brebis, Et qui de leur toiſon voit filer ſes habis, Qui plaint de ſes vteux ans les peines langoureuſes, Où ſa ieuneſſe a plaint les flames amoureuſes; Qui demeure chez luy comme en ſon élement, Sans cognoiſtre Paris que de nom ſeulement, Et qui bornant le monde aux bords de ſon domaine Ne croit point d'autre mer que la Marne ou la Seine. En cét heureux eſtat le plus beau de mes iours Deſſus les riues d'Oiſe ont commencé le cours. Soit que priſſe en main le ſoc ou la faucille, Le labeur de mes bras nourriſſoit ma famille; Et lors que le Soleil en acheuant ſon tour Finiſſoit mon tr auail en finiſſant le iour, Ie trouuois mon foyer courouronné de marace, A peine bien ſouuent y pouuois-ie auoir place, L'vn giſoit au maillot, l'autre dans le berceau, Ma femme en les baiſant déuidoit ſon fuſeau. L'vn écalloit des noix, l'autre teill oit du chamvre, Iamais l'oi ſiuet é n'entroit dedans ma chambre, Auſsi les Dieux alors beniſſoient ma maiſon, Toutes ſortes de biens me venoient à foiſon. Mais helas! ce bon-heur fut de peu de durée, Auſsitoſt que ma femme eut ſa vie expirée Tous mes petits enfans la ſuiuirent de prés, Et moy ie reſtay ſeul accablé de regrets, De meſme qu'vn vieux tronc relique de l'orage, Qui ſe voit dépoüillé de branches & d'ombrage. Ma houlette en mes mains, inutile fardeau, Ne regit maintenant ny cheure ny troupeau, Vne ſeule brebis qui m'eſtoit demeurée S'eſtant loin de ma veuë en ce bois égarée, Y ietta ſon petit auec vntel effort, Qu'en luy donnant la vie, il luy donna la mort. Voyant tant d'accidens m'arriuer d'heure en heure, Ie cherche a me loger en vne autre demeure, Pour voir ſi ce malheur à ma fortune ioint, En quittant mon païs ne me quitter a point. Et ſiles champs où Marne à la Seine ſe croiſe Me ſeront plus heureux que le riuage d'Oiſe. CLEANTE. Ne cherchez point ailleurs où vous mettre en repos, Vous ne ſçauriez trouuer vn leu plus à propos, Pour rendre voſtre vie en tous biens fortunée, Nos fertilles couſteaux portent deux fois l'année, Et les moindres épics qui dorent nos guerets S'égalent en grandeur aux cheſnes des foreſts. Icy le bien ſans peine abonde en nos familles, Et nos champs vſent moins de ſocs que de faucilles. Icy le doux zephir Roy de noſtre Oriſon Faict de toute l'année vne ſeule ſaiſon. La Nimphe de la Marne, & le Dieu de la Seine, Qui pour leur mariage ont choiſi ceſte plaine Nous teſmoignent aſſez par leurs tours & retours Le deplai ſir qu' ils ont d'en éloigner leur cours. L'impitoyable horreur des foudres de la guerre A quittê par reſpect cette fertille terre; La iustice & la paix y regnent à leur tour, Nous n'y ſommes bruſlez que des flames d'amour. Mais helas! de ce Dieu les flames & les charmes Cauſent bien dans nos champs de plus grandes alarmes Que ne faiſoient jadis ces bataillons épars, Que la rebellion ſemoit de toutes pars. Encore à ce matin cette boüill ante rage Animant d'Alcidor l'impetueux courage, L'a fait ietter dans leau, d'où la force du vent L'a remis à lariue auſsi mort que viuant. Le vieil ALCIDOR. Et comment? Alcidor eſt-il encore en vie? CLEANTE. Vous le pourrez bien voir s'il vous en prend enuie, Il épouſe à ce ſoir cette aimable beauté, Pour qui dedans la Seine il s'eſt precipité: I'offre à vous y mener. Le vieil ALCIDOR. Allons à la bonne heure, Ie ne pouuois trouuer de fortune meilleure; Le de ſir de reuoir ce que i'ay tant aimé Ranimeroit mon corps au cercueil enfermé.

ACTE CINQVIESME. SCENE SECONDE.

SILENE. DAMOCLEE. CLORISE. ALCIDOR. ARTENICE. CRISANTE.

SILENE. EN fin la deſtinée eſt à mes voeux propice, Ma volonté s'accorde à celle d'Artenice, En fin apres l'orage arriue le beau temps, La fin de nos malheurs rend nos de ſirs contens. Ie jure qu'à preſent ie le ſuis autant qu' elle, De ce qu' elle a choiſi vn amant ſi fidele: Allons donc mes enfans, allons tout de ce pas, Nos voiſins aſſemblez nous attendent là bas, Et de ſia dans le bourg toute la populace Au ſon des violons s' aſſemble dans la place. Mais qui cognoiſt celuy qui vient tout droit à nous? ARTENICE. Vous le pouuez cognoiſtre. SILENE. Ha! mon frere eſt-ce vous? Ie n'auois pas oſé vous prier de la feſte, Croyant que le malheur, qui voſtre fille arreſte A ſouffrir dans le feu ſon iuſte chaſtiment, Toucheroit voſtre coeur de quelque ſentiment. DAMOCLEE. Mon frere mon amy, ie n'en ſuis plus en peine, Dieu qui des innocens eſt la garde certaine, A dé couuert la fraude, & m' a deſabuſé Du crime que contr' elle on auoit ſuppoſé. Ie vous viens faire part de l'exce ſsiue ioye Qu'apres tant de malheurs la fortune m'enuoye. SILENE. Qui vous a découuert cette méchanc eté? DAMOCLEE. Lucidas, de colere & d'amour tranſporté. Quand il ſceut qu' Acidor malgré ſon artifice Eſpouſoit à ce ſoir voſtre fille Artenice, Se trouble, ſe confond & parmy ſes regrets Larage ouurant la porte à ſes penſers ſecrets, Il rend ſa calomnie à chacun apparente, Il eſt iugé coupable, & ma fille innocente Reçoit l'affection de ſon fidelle amant, Qui lors voulut pour elle endurer le tourment. CLORISE. Quoy? cette ame endurcie en fin ſe laiſſe prendre Aux obligatious du Berger Tiſimandre? Quoy? celle qui brauoit l'amour & ſon pouuoir S'eſt donc renduë eſclaue aux chaines du deuoir? DAMOCLEE. C'eſt ce que i'en apprens d'vn meſſager fidele. SILENE. Ie ne pouuois ſçauoir de meilleure nouuelle, Nos coeurs n'ayent qu'vn but, & qu'vn meſme de ſir, Se font part de leur ioye & de leur déplaiſir, Et ſembl • nt qu'en naiſſant la main des Deſtinées Dans vne meſme trame ait ourdy nos années. ALCIDOR. Ala fin on cognoiſt auecque l'équité Le tort que l'on faiſoit à ma fidelité, En fin, mon beau Soleil, malgré la médiſance Les plus beaux yeux du monde ont veu mon innocence, L'amour eſt équitable, il le témoigne aſſez, Ceux qui l'ont bien ſeruy ſont bien recompenſez. ARTENICE. Voſtre foy, mon Berger, ſi long temps maintenuë Auant ſon arriuée eſtoit aſſez cogneuë, Ce que i' apprens de luy n' augmente nullement Ny mon affection, ny mon contentement, Rien ne peut augmenter les choſes infinies. SILENE. En fin de toutes parts nos craintes ſont bannies, Ne perdons point de temps en diſcours ſuperflus Allons, mes chers enfans, il ne nous reſte plus Que d'accomplir les voeux de voſtre mariage. CRISANTE. Ie crains bien qu'il ne ſoit de ſiniſtre preſage. ARTENICE. Quel timide ſoupçon vous fait ainſi parler? CRISANTE. Ce que pour voſtre bien ie ne dois point celer. ARTENICE. Dieu qui peut empécher ce que chacun deſire; CRISANTE. Vous-meſme le ſçauez ſi vous le voulez dire. ARTENICE. Ie n'entens point cela, ſi vous ne l'expliquez, Ie croy que c'eſt vn ſonge, ou que vous vous mocquez. CRISANTE. C'eſt de vray l'vn des deux, ie ne m'en ſçaurcis taire Il faut pour nous ſeruir, quelquefois nous de plaire. La grande Deïté fauorable aux mortels, Qui les hommes bannit de ſes chaſtes autels S'eſt fait voir à mes yeux auſsi belle que ſaincte, Telle que noſtre foy dans nos ames l'a peinte. D'vne voix éclatante, & d'vn front irrité Apres auoir reprins mon incredulité; M'a dit ainſi qu'à vous, que i'euſſe ſouuenance De ne vous marier que par ſon ordonnance: Son ſalutaire aduis ne fut pas entendu Quand par ſa propre bouche il vous fut deffendu De ne prendre mary que dans voſtre lignage, Parce que vos mépris nous donne témoignage Que voſtre affection ne pouuoit approuuer L'hymen que Lucidas s'efforçoit d'acheuer; Ie creu que vous penſiez auec ſes artifices De voſtre inimitié rendre les Dieux complices: Mais ces dernieres nuicts ſapreſence & ſa voix M'ont oſté tout à faict le doute que i'auois. La vigne qui pendoit au deſſus de ſa teſte, Me la fiſt remarquer comme elle eſt à la feſte, Où comme elle estoit lors que ma deuotion Confia voſtre vie en ſaprotection; Peut-eſtre preuoyant ce fatal Hymenée, Sa faueur prend ce ſoin de voſtre deſtinée: Si donc vous en auez de voſtre vtilité Ne vous mariez point contre ſa volonté. SILENE. C'eſt le meilleur aduis, quoy que vous puiſsez dire Que de ne faire rien que ce qu'elle deſire. ARTENICE. Que deuiendr ay-ie donc? chetiue que ie ſuis? Que ne m'a ton permis de fiuir mes ennuis? Dans ce paiſible lieu, franc d'amour & d'euuie Où ma bonne fortune auoit conduit ma vie? ALCIDOR. Quoy donc, chere beauté, nous fera-ton ce tort De vouloir pour vn ſonge empécher noſtre accord? Pour vne viſion, vne ombre, vne chimere, Qui s'engendre au cerueau de voſtre vieille mere Veut-on récompenſer mon ſeruice de vent? CRISANTE. Cecy n'eſt point l'effect d'vn ſonge deceuant, Produict d'vn faux obiect, ou vapeur incognuë Au debile cerueau d'vne vieille chenuë Ma fille qui ſçait bien quelle eſt la verité, Ne m'accuſera point de l'auoir inuenté. CLORISE. Berger ne croyez point que ce ſoit vne fable, Ce que vous dit Criſante eſt choſe veritable. ALCIDOR. Quelle preſumption de croire que les Dieux Qui la haut ſont rauis en la gloire des Cieux, Daignent penſer en nous, qui ne ſommes que terre; Leur ſoing eſt d'éclairer ce que le Ciel enſerre, Regler le mouuement de tant d'aſtres diuers, Separer les Eſtez d'auec ques les Hiuers; Sauourer les douceurs dont leurs coupes ſont plaines, Et non pas s'umuſer aux affaires humaines. CLORISE. Les Dieux ne'ſont point tels comme vous les penſez, Bien qu'à de plus grands ſoings ils s'occupent aſſez; Toutes fois Alcidor leur ſageſſe profonde Songe à tout ce qui vit ſur la terre & dans l'onde: Tous les iours leurs effects le font voir clairement, Et c'eſt impieté de le croire autrement. ALCIDOR. S'ils penſent aux mortels ce n'eſt que pour me nuire. CLORISE. O Dieux! à quel Demon vous laiſſez vous ſeduire? Ne parlez pas ainſi de la Diuinité, Elle vous puniroit de voſtre impieté. ALCIDOR. Quelle faſſe de moy tout ce qu' elle deſire, Mon mal eſt en tel point qu'il ne peut eſtre pire: Celle par qui ie perds l'eſpoir de me guerir, Peut m'empécher de viure & non pas de mourir. ARTENICE. Gardez vous bien Berger d'auancer vos anées, Ma vie & mon amour ſont envous terminées. Viuez pour Artenice.— ALCIDOR: —O quel commandement! Faut-il donc que pour vous ie ſouffre inc eſſamment? Ne vaudroit-il pas mieux qu'vne mort genereuſe Eſteigniſt de mon coeur cette flame amoureuſe, Et banniſt de vos yeux ce miſerable amant Qui ne ſert qu'à troubler voſtre contentement? Bien, bien, ie viuray donc en quelque ſolitude, Où vous n' aurez point part à mon inquietude. Loing des bords de la Seine en ces lieux écartez, Que les mers d'Occident baignent de trois coſtez, Où pour nourrir le feu de noſtre amour paſſée Voſtre object à iamais viura dans mapenſée. ARTENICE. O Dieux! que deuiendray-ie apres tant de malheur Quoy? vous me laiſſez donc en proye à la douleur, Où trouueray-ie vn port en toutes ces tempeſtes, Le Ciel eſt inflexible à toutes mes requeſtes. CLORISE. Tous ces pleurs & ces cris ne vous ſeruent derien, Vous eſtes chere aux Dieux, ils le témoignent bien: Ils faut eſperer d'eux voſtre bonne aduenture, Le ſoin qu'ils ont de vous m'en donne bon augure. ARTENICE. D'où peut-elle venir?— CLORISE. De leurs fatales mains D'où les biens & les maux arriuent aux humains. ARTENICE. Auſsice n'eſt qu'en eux où mon eſpoir ſe fonde, Il faut, il faut pour eux abandonner le monde, Et chercher mon repos en ſeruant leurs autels, Puis qu'on me le refuſe auecque les mortels. CLORISE. Elle plaint à bon droit l'ennuy qui l'amenace, Puis que le ſeul Berger qui reſtoit de ſa race Eſt auec Ydalie engagé par la foy. DAMOCLEE. Tiſimandre ſe trompe il ne peut rien ſans moy, Ie ne permettray point que cela s' accomplice, Ie le veux redonner à l'amour d'Artenice. CLORISE. Voſtre bon naturel luy vient tout à propos, Elle tiendra de vous l'eſpoir de ſonrepos, Pourueu que ce Berger y vueille condé cendre. SIELENE. Quand meſme il le voudroit, ie ny dois pas entendre, C'eſt vne honneſteté que mon frere me fait. CHRISANTE. Il peut trouuer ailleurs des gendres à ſouhait, Il n'a pas comme vous ſa volonté bornée, Auſsibien Ydalie eſt ailleurs enclinée, C'eſt pluſt oſt par deuoir que ce n' eſt par amour, Elle ne l'aimoit point auparauant le iour. Ie ſçay bien qu' en ſon coeur elle aimeroit mieux pre: Alcidor pour mary, que non pas Tiſimandre: C'eſt pour quoy ſi mon frere en eſtoit conſentant Vn double Hymen rendroit tout le monde content. DAMOCLEE. Vous m' auez preuenu, ie vous le voulois dire, Ce que vous deſirez eſt ce que ie deſire. SILENE. Que l'on s' enquere donc du vouloir d'Alcidor. CLORISE. Il ne peut mieux auo ir quand il ſerort tout d'or, Ie m' enuay le chercher pour luy faire ouuerture De l'heur inopiné que le ſort luy procure. ARTENICE. Miſerable Artenice où ſera ton ſupport, Mes ſouſpirs & mes pleurs ſont-ils ſans reconſort, O Dieux qui diſpoſez dela terre & de l'onde, Arbitres abſolus des fortunes du monde, Vous dont les affligez implorent le ſecours, Finiſſez mes ennuis ou finiſſez mes iours. Faut-il tant de longueur en choſe ſi legere Il n'y va que du ſort d'vne pauure Bergere. Pour quoy m' ordonnez-vous iniuſtice des Cieux! De borner mes deſirs au ſang de mes ayeux? Voulez-vous l'imiter en choſes ſipetites La puiſſance d'vn Dieu qui n'a point de limites? Eſt-ce auec que raiſon que vous m' auez enioinct De donner mon amour à qui ne la veut point? Ce conſeil me déplaiſt ie ne le ſçaurcis ſuiure, Pour le ſeul Alcidor ie veux mourir & viure. C'eſt celuy dont mon coeur a fait élection, Ie n'en veux conſulter que mon affection. Chanſon d'ALCIDOR. Noir ſéiour de l'horreur, tenébreuſes valées Que du monde & du iour nature à reculées, Agreable repos des eſprits languiſſants Dans l'abiſme d'enfer dont vous eſtes voiſines Les vengeances diuines Ont elles rien d'égal aux peines que ie ſens? I' entens de ſia la voix d'vn iuge inexorable, Ie voy deſia l'appreſt du tourment per durable Que pour les malheureux ont les Dieux eſtably: Mais le diuin flambeau dont i' adore la flame A fait que pour mon ame, La mort eſt ſans repos, & l'enfer ſans oubly.

ACTE CINQVIESME. SCENE TROISIESME.

CLORISE. ALCIDOR.

CLORISE. IE perds en vain mes pas en ces rochers deſerts, Mes paroles en vain ſe perdent dans les airs, Ie n'entens aucun bruit plus ce bois eſt paiſible Et plus ſa ſolitude à mes ſens eſt horrible: Ces antres tenebreux ne ſont point ſans danger, Ie ne voy dans ces champs ny troupeau ny Berger, I'ay perdu mon chemin, ie ne trouue perſonne, La frayeur me ſaiſit, toute choſe m'eſtonne: Mes yeux de tous coſtez percent l'ombre des bois, Les rochers les plus durs répondent à ma voix: Et ſi ie ne voy rien, ny ne puis rien entendre, Mes pas irreſolus ne ſçauent où ſe rendre: Ie me confonds au choix de ſes chemins diuers, En cherchant Alcidor moy-meſme ie me perds. Mais i' entends ce me ſemble vne voix deſolée, Que le vent me rapporte au long de la valée, Seroit-ce point la ſienne, il y faut aller voir. ALCIDOR. Qu'eſt-ce qui dans ce bois me peut apperceuoir; I'entends quelqu'vn venir. CLORISE. O bons Dieux! c'eſt luy meſme, Le voila de ſon long tout penſif & tout bleſme, Berger quittez ces pleurs, ils ſont hors de ſaiſon, Deſormais vos ſouſpirs n' auront plus de raiſon, Voſtre contentement eſt en voſtre puiſſance La fortune vous offre vne bonne alliance, Le pere eſt conſentant, il ne tient plus qu' à vous Ce ſera voſtre bien au iugement de tous; Vous cognoiſſez la race & le nom d'Ydalie, Et de quelle richeſſe ſa maiſon eſt remplie. ALCIDOR. Puis que ie voy le ſort m' eſtre ſi rigoureux Il vaut mieux que tout ſeul ie viue malheureux, Que de luy faire part des mauuaiſes fortunes Qui depuis le berceau m'ont eſté ſi communes. CLORISE. Quel ſuiect auez-vous de vous plaindre duſort. ALCIDOR. De ce qu'il ne me donne où la vie ou la mort. CLORISE. Voudriez vous par la mort finir voſtre martyre? ALCIDOR. Ouy ſi ie ſuis priué du bien que ie deſire. CLORISE. Qui vous fait deſirer ce que le Ciel deffend? ALCIDOR. Le malheur d'eſtre eſclaue au pouuoir d'vn enfant. CLORISE. Aucun n'eſt prins d'amour s' il ne ſe laiſſe prendre. ALCIDOR. Meſmes les immortels ne s'en peuuent deffendre. CLORISE. La raiſon de ce mal eſt le contre-poiſon. ALCIDOR. De puis qu'il eſt extréme on n'a plus de raiſon. CLORISE. Le temps ſeul peut guerir cette chaude furie. ALCIDOR. Ny le temps ny la mort ne l'arendra guerie. CLORISE. Ne vous laſſez-vous point de tant de maux ſoufferts. ALCIDOR. Mon coeur ne peut auoir de plus aimables fers. CLORISE. Il faut qu' vne autre flame en chaſſe la premiere. ALCIDOR. Rien ne peut du Soleil effacer la lumiere. CLORISE. Oubliez, oubliez, ces folles paſsions, Donnez vn autre obiect à vos affections. ALCIDOR. Briſons-là ce diſcours, voſtre entrepriſe eſt vaine, Apres auoir aimé la fille de Silene Ie ne puis moderer vn feu ſi vehement, Si ce n'eſt par la mort ou par • éloignement, Il faut pour la quitter que ie quitte la France. CLORISE. Helas que fera-t'elle en voſtre longue abſcence? Elle qui ne reſpire & ne vit que pour vous. ALCIDOR. Elle eſteindra ſa flame aux bras d'vn autre époux, Qui ſera de ſarace & de ſon voiſinage. CLORISE. Pour le moins rendez-luy le dernier témoignage De voſtre affection. ALCIDOR. Ce la ne ferarien Qu' augmenter à la fois ſon tourment & le mien. CLORISE. Alcidor croyez moy, voyoz cette Bergere Souuent le bon-heur vient lors que moins on l'eſpere; Le Ciel a ſoin de vous, les Dieux par leur bonté Vous peuuent redonner ce qu' ils vous ont oſté. L'on a veu ſurmonter de plus facheux obſtacle Reuenez auec moy. ALCIDOR. Combien que ſans miracle Ie ne puiſſe eſperer mon ſalut qu' au trépas, Ie ſuiuray donc encor voſtre aduis & vos pas.

ACTE CINQVIESME. SCENE QVATRIESME

TISIMANDRE. YDALIE.

TISIMANDRE. ALa fin ma rebelle a cogneu ma conſtance, A la fin mes trauaux ont eu leur recompence, A la fin i' ay fait tréue auec ques les malheurs, L'amour dans ſon carquois me preſente des fleurs, A la fin ma Déeſſe eſt à mes voeux propice, Comme les autres Dieux elle aime la iuſtice, Et ſçait recompenſer le zele des mortels, De qui la pieté reuere ſes autels: Allons mon beau Soleil, le deuoir nous conuie, d'auoir l'aduis de ceux dont vous tenez la vie. YDALIE. Cela ſera facile, il n' en faut point douter, L'honneur de vous auoir n' eſt point à reietter. TISIMANDRE. Allons donc le chercher, ie croy que voſtre pere Eſt allé voir la nopce au logis de ſon frere. Mais ne voyez-vous pas quelque gens amaſſez, Qui de ſia vers le bourg ſe ſont fort aduancez? Ne la ſeroit-ce point? YDALIE. Ils en ont l'aparence. TISIMANDRE. d'où leur pourroit venir vn ſi pronfond ſilence? Ils n'ont ny violons, ny flutes, ny haubois, Apeine ſeulement peut-on ouïr leur voix, On n'oit point retentir des chanſons d'Hymenée, Qui les rend ſi penſifs en ſi bonne iournée? Ils ſçauancent vers nous, haſtons-nous viſtement, Nous ſçaurons le ſuiect de leur eſtonnement.

ACTE CINQVIESME. SCENE CINQVIESME.

YDALIE. DAMOCLEE. TISIMANDRE. SILENE. CRISANTE. CLORISE. ARTENICE. ALCIDOR. CLEANTE. Le vieil ALCIDOR. LVCIDAS.

YDALIE. VOila celuy mon pere, à qui ie dois la vie, Si vous le trouuez bonle deuoir me conuie De receuoir les voeux de ſon affection, Et mettre ma franchiſe en ſa protection Dans les noeuds eternels d'amour & d'Hymenée. DAMOCLEE. Vous y venez troptard, ma parole eſt donnée. TISIMANDRE. Comment? eſt-il quelqu'vn enuieux de mon bien, Qui me vouluſt rauir ce que i' ay rendu mien, Que deuiendroit ma peine & ma perſeuerance Dont ie n' ay que ſa foy pour toute recompence? DAMOCLEE. Elle n'a point pouuoir de vous donner ſa foy, Puis que ie ſuis ſon pere elle dépend de moy: Alcidor eſt celuy que ie veux pour mon gendre. YDALIE. Il eſt vray qu' autrefois i' euſſe peu condécendre Areceuoir l'amant que l'on m' offre auiourd'huy, Mais n' eſtant plus à moy, ie ne ſuis plus à luy: Ce Berger témoignant ſon amour exceſsiue En me tirant des fers m'a rendu ſa captiue. DAMOCLEE. Vous luy feriez grand tort de l'amuſer à vous, De la belle Artenice il doit eſtre l'eſpoux, Le Ciel nous le commande, & chacun le ſouhaite. ARTENICE. Encor que l'on l'ait dit ce n'eſt pas choſe faite, Il faut auparauant cognoiſtre ſon amour, Artenice n'eſt point la conqueſte d'vn iour: Quand ſes voeux par cinq ans me l'auront témoignée, Comme il a par cinq ans la mienne dédaignée▪ A l'heure ie verray ſi ie ſeray pour luy. YDALIE. D'où nous prouient ce trouble autheur de tant d'ennuy Qui s'oppoſe au bon▪ heur où tout le monde aſpire? SILENE. Lavolonté des Dieux qu' on ne peut contredire, Qui deffend que ma fille épouſe vn eſtranger, Faites vn autre amant laiſſez moy ce Berger Ie tiendr ay mon bon-heur de voſtre courtoiſie. CRISANTE. Vous ne iouïirez pas à voſtre fantaſie Du deſir d'vn Berger amoureux comme il eſt, Ny du pouuoir d'vn Dieu qui fait ce qui luy plaiſt. TISIMANDRE. Ne penſez plus à moy puis qu'en ma propre terre Les hommes & les Dieux me declarent la guerre, Ie vois chercher ailleurs ou mon pis ou mon mieux. ARTENICE. Et moy dont le malheur eſt ſi contagieux. A quoy me reſoudray-ie, où ſer a ma retraicte, Toute choſe s'oppoſe àce que ie ſouhaite. N'euſt-il pas valu mieux eſtre morte en naiſſant, Et voir mon triſte ſort finir en commençant, Que de le voir touſiours trauer ſer tout le monde? CRISANTE. Certes ie ne ſçay pas où noſtre eſpoir ſe fonde, Ie n'entends que ſouſpirs, ie ne voy que malheurs. DAMOCLEE. Peut-eſtre qu' Alcidor mettra fin à nos pleurs: Oyons ce qu'il dir a le voicy qu'il arriue. ALCIDOR. Puis qu' apres tant d▪ennuys le deſeſpoir me priue De l'aiſe & de l'honneur de viure auec que vous, Puis que dans vn ſeiour ſi fertile & ſi doux Ie ne puis aſſeurer le repos de ma vie, Auant que vous quitter le deuoir nous conuie De teſmoigner à tous que iuſques au cercueil Ie vous reſte obligé de voſtre bon accueil. Vueille le tout puiſſant, à mes voeux fauorable Vous payer les biens-faicts dont ie ſuis redeuable Puiſsiez-vous voir ſans fin en toutes les ſaiſons L'abondance & la paix regner en vos maiſons. Et vous chere beauté dont i'adore la flame Puiſsiez vous a iamais belle ame de mon ame Auoir autaut de biens & de contentements Que voſtre affection ma couſté de tourments. Pour moy le ſeul eſpoir de mon inquietude Eſt de paſſer ma vie en vne ſolitude, Et cacher dans l'horreur de quelque antre ſecre • Celuy ſur qui le iour ne luiſt plus qu' à regret. Adieu donc, belle Seine, adieu campagnes vertes, Complices & témoins de mes peines ſouffertes. CLORISE. Eſt-ce làle ſuject qui vous a ramené Voulez vous donc touſieurs demeurer obſtiné. Ny prieres ny pleurs n'ont-ils point de puiſſance? Auez-vous reſolu d'abandonner la France? Où tout le monde a ſoin de voſtre auancement? ALCIDOR: Y ſcauroy-ie trouuer aucun contentement; Et voir touſiours l'obiect qui trauerſe ma vie? CLORISE. Pour le moins Alcidor contentez noſtre enuie, De demeurer encore vne heure auecque nous. ALCIDOR. Cela ne ſeruiroit qu' à vous affliger tous. CRISANTE. Au contraire, Alcidor, c' eſt de voſtre preſence Que nos maux eſperoient d'auoir leur allegeance. ALCIDOR: D'vn eſprit accablé de mortelles douleurs Qu'en pouuez-vous auoir que des cris & des pleurs. ARTENICE. Si iamais i' eu pouuoir deſſus voſtre courage Rendez-m'en auiourd'huy le dernier témoignage, Donnez moy ſeulement ce qui reſte du iour. ALCIDOR. Ie ne puis reſiſter au pouuoir de l'amour, Il vous faut obeïr, ô ma chere Déeſſe, Pour la derniere fois vous ſerez ma maiſtreſſe. CRISANTE. Ala fin nous l'aurons ce coeur de diamant Aux l'armes d'Artenice à quelque ſentiment. Il nous faut eſſayer par vne amour plus forte De luy faire changer celle qui le tranſporte. Le vieil ALCIDOR. En quel endroit mon fils, auez-vous tant eſté? Que fiſtes-vous alors que vous m'euſtes quitté? ALCIDOR. Las! pardonnez, mon pere, à l'ennuy qui m' outrage, Si i' offre à voſtre abord vn ſi triſte viſage. Le vieil ALCIDOR. Quand à moy deſormais ie braue le malheur, Laiſe de vous reuoir a finy ma douleur, Quelque ſuiect de pleurs que le deſtin m'enuoye Ie ne verſeray plus que des larmes de ioye. CLEANTE. C'eſt à voſtre vieilleſſe vn agreable apuy, Que l'amitié d'vn fils vertueux comme luy, De quel excez d'amour dont vous ſoyez capable, Vous ne ſçauriez l'aimer autant qn'il eſt aimable. Le vieil ALCIDOR. Ce n'eſt point monen fant, mon bon-heur l'a trouué Et mon affection l'a touſiours éleué, De puis que ſon berceau luy ſeruant de nacelle, En le ſauuant des flots le miſt ſous ma tutelle. DAMOCLEE. Comment ſe fiſt cela, quel ſiniſtre deſtin L'auoit mis en naiſſant ſiproche de ſa fin? Le vieil ALCIDOR. Ie ne puis le ſçauoir, les eaux d'Oiſe, & de Seine Diſputant ce butin, faiſoient que de la plaine, Ie ne peu meſme voir qui des deux l'emportoit, Ie m'aprochay du bord, lors qu'encore il flotoit, Où ſes ieunes attraits me donnerent enuie De le porter chez moy pour luy ſauuer la vie, Et ma femme dés lors qui l'aima comme ſien, Ne ſçachant point ſon nom le fiſt nommer le mien. DAMOCLEE. En quel temps fut cela? Le vieil ALCIDOR. Ce fut lors que la France Se vit couuerte d'eau en ſi grande abondance, Depuis ce iour fatal les moiſſons de Cerés Ont par dix & neuf fois redoré nos guer ets. DAMOCLEE. Las ie per dis alors parla fureur de l'onde Daphnis, qui ne faiſoit que de venir au monde; Ie pleure quand i'y penſe, il m'en ſouuient touſiours, Ce fleuue à gros boüillons débordant de ſon cours Rempliſſoit de terreur les campagnes voiſines, Mes troupeaux effroyez gaignerent les colines, Et le petit Daphnis encor dans le berceau Demeur a dans ma loge à la mercy de l'eau, Trois fois pour le ſauuer ie me mis à la nage, Mais vn torrenc rapide eſtoit dans mon paſſage, Qui rauageant l'eſpoir des couſteaux les plus verts Precipitoit ſon cours dans leurs flancs entrouuerts, Couuroit les champs voiſins de cailloux & d'arene Et payant en grondant ſon tribut à la Seine, Dans le milieu de leau les vagues m'offuſquoient, Lapeur me ſaiſiſſoit, les forces me manquoient, De ma temerite les ondes ſe courouſſent, Et malgré mes efforts par trois fois me repouſſent. La Seine cependant eſtant larges ſes eaux Pour raſſembler en vntous les petits ruiſſeaux, Ie regarde en pitié ma maiſon aſsiegée, Souſtenir les efforts d'vne vague enragée; Et deſia la fureur dont elle l'a battoit Faiſoit monter l'écume auſsi haut que le toict; En fin de toutes pars la tempeſte boüill onne, La charpente gemit, la muraille s' étonne, L'vn s' éleue ſur l'eau, l'autre fond au deſſous, Ie perds en ce malheur la parole & le poux, Quand ie vis mon enfant dans le milieu des ondes, Errer à la mercy des poudres vagabondes, Tant que ie le peux voir ie le ſuiuis des yeux, Et puis ie le remis en la garde des Dieux. Ne ſeroit-ce point luy qui tient de vous la vie? Recognoiſſez-le bien, chacun vous en conuie. Quelle marque auoit-il, lors qu'ils fut abordé? Le vieil ALCIDOR. Voila ſon bracelet que i'ay touſiours gardé. DAMOCLEE. C'eſt celuy qu'il auoit, ô merueille du monde! Mon enfant eſt ſauué de la rage de l'onde, Venerable vieillard, helas! que ferons-nous Pour vous rendre le bien que l'on reçoit de vous? SILENE. A la fin tout le monde aura ce qu'il ſouhaite, La volonté des Dieux eſt par vous ſatisfaite, Ce Berger eſt celuy que la Déeſſe entend Du bon-heur de mon frere vn chacun eſt content, En luy donnant vn fils, vous me donnez vn gendre, La Bergere Ydalie aura ſon Tiſimandre, Et ma fille celuy que par élection Le deſtin reſeruoit à ſon affection. ALCIDOR. Que ie luy dois d'autels du bon-heur qu'il m'enuoye. ARTENICE. Que de biens biens à la fois! YDALIE. Dieux! que i' en ay de ioye! TISIMANDRE. Vieillard de qui nos maux ont leur ſoulagement, Dieu vous peut-il combler d'aucum contentement Qui ne ſoit au deſſous de ce qu' on vous deſire? ALCIDOR. Aprestant faueurs! que vous ſçaurois-ie dire? A vous par qui ie ſuis comblé d'aiſe & d'honneur, Et par qui le deſtin auec tant de bon-heur, Pour la ſeconde fois me redonne la vie? Dans l'exez des plaiſirs dont mon ame eſt rauie Ie ne penſeray plus à mon tourment paſſé, Que pour benir les Dieux qui l'ont recompenſé. SILENE. Allons donc chers enfans ſouourer les delices Dont l'amour ſatisfait vos fidelles ſeruices; Et nous autres Vieillards amoureux durepos, Allons vuider en rond les verres & les pots: Le Ciel de toutes pars nous met en aſſeurance, Il faut m • n frere encor apres cette alliance Pour ioindre de nos coeurs l'étroite liaiſon, Faire de nos maiſons vne ſeule maiſon, Nous y verrons vn iour nos gendres & nos filles Dans vn meſme foyer éleuer leurs familles; Et vous ſage Veillard y viendrez auec nous▪ Prendre part au repos que nous tenons de vous. ALCIDOR. Dieux! que ie dois de graces aux bonnes deſtinées Qui comblent de tant d'heur la fin de mes annés. TISIMANDRE. Mais pour quoy Lucidas vient-il ſi promptement? Voudroit-il point encor par quel que enchantement S'oppoſer aux douceurs du bon-heur où nous ſommes? LVCIDAS. Belles qui poſſez la merueille des hommes Et vous ieunes amants que i'ay tant trauerſez, Ne m' accuſez pas ſeul de mes crimes paſſez, Vous en voyez l'autheur dans les yeux d'Artenice. DAMOCLEE. Laiſſez-nous en repos eſprit plain d'artifice, Vous offencez encor ces deux couples d'amants En retardant l'effect de leur contentements La nuict viendre bien toſt mettre fin à leurs peines, Les ombres des couſtaux s' alongent dans les plaines, Deſia de toutes pars les Laboureurs laſſez Trainent deuers les bourgs leurs coutres renuerſez. Les Bergers ont de ſia leurs brebis ramenées Le Soleil ne luit plus qu' au haut des cheminées, Voicy le temps Berger qu'il ſe faut dépeſcher De iouïr des plaiſirs qui vous couſtent ſi cher. LVCIDAS. Et moy ſeul reſteray-ie en proye à la triſteſſe? Paſſeray-ie ſans fruict la fleur de ma ieuneſſe? Que me ſeruent ſes biens dont en toute ſaiſon Le voiſin enuieux voit combler ma maiſon. Que me ſert que mes bleds ſoient l'honneur des cāpagnes Que les vins à ruiſſeaux me coulent des montagnes, Ny que me ſert de voir les meilleurs ménagers Admirer mes jardins, mes parcs, & mes vergers, Où les arbres plantez d'vne égale diſtance Ne periſſent iamais que deſſous l'abondance, Ce n'eſt point en cela qu'eſt le contentement: Tout ce change icy bas de moment en moment, Qui le penſe trouuer aux richeſſes du monde Baſtit deſſus le ſable, ou graue deſſus l'onde. Ce n'est qu'vn peu de vent que l'heur dugenre humain, Ce qu'on eſt auiourd'huy l'on ne l'eſt pas demain: Rien n'eſt ſtable qu'au Ciel, le temps & la fortune Regnent abſolument au deſſous de la Lune. FIN.